「失」婚大作戰: （二十）
※ ※ ※
經歷一夜宿醉，安仔同肥榮訓醒後，個頭赤赤痛。
本來佢兩個依家應該喺西貢，幫緊阿康準備表白嘅嘢，不過琴日對方突然轉軚話唔表白，咁佢地無嘢做，食完下午茶就留喺屋企打fifa。
由下晝五點幾一路打到夜晚八點幾。
「…唔玩啦唔玩啦，頂，你條死肥仔屈機嘅。」
「哈哈，玩多鋪啦，最多我讓下你啦。」
「一啲癮都無，唔玩啦。」安仔dum低手掣，開著電話碌Facebook。
「喂肥仔，Facebook有個靚女add我喎。」
「有幾靚呀，等我睇過。」肥榮搶過電話，「條女有啲熟口面，好似喺邊度見過。」
「等我睇真啲。」安仔㩒一㩒個mon，接受左對方嘅好友申請，再打開個profile睇一睇，「唔係喎，呢條女咪係阿康追嗰條？」
「啊係呀係呀，你睇下，個名都係叫Wendy，之前阿康都俾過我地睇架，但係做咩佢無端端add你嘅？」
「啱先佢彈左條message過嚟，上面寫話佢有嘢想搵我地兩個幫手，約我同你兩個今晚出傾。」安仔讀出Wendy嘅訊息。
「佢有嘢想我兩個幫手？乜佢識我地兩個架咩？」肥榮問。
「唔知喎，可能阿康有同佢提過下我地兩個掛。」
「咁我地去唔去好呀？」
「去囉，睇下咩料都好呀。」
於是，二人應約嚟到尖沙咀某間coffee shop。
Wendy搵佢地出嚟，係想佢兩個幫手製造一個驚喜表白俾阿康。
「下？你想同阿康表白？」安仔同肥榮異口同聲，表示驚訝。
佢地無諗到Wendy竟然想主動向阿康表白，而且表白嘅方式幾乎同阿康原定嘅一樣。
「唔該你地幫幫手，我真係好想同阿康一齊。」Wendy真誠請求。
「但係我唔明點解要搵我地兩個幫手？」肥榮問。
「因為我聽阿康講，你地係佢嘅朋友，所以我信得過你地。」
呢個只係表面嘅說法，實際上Wendy知道阿康表白嗰陣，安仔同肥榮都有喺背後幫手做準備，為左留住嗰段美好嘅回憶，佢想二人幫佢呢一次。
而安仔同肥榮卻在猶豫，畢竟同Wendy又唔熟，霎時間要佢地幫手，佢地有啲唔知點好。
「你話想自彈自唱，但得一日時間，你練唔切架喎。」安仔對Wendy講。
「首歌我熟嘅，唱就應該無問題，結他就練唔切架啦，好彩我細個學過下琴，或者我可以今晚翻去練一練，另外都想請你同你busking嘅朋友，幫手夾一夾其他樂器嘅部分。」
「你連我玩busking都知？」
「呢樣…呢樣係阿康話我知嘅，佢周不時都會在我面前提起你地，今日我地第一次見面，我知咁唐突揾你地幫手，我自己都唔好意思，一係咁，如果你地肯幫我嘅話，我俾返五千蚊車馬費你地。」
「一人五千？」安仔問。
Wendy點頭答係。
安仔就細細聲喺肥榮耳邊問：「肥仔，呢單嘢你點睇呀?」
「呢條女出手咁闊綽，同埋好似好冧阿康咁，既然係咁，不如就幫下佢囉。」
安仔清清喉嚨講：「咁好啦，我地可以幫你。」
「太好啦，多謝你地，咁你可唔可以應承我，呢件事要同阿康保密，我想俾個驚喜佢。」
「無問題。」二人答應Wendy。
「咁唔好等，我地依家即刻去準備啦！」
Wendy只得二十四個鐘，佢一定要爭分奪秒，安排好一切，而且唔可以有半點差池。
因為機會只得一次，一旦衰左嘅話，咁佢同阿康五年嘅感情就會瞬間化成烏有。
佢地三人分頭行事。
肥榮就去買蠟燭同煙花（喺香港要買煙花唔容易，要有啲窿路先買到。）
安仔就揾佢busking嘅隊友夾一夾時間，至於Wendy先去花店訂左花，返到屋企後，摷返部電子琴出嚟練習。
匆匆忙忙咁準備一個表白，Wendy當然希望唔好有咩阻滯，但事情經常係事與願違。
第一個佢遇到嘅問題就係，約唔到阿康。
佢想約阿康聽日出嚟，只但係對方個電話打左成晚都打唔通，佢叫埋肥榮、安仔一齊打都揾唔到人。
究竟發生咩事呢？
點解阿康失左蹤？
唔通對方個穿越時間未過，仲避緊自己？
Wendy一邊諗，一邊感到擔心，表白無左男主角，咁就無法成事。
佢通宵練左一晚琴，同時都call足一晚電話，call到第二朝七點幾先有人聽。
「喂阿康，你去左喺邊呀？成晚都唔覆機嘅？」
「我？我依家好似喺碼頭…」
「碼頭？你喺碼頭做咩？」
「呢層我都唔知，淨係見到地下有好多啤酒罐，我諗我琴日應該飲酒飲到斷左片。你呢？你咁早揾我有咩事？」
「我打電話過嚟，係想約你今日入西貢。」Wendy推斷穿越嘅阿康返現實前，應該飲左好多酒，所以搞到本來嘅阿康醉到斷曬片。
「係呀，今日我本來都約左你去西貢。」
「唔係，你係琴日約左我，今日係我嚟約你。」Wendy答。
「琴日？今日唔係星期六咩？」阿康問。
「今日係星期日，琴日你無出現。」
「下？有啲咁嘅事？」
「係呀，總之今日下晝三點我地彩虹站等啦，你一定要嚟呀！」
「嗯，好呀。」
「記得，你一定要出現！」Wendy再三強調，然後就收左線。
揾到男主角後，卻又遇到另一個問題，就係大暴雨。
由琴晚凌晨開始，個天就落大雨，落到今朝就未停過。
天文台已經發左黃色暴雨警告，並預計喺稍後時間，雨勢會繼續增強，唔排除發出紅雨警告。
如果啲雨再唔停，咁蠟燭就點唔到，煙花又放唔到，原定成個安排無法實現。
呢刻望住窗外滂沱大雨，只能祈求個天快啲停雨，Wendy唔想表白計劃因此而告吹。