「失」婚大作戰: （二十一）

「滴噠滴噠—」

下晝一點幾，大雨還未停。天文台改發紅色暴雨警告。

安仔同肥榮都Whatsapp Wendy，問計劃都咪要取消。

原定呢個時候，佢地本來會到沙灘準備定啲嘢，家下咁嘅環境，睇嚟所有野都要推遲。

而Wendy都做好最壞打算，啲雨再繼續咁落嘅話，嗰啲沙灘燭光煙花睇怕用唔著，不過就算無左呢啲，佢都要當面同阿康表白。





佢要對方親口應承同佢一齊，開始佢地嘅關係。

「今日出面落大雨，不如我地約過第二日？」阿康send嚟短訊。

「無事嘅，好快停雨架啦。」

「咁我地延遲少少，等到啲雨細返啲先入西貢啦。」

「好呀，記得唔好甩底。」Wendy強調話。





傾盤大雨一直落，落到差唔多五點，天文台終於將紅色暴雨改返為黃色暴雨警告。

仲有三個鐘，Wendy嘅穿越時間就會結束，佢見啲雨好似細左，都唔理咁多，立即就call安仔同肥榮，一齊入西貢預備下先。

佢地冒住大雨嚟到彩虹小巴站。

「安仔，你班busking嘅friend，你琴日又話佢地應承過嚟做伴奏嘅？」Wendy問。

「落咁大雨，佢地無人肯出。」





「咁你嚟得做咩唔帶埋自己支結他？」

「家下橫風橫雨，我都驚自己支結他淋濕架嘛，有你自己一個彈琴都夠啦。」安仔答話。

Wendy感到失望，然後問肥榮：「啲蠟燭、煙花，你都帶齊啦嘛？」

「梗係準備好曬啦。」肥榮打開背囊展示入面嘅物品。

「啲蠟燭呢？」Wendy摷一摷個背囊，發覺無蠟燭。

「咦係喎，唔通我帶漏左，一係我返屋企攞返。」

「你住到山卡拉咁遠，一來一回有排喎，你唔係要我地憨居居咁等你下話？」安仔話。

「咁點算？」





「唉算啦，入到西貢先睇下有得買。」Wendy十分無奈，估唔到呢兩條友咁靠唔住，早知就唔揾佢兩個幫手。

入到西貢，雨勢又再細返啲。

佢地揾下有無蠟燭賣，結果有係有，但就係嗰啲元寶蠟燭嗰種蠟燭。

今次真係吹脹，砌呢啲蠟燭寧願唔要算。

見啲雨越嚟越細，佢地就嚟到一個西貢小沙灘。

無左蠟燭，又無樂隊伴奏，家下就得返煙花同部琴，仲有一扎玫瑰花。

「…咁到時我唱完歌，就會拎扎花送俾阿康，同佢表白，咁你地就喺隔籬放煙花，o唔ok？」Wendy向佢地解釋一次。





「梗係OK。」二人話無問題。

跟住肥榮從背囊，拎啲煙花出嚟睇下，發覺全部濕曬：「大獲，啲煙花濕曬。」

「唔係呀嘛？」Wendy行過去一望，肥榮背囊嘅煙花真係淋濕曬，「乾左應該仲點得著架嘛？」

「唔清楚喎。」

「如果連煙花都無埋，我兩個咪無嘢做，咁嗰一萬蚊係咪都照俾架？」安仔問Wendy。

「放心啦，我應承得就肯定俾架啦。」

「哈哈，咁就好啦。」

「時間差唔多，我要出返市區同阿康會合，我將扎花同部琴俾你兩個保管住，唔該你地唔好再有咩差錯。」





Wendy吩咐完，就行返出西貢市集，準備搭車。

沿途竟然遇到佢個有錢仔上司。

「Hi Wendy，點解咁啱嘅，你嚟西貢做咩呀？」有錢仔上司上前打招呼。

「無，約左朋友入嚟食飯。」Wendy求其作啲嘢敷衍對方。

「咁你知唔知我喺度做咩？」

Wendy無興趣知道佢啲嘢，禮貌上問一問：「都係過嚟食飯？」

「唔係，我約左幾個friend喺船度練嘢。」有錢仔上司身後有一隻遊艇。





「哦原來係咁，係啦唔好意思，因為我趕時間，我地得閒再傾過啦。」

「唔好走住，既然咁有緣，咁唔好擇日不如撞日，你上嚟遊艇我俾啲嘢你睇下。」有錢仔上司無端端拉左Wendy上船。

Wendy無端白事夾硬俾人拉左上遊艇，上到船佢見到入面裝飾得好靚，又鮮花又燈飾又有氣球，而且仲有班拉提琴嘅樂手。

呢個有錢仔琴日聽完阿康講嘅嘢，立即就揾左班玩開音樂嘅朋友，練左首John Legend嘅歌，仲將隻遊艇佈置得美輪美奐，打算準備好曬就約Wendy出嚟示愛。

不過佢無諗到呢日會喺西貢撞到Wendy，所以乾脆就即場將呢個驚喜送俾對方。

「咳咳—」有錢仔拎起咪，對住Wendy開聲獻唱John Legend嘅首本名曲 All of me。

Wendy唔知對方搞邊科，淨係聽到成隊band演奏得非常好，於是叫停問：「你可唔可以借你隊band嚟用下？」

「下？」有錢仔一臉疑惑。

「我想借你班樂手朋友一用，仲有你啲花同燈飾，同埋請問你呢度有無蠟燭架？」Wendy一輪嘴咁問。

「你要呢啲嘢嚟做咩？」有錢仔問。

「唔夠時間解釋咁多，你可唔可以借嚟洗下呀？」Wendy焦急追問。

「Er…我諗都得嘅…」

Wendy聽見對方應承，隨即就打電話叫安仔同肥榮過嚟，帶啲樂手同搬啲嘢過沙灘。

有錢仔一開頭唔知咩事，到後來先知，原來Wendy係要呢啲嘢嚟同阿康表白。