「失」婚大作戰: （十九）

佢一個人坐喺度飲苦酒飲左兩粒幾鐘，飲到個人醉醺醺。

隨後拖著輕浮嘅腳步，慢慢行出居酒屋，打算沿路返回到酒店。

途經一條街燈昏暗嘅巷仔，無端端有幾條染曬金毛嘅男人行埋嚟，擋住左去路。

班人嘰哩咕嚕唔知講緊咩，而且仲對佢摸手摸腳。

「你地係咩人？唔好行埋嚟，唔好掂我，快啲走開！」





Wendy嘗試退後，但班日本仔就捉住佢隻手，唔俾佢走。

就喺呢個時候，身後傳來一把講廣東話嘅聲音：「你班死日本仔，快啲放…放...」

「砰！」說話都未講完，把聲就無左。

Wendy擰轉頭一望，見到阿康成個人訓低左喺條街度。

阿康？點解佢會喺度嘅？





佢想行過去扶起對方，問題係班日本仔唔肯放手。

好彩咁啱有兩個日本警察巡邏經過，佢地趕走左班飛仔，仲幫手扶起阿康。

Wendy感覺到阿康佢雙手好凍，凍到好似冰咁，再用手背摸摸個額頭，又feel到熱辣辣。

睇嚟對方發緊高燒。

日本嘅警察好好人，幫人幫到底，夾手夾腳幫手抬左阿康返酒店。





Wendy先幫阿康冚好被，然後喺行李箱，揾左一盒從香港帶嚟嘅退燒藥同退熱貼。

佢斟滿一大杯暖水，餵阿康食藥。

之後成晚佢都陪喺身邊，每隔一個鐘就幫對方探熱，同埋換退熱貼，夠四個鐘又會餵一次退燒藥，照顧得無微不至。

而成晚流流長，阿康喺迷糊之間，偶爾發開口夢，埋怨上天嘅作弄。

「點解…點解個天要咁樣玩我地…點解Wendy要係…我個妹…點解要喺結婚前先俾我知…點解…」

旁邊嘅Wendy聽到，心裡不禁一陣心酸。

係囉，點解個天要咁樣玩我地？

儘管個天同佢地作對，不過佢仍然相信，一定會有辦法解決呢個令人難堪嘅困境。





時至第二日中午，昏迷嘅阿康終於緩緩醒來。

Wendy都終於鬆一口氣，露出微笑：「阿康，你醒啦？」

「Wendy…你無嘢呀嘛…有無蝕底俾班架仔…」阿康一醒來就關心Wendy。

「無事，好彩咁啱巡邏嘅警察路過，佢地趕走班飛仔，仲幫我抬你返嚟酒店。」

Wendy感覺窩心，倒左杯水俾阿康。

阿康接過杯，飲一啖水問：「你無事就好啦，係啦，咁依家幾點呀？」

「都差唔多十二半啦。」





計一計時間，二十四小時嘅穿越時間即將結束。

兜兜轉轉過後，佢地最後都係喺返埋一齊。

大家互相望住對方，仿佛彼此心裡都有千言萬語，只係唔知點樣開口講出嚟。

「呼~」

一陣微風吹入房間。

一片櫻花隨風慢慢從窗口飄入嚟。

佢地不約而同望出窗外，發現原來遠處小山丘上有一棵櫻花樹。

雖然唔知咁樣佢地算唔算和好如初，但Wendy見到櫻花仍然想拍下來作紀念。





「咔嚓！」

拎起電話，影完一張櫻花照，隨之出現一道強光，照向佢面前。

十幾秒後，佢又返回到現實。
 
回過神來，慧姨仍然喺耳邊勸說：「Wendy，接受現實啦，近親通婚喺香港係犯法架，你同阿康係點都唔可以結婚。」

「你唔講我唔講，阿康唔講，咁點會有人知？」Wendy反駁。

「俾你呃到全世界又點，你真係過到自己嗰關咩？就算你呃到自己一時，但你呃到自己一世咩？」

「我…我…」呢一句，Wendy就不懂如何反駁。





而門外嘅Paula見佢地都傾左好耐，冒昧敲門入嚟話：「Sorry阻阻你地，雖然唔知你地傾緊咩緊要嘢，只不過假如再傾落去，就怕趕唔切，因為我仲未幫Wendy化個鼻。」

「阿姨，咁不如你出一出去，我同Paula化埋個妝，有咩我地遲啲先講。」Wendy對慧姨講。

「Wendy，你要諗…」

「阿姨唔好講啦，你不如出去招呼下啲親戚朋友。」

「係囉慧姨，有咩咪等婚禮完左先講囉。」Paula加一把嘴。

最後慧姨喺唔情願嘅情況下，俾Wendy請走。

跟住Wendy就坐返喺梳妝檯前化妝。

同時間，佢心入面諗緊阿康嘅情況，唔知對方試幾次唔成功分開，會唔會回心轉意。

「啱先你同慧姨傾左啲咩？」Paula一邊化妝一邊八卦。

「無傾咩呀。」

「見你個樣變曬咁，仲以為你地傾左啲大穫嘢添。」

Wendy已經努力去掩飾，只係臉上嘅表情係呃唔到人。

對比剛才春風滿面嘅佢，依家嘅佢完全係另一個人，額頭明顯鑿住「悶悶不樂」四個字。

事實上，從佢揭開嗰本日記嗰刻，就註定佢唔能夠開開心心咁，迎接呢個婚禮。

所以嘢都已經變得不一樣。

佢同阿康嘅關係，原本開心嘅心情，對呢個婚禮嘅期盼，統統都由見到嗰本日記開始，出現180度轉變。

假若無呢本日記出現，佢又從無睇過本日記，或者事情就唔會變到咁樣。

呢個時候，Paula手上嘅鼻影筆，掃掃下停左落嚟。

而房間又再變得漆黑。

一道光照向Mary，佢慢慢行近：「喂，你未婚夫幾有恆心，都未肯放棄，似乎仲想穿越多次。」

「仲嚟？咁今次佢想返去邊一日同我分手？」

「唔係同你分手，而係返去表白嗰日，唔同你開始。」

「咩話？佢竟然要咁做？」Wendy感到驚訝。

「我偷聽到個原因嘅係，你未婚夫一心想改變你地上過床嘅事實，見前面衰左幾次，於是先要想用呢啲一了百了嘅方法。」

「一了百了…」Wendy聽完，心裡一沉。

阿康嘅表白對佢地嚟講，係好重要嘅回憶，亦係佢地愛情嘅起點。

佢絕對無允許一段咁重要嘅回憶消失。

「今次係咪你照跟你未婚夫返去同一日？」Mary問。

Wendy諗左一陣，搖搖頭：「我打算返去佢表白嘅後一日。」

呢一次，Wendy唔打算同阿康穿越返去同一日。

表唔表白，個主動權係喺阿康手上，對方只要咩都唔做，就可以由表白變成無表白。

有見及此，Wendy只能採取主動，將由阿康表白變成由佢表白。

至於揀表白後嘅一日，係因為揀同一日嘅話，穿越嘅阿康肯定會拒絕，而五年前嘅阿康就唔會。

當日阿康就帶佢到砌左心形蠟燭嘅沙灘上，先送上鮮花，然後拎住結他，自彈自唱唱佢最鐘意嘅John Legend。

雖然唱就唱到走曬音，但係真係感受到對方嗰一份真誠。

當刻嗰佢完完全全俾對方嘅誠意打動，就喺燭光點點嘅浪漫氣氛下，佢「up」頭應承做對方嘅女朋友。

依家再回想返，佢個心都會忍唔住怦怦咁跳，仍然會有一種心動嘅感覺。

試問一個難忘嘅情景，點可以就咁消失？

所以佢決定用返同一個表白方式，向阿康表白。佢希望回憶裡面，所有嘢都唔會變，變嘅就只會係開口告白嘅一方。

諗定曬之後，就嗌一句「哈利路亞 Mary Chance」，隨後一道強光就將佢帶返到五年前。