「失」婚大作戰: （十七）
「阿康，你未咁快沖涼架嘛，咁就俾我沖先啦。」
Wendy扮作無睇過嗰段message，若無其事行去沖涼。
「Er…Wendy…你唔係有嘢想同我講咩…？」 阿康主動問。
「嗯？我有咩想講呀？」
佢繼續扮唔知情，行入沖涼房，諗住就咁蒙混過去。
點知沖完涼出到嚟，就聽到阿康喺露台講電話，仲好大聲講緊今日輸左三萬蚊嘅事。
今鋪對方玩「自爆」，佢想避都無得避。
呢種情況下，好難再詐詐低扮唔知，點都要開聲質問。
「阿康，你話喺電話同人講輸左三萬蚊，係咩嘅一回事？你唔好話我聽，你又學人炒牛熊？」
「無，邊係我輸錢，其實係肥榮條友仔，佢今日炒股輸左三萬銀，打過嚟同我呻。」
「啱先我明明係聽到，你同肥榮講自己今日輸左三萬！你快啲講，究竟你係咪炒牛熊輸左錢？」
Wendy諗住阿康假如繼續死口唔認，就唔再追究，結果對方下一句竟然就全盤供出。
對方擺明係博鬧，咁事實上輸左三皮又真係好抵鬧，唔鬧幾句好難講得過去。
猶豫片刻後，佢決定交就照鬧，只係set多一條界線，就係無論陣間嗌交，嗌到講曬粗口都好，佢都唔會主動提出分手。
「結果全部輸清光？林家康，你有無搞錯呀....…你鐘意嘅咪繼續玩，繼續輸錢囉，總之以後你啲嘢我都唔會再理，你依家安樂曬啦，林家康？！」
「係就最好啦！唔好到時反口覆舌，有口話人無口話自己！」
兩年前嘅Wendy聽到呢句，下一句就係分手，而穿越返嚟嘅佢，就採用冷戰策略。
「哼！既然你咁唔想我理你，咁我咪唔理囉，有本事你就繼續玩，我睇下幾時輸死你！」
再講多兩句佢就dum個枕頭落地，並示意對方今晚訓地下。
然之後就熄燈訓覺，封口再唔出聲。
咁樣以冷戰嘅方式，等自己同對方都無得再嘈落去。
佢打算就咁冷戰到聽朝十點，直到穿越時間結束為止。
「呼嚕—呼嚕—」
攤落床差唔多一粒鐘，Wendy仲未訓得著，至於訓地下嘅阿康就訓到打鼻鼾。
「呼~」午夜涼風從露台吹入屋內。
Wendy驚阿康會攝親，於是分左張被出嚟。
佢見訓唔著，就落床斟杯水飲下，又碌下電話。
佢上網揾下關於近親結婚嘅新聞，發現外國都有唔少哥哥同妹妹結婚嘅case，同埋近親生出嚟嘅小朋友，其實都唔一定係畸胎，都有機會生到正常嘅細路。
另外根據維基所講，喺美國一啲州份，例如係紐澤西州和羅德島州，當地法律都係允許近親通婚。
雖則現今社會上從不鼓吹，甚至禁止近親婚姻，但同時都有少部分嘅人，不顧倫理道德，照樣同相愛嘅親人結婚。
Wendy話就話唔想同阿康分開，只不過同時佢又唔係百分之一百肯定，自己真係接受到同親阿哥結婚，所以心情非常、非常矛盾。
而佢知道矛盾嘅唔止佢一個，仲有身邊嘅阿康。
呢刻嘅佢，開始明白點解阿康唔將佢地係兄妹嘅事講出嚟，原來明知相愛卻偏不能愛，係一件咁痛苦嘅事。
對方就係唔想佢經歷呢種痛苦。
煩惱纏繞著Wendy，搞到佢成晚都訓唔好。
佢淺睡左幾粒鐘，照早未夠八點就醒左。
阿康則仍在熟睡，佢無嘈醒對方，刷完牙就自己落街買早餐。
佢只係買左一份俾自己，畢竟雙方都算係仲冷戰緊，買埋對方嗰份就講唔通。
食早餐前，趁穿越時間未結束，佢有樣學樣，揾紙筆留低幾行字俾兩年前嘅自己。
阿康輸左三萬蚊經已係無法改變嘅事實，為左令兩年前嘅自己知道呢件事後無咁嬲，佢特登寫幾句嘢，替阿康辯解。
張字條係咁寫嘅：
「致Wendy：
你的男朋友昨天炒牛熊證，輸了三萬元，但你不要生他的氣。
因為他只是想賺多點錢，想和你早點儲夠錢結婚，所以才一時財迷心竅。
你就原諒他吧，最多就罰他扭耳仔，要他發誓以後不要玩就夠了。
一個來自未來的你上」
時針踏正九點，阿康緩緩從睡夢中醒來。
對方以一句「早晨」作試探。
Wendy將一啖通粉放入自己口中，無任何回應。
只係間中擺出不滿嘅眼神，向對方示意自己仲嬲緊。
房間一片安靜，二人沉默無聲。
Wendy希望維持冷戰狀態直到穿越時間結束，然而阿康就頂唔順呢種氣氛，卒之忍唔住開口：
「你唔出聲咁即係算點，你係咁頂我唔順又咁憎我嘅，咁你咪同我分手囉？」
Wendy聽到「分手」二字，瞳孔放大，內心感到有啲不安。
佢想開口解釋，但又忍住左，繼續保持沉默。
過左一陣，阿康等唔到Wendy出聲，於是又話：「唔好話我話你，你做女朋友嘅，好應份支持我呢個男朋友，而唔係成日喺我耳邊，叫我唔好做呢樣唔好做嗰樣，係我先忍到你咁耐，換係第個男人，早就飛左你。」
呢句係一句好難聽嘅說話，Wendy聽到就當聽唔到。
後尾唔知係咪對方都知，啱先嗰句講得太過分，好快又補多句：「其實又唔係嘅，有時有啲都係善意提醒。」
聽到阿康咁樣兜返，Wendy感受到對方嗰種言不由衷嘅無奈。
墻上嘅掛鐘顯示仲有兩分鐘就到十點， 差唔多時間要check out，同埋廿四個鐘穿越時間準備就到。
Wendy執好自己嘅行李，並將剛才寫好嘅字條放到手袋裡面。
「你…你要去邊呀？」阿康問。
「夠鐘check out。」佢望一望鐘答。
話音一落，一道刺眼強光襲來。
十幾秒後，Wendy睜開眼，見到自己回到同一間教堂。
Paula就喺隔籬，之前出左去嘅慧姨，咁啱就返入嚟間房。
慧姨一入嚟，就見到佢手上拎住，嗰本破舊嘅日記：「Wen…Wendy…你手上嗰本日記…你睇左？」
Wendy點點頭：「我想知，裡面講嗰啲嘢係咩真？仲有，點解你一路收埋本日記，唔話俾我聽？」Wendy問。
「本日記係前兩日屋企俾人爆格，俾個賊摷左出嚟，我都係比你早你兩日知呢本日記嘅存在，至於入面講嘅嘢，我相信係真嘅。」
「你地講緊本日記，係咩一回事？」Paula感受到氣氛有啲奇怪。
「無，無咩嘢。」Wendy收返本日記，「Paula，我同阿姨有啲嘢想單獨傾下，你可唔可以出去一陣？」
「嗯好呀，不過有咩都唔好傾太耐，因為婚禮就夠鐘開始。」講完Paula就離開間房。
間房得返兩個人。
慧姨行近到Wendy面前講：「既然你依家知道左，咁你都應該知道你同阿康唔…」
「我知你想講咩，但我唔想咁做，亦唔會咁做。」
「咁點得？嗰個係你阿哥，你唔可以同佢結婚。」
「但係我就係唔想同佢分開，我地一齊咁耐，感情咁好，大家都咁愛對方，點解偏偏會因為咁而要分開？」
「我理解你依家嘅心情，問題係你接受同自己個阿哥結婚咩？」
「我...我都唔知...我淨係知自己唔想同阿康分開...」Wendy抱頭懊惱。
「唔得，你…」慧姨講到一半，停左落嚟，身體靜止不動。
「噔—」四周光線忽爾消失。
半秒後，漆黑嘅環境中，照出一道白光。
Mary然後就出現眼前。