「失」婚大作戰: （十六）
當佢再睜開眼時，已發現自己唔再身處教堂，而係喺公司嘅會議室，開緊無聊嘅例會。
坐喺旁邊嘅Paula，托住個頭，都仲係好似俾人點左穴咁，郁都唔郁。
Wendy細細力拍一拍對方膊頭：「喂~」
「嗯？開完會啦。」Paula成個人扎醒左。
佢唔係定左格，只係啱先見開會咁無聊，偷偷地瞇埋眼恰一恰。
「未呀，係我有嘢想問你。」Wendy放低聲量。
「咩事呀？」
「今日係幾月幾號？」
「好似五月二十號？我都唔係好記得，淨係知道聽日係佛誕唔洗返工，你想知日曆咪開電話check下。」
「咳咳—」主持會議嘅上司睥住二人，示意佢地安靜。
Wendy偷偷地打開電話，見到個日期，發現自己真係穿越返嚟兩年前。
接下來成程會議佢都無法專心，一直喺度諗阿康係咪都穿越左返嚟同一日，同埋對方點解要返嚟呢一日。
諗諗下，兩年前嘅回憶慢慢浮現眼前，佢逐漸記得返今日會發生嘅事。
呢一日佢地喺長洲鬧左場大交，佢仲嬲到同阿康講分手。
佢心諗：唔通阿康就係想借鬧大交嘅呢一日，順水推舟同我分手？
剛才從Mary口中得知，阿康因兄妹不能通婚，但又唔忍心喺婚禮上悔婚，所以先選擇回到過去，搵一個合適嘅時間點同自己分開。
其實佢都係唔想我傷心、唔想搞亂倫，逼與無奈先咁做。
Wendy理解對方，並怨恨上天點解咁樣玩佢地。
雖然憑一本日記唔可以作準，但真係去做鑑定，萬一證實佢兩個真係兄妹，仲要白紙黑字寫到明，咁到時想唔相認都唔得，就連呃自己嘅藉口都會無埋。
佢心入面不停反問，點解「兩兄妹陰差陽錯愛上對方」呢種粵語長片橋段，會發生喺自己身上？
「喂，唔好發夢啦，夠鐘食lunch啦，樓下開左間新嘅泰國菜，我地不如今日去試下。」Paula行到Wendy座位面前講。
「樓下嗰間？我地咪食過囉，啲野好難食架喎。」
「咩呀？間野今日先開張，我地都未食過，你又知難食？」
「Er…係呀係呀，係我記錯左，記錯左第二間。」
Wendy一時忘記左自己身處兩年前，講錯左說話，好彩及時更正，佢驚講錯嘢會俾人發現係穿越者嘅身份。
Mary提醒過佢，唔可以隨便同人講亦都盡量唔好俾人發現，佢係由未來嘅時空穿梭返嚟，否則一旦俾人發現，穿越就會失效，隨即就會被送返現實。
午飯時間，佢同Paula嚟到公司樓下附近嘅泰國餐廳食lunch，而間嘢嘅食物一如所料咁難食。
「呢間嘢真係麻麻地，下次唔好嚟。」Paula表示失望。
「嗯，真係唔好幾好食。」
「你碟飯幾乎無郁過咁滯，睇嚟真係好唔啱你胃口。」
啲嘢唔好食，加上無乜心情無乜胃口，Wendy只係食左兩啖飯，剩低一大碟未郁過。
「唉…」
諗起自己同阿康嘅事，佢忍唔住歎氣。
「做咩呀你，唔好食都唔洗唉聲歎氣架？」Paula問。
「我有樣嘢想請教下你，你知唔知同同父異母嘅阿哥結婚，嚴格上嚟講算唔算係亂倫？」
「無啦啦做咩咁問？」
「無，吃飽無嘢做，求其揾啲講下。」
「我諗算掛，話曬都有血緣關係。」Paula回答。
「咁亂倫會有啲咩問題？」
「問題就大囉，一嚟違反道德，二嚟會有機會生畸胎，但係我記得你係獨生女嚟架喎，應該都無乜可能搞到亂倫啦，哈哈！」Paula開玩笑咁講。
「哈...係囉，我都係隨便八下。」Wendy苦笑一聲，「算啦，唔好講，我地埋單走啦。」
「好呀。」
二人埋完單就返公司，一路工作到五點半。
收工之後，Wendy坐車嚟到中環碼頭，準備一陣同阿康入長洲。
佢離遠見到阿康已經到左，諗緊呢個阿康係咪穿越返嚟嘅阿康？
只可惜單從外表係無法分辨。
上前同對方會合之前，佢收拾心情，叫自己盡量表現得自然啲，避免俾對方識穿。
於是，佢大步踏上前，拍拍對方嘅膊頭，帶著微笑打一聲招呼，然後好自然咁翹住對方隻手，一齊行去搭船。
喺船上，佢地如平常一樣有講有笑，入到嚟長洲都好似之前咁，行下市集影下相。
佢覺得對方都無乜異樣，舉止談吐同兩年前嘅阿康無任何分別，甚至懷疑根本係同一個人。
之後，佢地嚟到冰室坐低食碗冰，食到中途阿康突然作肚痛。
當佢推敲緊阿康究竟有無穿越到返嚟之際，檯面上嘅電話傳來短訊嘅聲音。
部電話係阿康匆忙去廁所而留低嘅。佢望左一眼，睇到肥榮同安仔發過嚟嘅短訊。
二人喺WhatsApp group講緊阿康炒牛熊輸錢嘅事，呢樣都係Wendy預計之內，令佢意外嘅係，今次輸嘅銀碼唔同左。
三萬蚊？
肥榮同安仔send message笑緊阿康輸左三萬蚊，問佢點樣同女朋友交代。
而Wendy明明記得嗰陣阿康只係輸左幾千蚊，絕對無三萬蚊咁多，除此之外，佢仲留意到放喺電話隔籬嘅銀包。
個銀包都係阿康衝住去廁所瀨低嘅。
Wendy留意到個銀包，零零捨捨突左一張黃色紙嘅角出嚟。
佢感到好奇，打開個銀包，拎張紙出嚟望下。
見到Memo紙上寫住一行字：阿康，Wendy是你同父異母的妹妹，你們不可再在一起！
三萬蚊加埋呢張紙條，基本上證明左眼前呢個阿康真係時空穿越過嚟。
阿康寫呢張紙條嘅目的都好明顯，就係想俾兩年前嘅自己睇到，當兩年前嘅阿康睇到張紙，就會同兩年前嘅Wendy分手。
Wendy當然唔想同對方分開，為左避免呢種情況發生，佢唯有做一次「小人」，dum左張紙，然後再問冰室借左空白嘅Memo紙代替。
過左一陣，阿康去完廁所返嚟，同佢一齊啟程返渡假屋。
沿路上，Wendy都無出聲，一方面係配合返之前嘅「劇本」，另一方面諗緊自己接住落嚟要點做。
按照原先嘅情況，返到去渡家屋，佢就會發難同對對方鬧交。
雙方鬧得好勁，佢實在頂唔順就提出分手。
今次返嚟佢就係唔想同對方分開，因此「分手」兩個字係唔會講。
本來佢有諗住即場拆穿阿康，因為根據Mary講嘅，只要穿越者身份一旦被發現，就會被送回現實，咁穿越嘅阿康就無得再留喺度，亦無得逼佢分手。
只不過拆穿對方就相等於「自爆」，到時連自己都會被送返現實。
問題就嚟啦，阿康玩牛熊輸左「大拿拿」三萬蚊，換著二年前嘅自己知道呢單嘢，肯定嬲到爆炸，仲係一定無得原諒、分硬手嗰種嬲，到時發生咩事就連佢都無法預計。
有見及此，Wendy選擇唔踢爆，繼續見步行步。