「失」婚大作戰: （二十六）

我地兩個商量完，決定返到過去，燒左本日記。

「喂你兩個唔好爭住，有嘢揾你地幫手。」我地夾手夾腳，分開Jacob同Mary。

「做咩事呀？」Jacob問。

「我想你兩個幫我地再穿越一次。」我答話。

「再穿越一次？」兩隻精靈表示不解。





我同Wendy將我地嘅想法講出嚟。

「哦，原來係咁，咁你地要返去邊一日燒日記？」Mary問。

「呢個…應該返去邊日好？」我問Wendy。

「阿姨話佢一直都唔知屋企有本日記，係屋企俾人爆格之後，先俾個賊摷左出嚟，咁不如就返去我屋企俾人爆格嗰一日？」

「即係三日前？」我話。





「嗯，無錯。」

就係咁，我同Wendy選擇穿越回到三日之前。

Jacob同Wendy暫時停戰，幫埋我地最後呢一次。

有左上幾次嘅經驗，我同Wendy都識點做。

我地深呼吸一口氣，一齊伸手指向前方，同時大嗌：





「哈利路亞 Jacob Chance / 哈利路亞 Mary Chance ！」

刺眼嘅白光射向眼球，十多秒後，就返到嚟三日前。

穿越之前，我地兩個約定好，唔好講穿越嘅事，亦唔好表現得自己從未來嚟咁嘅，反正表現到同平時一樣就得。

因為我地唔知本日記擺喺邊，所以要等到個賊爆格，摷本嘢出嚟。

而喺俾人爆格前，我地盡量做返三日前嘅自己，三日前做過咩，我地就做返啲咩。

我諗我地應該係人生第一次咁想俾人爆格，同埋明知俾人爆格都唔阻止，最後個賊亦都無令人失望。

喺第二日黃昏時間，個賊仔如預期般出現，爆入間屋度偷嘢。

我地並唔關心間屋被人摷到有幾亂，亦關心有咩嘢唔見左，淨係關心一樣嘢，就係嗰本日記。





等到個賊走左，捕住喺樓下嘅我地，趁慧姨未返嚟，拿拿臨返上單位。

入到屋，我地見到嗰一本破舊嘅日記，安然咁躺在喺凌亂嘅雜物堆中。

我地執起本日記，無揭開過本嘢，直接行上天台。

Wendy將個打火機遞俾我：「燒左呢本嘢，所有嘢都好似無事發生過一樣。」

無錯，呢本日記一旦消失，一切都會變得無發生過一樣。

我撻著火機，紅色嘅火光焚燒發黃嘅日記。

隨住火光，我阿爸同Wendy阿媽過去嘅愛恨情仇，逐點逐點咁消失，佢地嘅事將成為一個永遠都唔會有人知嘅秘密。





當穿越結束，回到現實後，嗰啲喺我同Wendy腦海中，關於誰是哥哥誰是阿妹嘅記憶，都會如呢本日記一樣，徹底消失殆盡。

係咪兄妹都好，事實係點都已經唔重要，亦無需在乎。

真正重要嘅係我地兩個能夠喺埋一齊，心無牽掛咁步入教堂。

夕陽落下，火花燒盡。

等緊我地嘅係，係另一個開始。

※ ※ ※

「…阿康第一次做新郎，係咪好緊張？」安仔按我膊頭，叫我放鬆。

佢個頭今日gel到好四正。





婚禮仲有五分鐘就開始，呢刻嘅我緊張到手心出汗：「出面好似嚟左好多人？」

「我諗都有百幾二百人，你唔洗咁騰雞，定啲嚟，試下深呼吸，放鬆下個人。」肥榮身上嘅加大碼西裝，喺佢身上顯得狹窄。

我按照肥榮所講，抖一啖大氣，但個心仍然緊張到怦怦跳。

好快牧師就行過嚟叫新娘同新郎出場。

我準備好結婚戒指，慢慢從後台行出去，見到教堂嘅櫈幾乎被坐滿。

隨即台上響起鋼琴聲。

呢首係Wendy親自揀嘅歌 All of me。





同一時候，身穿白色婚紗，臉上掛住美麗笑容嘅Wendy，喺慧姨嘅伴隨下，慢慢向住我行過嚟。

件婚紗裙擺好長，喺後面跟住兩個細路，拖住裙擺。

個兩個細路好熟口面咁，只係一時間我又醒唔起，可能係某啲親戚嘅細路唔定。

至於今日嘅Wendy真係好靚，望住面前嘅佢，我嘅心幾乎要融化。

慧姨就將Wendy託付到我手上。

證婚牧師隨後讀出誓詞：「請問陳家瑜小姐是否願意同林家康先生結為夫婦？」

Wendy點一點頭，帶著充滿愛意望住我，回答：「我願意。」

「咁請問林家康先生是否願意同陳家瑜小姐結為夫婦？」

「我願意。」


（全文完）