「失」婚大作戰: （二十四）

※       ※       ※





「...你話阿康今日無返公司？咁你知唔知佢幾時返嚟？」

一大朝早，Wendy嚟到阿康做嘢嘅地方尋人。





「聽講佢好似去左見客，你問我我都唔知佢會見幾耐，可能唔返都未定。」阿康嘅同事答。

「咁你可…」

「Sorry，呢位小姐，唔好意思，因為我夠鐘要開會，無乜嘢你就自便啦。」

Wendy正想開口問阿康嘅電話，對方就話有會要開，好快咁離開座位行去會議室。

真係慘，問個電話問唔到，想見阿康一面竟然比想象中困難。





佢揾間咖啡店坐低，拎電話出嚟，撞下幾個number再打過去。

可惜都係打唔通，又試過打俾肥榮同安仔，佢地都唔知係咪返緊工，兩個電話都無人接。

再咁落去唔好講要同阿康坐低講清楚，連見唔見成一面都成問題，如果呢日佢地從無相遇過，咁就唔會有以後嘅故事，咁樣就好大獲。

點都好，至少點都要保住二人相遇嘅時刻。

而佢兩個係喺Blur嘅演唱會度相識，穿越嘅阿康返得嚟就應該會避佢，所以好有可能唔會去聽Blur。





本身其實Wendy唔係太聽呢隊band，但自從同阿康一齊後，每次聽Blur嘅歌，都會諗返起佢地相遇嘅情景。

佢仲記得對方當時怕怕醜醜，唔敢問佢拎電話嘅樣。

如今睇嚟，嗰段回憶恐怕將變得面目全非。

Wendy十分迷茫，唔知點算好，返工時間阿康去左見客，要揾佢都唔知去邊度揾好。

定還是等到夜晚收曬工，先再去對方屋企一次？

只不過阿康係咪真係唔會去Blur嘅演唱會？

萬一佢唔想曬左張飛，照樣去嘅話，咁放左工佢咪唔會返屋企住，到時上屋企都係會摸門釘。

為今之計，最好都係做好兩手準備，Blur嘅Live照去，去到見唔到就即走，然後再上阿康屋企。





Wendy記得張飛係早幾日Paula送俾佢嘅，無記錯嘅話應該攝左喺銀包。

今日佢著左褲，平時著褲嘅話佢習慣將銀包放喺條褲後面。

於是佢摸一摸後面，卻發現空寥寥，咩都摸唔到。

仔細再揾下，就發覺個銀包唔見左！

佢摷勻前後褲袋，揾埋手袋都揾唔到個銀包，心諗唔係咁黑仔下話？

好地地點會俾人打荷包？

佢啱先喺搭地鐵過嚟，返工時間人多擠逼，唔通就喺嗰陣俾人偷左銀包？





唉…

依家都唔係深究呢樣嘢嘅時候，唔見左個銀包，第一時間要打電話俾銀行，報失張提款卡同信用卡，免得俾人盜用。

最弊嘅係嗰張飛咁就無左...唉...點算好？

Wendy垂頭喪氣，諗緊有咩解決辦法。

無左張飛就入唔到場，除左幫襯黃牛買過張都別無他法。

佢上去啲放飛/求飛嘅網站，原本嘅位置就肯定買唔返，只好盡可能買返近舞台嘅位置。

慶幸自己嘅運氣未去到谷底，碌兩碌電話就俾佢揾到有人原價放飛，位置仲係頭三排。

佢諗都無諗，即刻就bid左。





個賣家就約佢下晝到旺角站親自交收。

到左放工時分，地鐵人來人往，逼滿收左工嘅打工仔。

Wendy嚟到旺角地鐵站，等左十分鐘左右，個賣家就出現。

佢見到個賣家嘅第一眼，驚訝到不敢相信。

個賣家居然係阿康…？！

辛辛苦苦揾左十幾鐘頭都揾唔到嘅人，到頭來卻喺一個咁巧合嘅場面遇見。

或者呢啲就係真正嘅緣份，兩個命中註定要相遇嘅人，無論點都係會相遇。





佢成個人呆左，一時間唔識反應，對方亦都展露詫異嘅表情，幾秒後轉身想走人。

Wendy當堂衝埋去攬住阿康，唔俾佢走：「阿康唔好走，唔好離開我！」

阿康停下腳步。

Wendy埋頭到對方嗰背脊：「唔好走，就算係兄妹都好，我都唔介意，我淨係想同你喺埋一齊，所以請你唔好離開我。」

「點解…你會知道我地係兄妹？」阿康問。

「因為嗰本日記我睇左，我阿媽同你阿爸嘅嘢我都知道曬。」

「我阿爸同你阿媽嘅事？照計你應該唔識我，唔通你…」

「係，我同你一樣，都係穿越左返嚟，我想同你講……」

句嘢都未講完，一道閃光來勢洶洶，向住Wendy襲來。

雖然穿越時間未完，但由於佢「自爆」左穿越者嘅身份，因此即刻就被送返現實。

另一邊嘅阿康被揭穿係穿越者，一樣都要被送返現實。

至於個婚禮已經夠鐘開始，坐喺教堂嘅賓客正等待兩位主角出場。