「失」婚大作戰: （十八）
「請你食杯雪糕啦，食完個人心情會好好多。」Mary遞一杯雪糕俾Wendy。
「唔洗啦，我無胃口。」
「咁我就自私食啦。」Mary「筆」一啖雪糕，放入口中。
Wendy歎一口氣，心裡滿是鬱悶：「Mary，你係精靈，你話我應該點算？」
「如果你唔介意亂倫咪照樣結，介意嘅咪唔好結，就睇下你點諗嘅啫。」
「我既唔想離開阿康，但又唔係百分百肯定，係咪真係接受到同親阿哥結婚，總之我都好矛盾，都唔知點算好…」
「Shh—我感應到隔籬房，好似要做第三次穿越。」
「唔係呀嘛，佢要返去邊一日？」
Mary擺低杯雪糕喺梳妝檯，又偷偷地穿墻偷睇下隔籬房。
返到嚟佢就同Wendy講：「照咁睇，你未婚夫今次打算返去，你同佢第一次去東京旅行嗰一日。」
「咁點算好，我可唔可以過隔籬房阻止佢地？」Wendy問。
「無用架，因為我地呢間房同你未婚夫間房，都係短暫咁時間停頓左，你過到去只會變『定格人』。」
「我要阻止佢嘅話，只能跟佢再穿越多一次？」
「嗯嗯，無錯。」
「咁麻煩你再幫我一次。」
Wendy心諗一定會有方法，能夠解決亂倫嘅問題，讓佢地繼續喺埋一齊。
而喺諗到辦法之前，佢唔可以俾對方離開。
「哈利路亞 Mary Chance！」
佢懷著忐忑嘅心情，乘著奪目強光，嚟到四年半前嘅東京。
打開眼第一眼見到嘅就係阿康。
「…嘅六本木，我地分開各行各路啦。」
啱啱穿越返嚟，佢只聽到對方後面嗰句，唔知前面講左乜。
阿康個樣嬲爆爆，等緊佢反駁。
Wendy諗左幾秒，講左句百搭嘅說話：「咁…即係算點呀？」
「咪散band囉……洗鬼專程嚟日本買咩！多餘！」阿康一輪嘴講左一大堆說話。
Wendy淨係想叫佢留低，但對方完全唔俾自己機會開聲，不停咁講左一大輪嘢，然後衝出馬路截的士離開。
佢已經喺後面係咁追，可惜跑得唔夠快，阻唔到阿康上車。
輪到佢要截車時，又無的士經過，眼白白望住架車駛遠。
佢心諗東京咁大，阿康究竟搭車去邊？
啱先佢聽到阿康講咩六本木？唔通係去六本木？
佢再認真諗返嗰日二人爭拗嘅情形，記得返對方話過要去秋葉原。
莫非係去左秋葉原？
只但係呢個係穿越嘅阿康，唔係四年半前嘅阿康，返到嚟係同自己分開，無理由會去秋葉原。
咁會去左邊呢？
齋企喺度諗都無用，佢決定唔曬時間諗咁多，試下逐個地方揾，總之點都要揾返阿康。
佢即刻就搭車去到秋葉原，一個人嚟到呢個「宅男聖地」，尋找愛人嘅蹤影。
結果揾左兩粒幾鐘都係得個吉。
佢無輕易放棄，揾到去東京市區內一處河畔。
呢度係四年半前二人鬧完交後，和好如初嘅地方。
結果阿康無嚟到呢度。
嚟到黃昏時分，心急嘅佢拎住電話，開出阿康嘅相，開始逐個途人咁問。
問下有無人見過阿康。
問左都無一個鐘，佢部電話就無曬電，連1%都無，逼於無奈下要返去酒店叉電。
結果無諗到，竟然係酒店房遇返阿康。
Wendy見到阿康返左嚟，心情喜出望外。
佢以為對方回心轉意，唔再同佢分開。
「啱先同你一齊嗰個男人係咩人嚟架？」阿康第一句就問。
「你講緊邊個男人？」Wendy覺得呢個問題有啲莫名其妙。
「我見到你喺附近條街同一個男人傾密計，條友日本仔嚟架？佢唔會跟埋返酒店呀嘛？」阿康睄一睄房門位置。
阿康之所以見到Wendy喺街同個男人傾計，係因為啱先Wendy為左揾佢，到處問途人有無見過佢。
Wendy開口解釋，當解釋到一半，阿康又「站亂歌柄」，唔俾機會人講落去，仲孭起行李，急步行出門口。
Wendy想阻佢，但佢直行直過，想阻都阻唔到，再加上出到走廊迎面遇著，一大班拖住gip嘅新入住旅客，班人塞住條路，想行快兩步，追上前都唔得。
當落到樓下，阿康就已經唔見左。
天色漸黑，電話又無電，佢一個女仔人生路不熟，咁大個東京又唔知可以去邊度揾好。
呢刻嘅佢，無助又絕望。
入夜後天氣明顯轉涼，啲風吹過嚟，都不禁打冷震。
無可奈何嘅Wendy獨自返上酒店，添多一件外衣，幫電話叉一叉電。
一整日佢左撲右撲，周圍去揾阿康，連飯都唔記得左食，家下個肚餓到咕咕聲。
講到食嘢，佢就諗起，昔日鬧完交嘅二人相遇返後，到夜晚就去左一間居酒屋。
二人一邊食嘢，一邊平心靜氣、開心見誠以溝通解決之間存在嘅分歧。
佢知道阿康未必會再返去嗰間居酒屋，但佢都再想去一次，想重溫一次嗰日嘅回憶。
因為佢驚穿越時間結束後，呢啲回憶就會消失，隨時就得返嗰啲左奔西跑，周圍揾人嘅記憶。
等電話叉到有20幾%嘅電，佢就出門揾嗰間居酒屋。
由於間鋪頭只係去過一次，佢都唔太記得個位置，只好揾間7仔問下路。
按照店員教嘅路，過左幾條街就嚟到嗰一間居酒屋。
入到去第一時間望下周圍，睇下見唔見到阿康嘅身影。
答案，係無嘅。
佢揀左角落頭嘅位置，自己一個人坐低。
同樣居酒屋，同樣嘅位置，偏偏卻少左一人。
然而唔怪得阿康，佢都係逼於無奈先會咁做，鬼叫佢地兩個係兄妹。
真係要怪嘅話，只能怪個天，就怪天意弄人。
Wendy心情跌入谷底，嗌左幾支清酒，以酒來消愁。