「失」婚大作戰: （十五）
※ ※ ※
「咁唔同你講住啦，我地陣間見啦。」
Wendy滿心期待離開阿康嘅房間，到另一間房度化妝同換衫。
仲有半個鐘，婚禮就會開始，佢呢刻心情既緊張又興奮。
臉上洋溢住幸福嘅笑容，內心已急不及待想喺牧師及咁多位親朋好友見證下，同阿康結為夫妻。
能夠同最愛嘅人結婚，佢認為係人生中一樣最幸福嘅事。
身上一件白色嘅婚紗，盛載住Wendy對婚姻嘅期盼，蘊含著愛情嘅甜蜜。
佢嘅朋友兼婚禮伴娘Paula就負責為佢化妝，同場仲有慧姨喺度幫手。
慧姨望住身穿婚紗嘅Wendy，心裡一陣心酸，佢知道陣間迎接Wendy嘅，係一場新郎哥唔會出現嘅婚禮。
「叮鈴鈴—」呢個時候，慧姨嘅電話響起。
佢聽完電話就同Wendy講：「三嬸佢地話搵唔到路上嚟教堂，我依家出去搵人帶一帶路。」
「嗯好呀。」
跟住慧姨離開左間房，而Wendy就繼續上妝。
Paula好認真咁幫緊佢畫眼線。
「哎呀，差啲唔記得左添。」Wendy忽然醒起一啲嘢。
「喂呀，你唔好亂郁啦。」
「等我一陣，等我戴返對耳環先。」
Wendy離開座位，翻弄自己嘅手袋。
「耳環？你阿媽留俾你嗰對？」Paula問。
「係呀。」
Wendy歌阿媽死得早，無留啲咩值錢嘢，淨係剩低左一對耳環。佢一直以嚟都有好好keep住，有啲咩重要場合都會拎出嚟戴。
「擺左去邊呢，揾唔到嘅？」
「會唔會係你啱先拎左出嚟？」Paula都幫手揾埋一份。
「我再揾揾。」
Wendy喺間房周圍摷左一輪，最後喺梳妝台隔籬一張櫈度揾返，過程中卻唔小心整跌左放喺側跟嘅手袋。
呢個係慧姨嘅手袋，入面啲嘢跌曬出嚟。
「哈！原來喺度。」佢戴上耳環，然後慢慢執返手袋入面嘅嘢。
就喺呢個時候，佢發現到嗰一本殘舊嘅日記同嗰張泛黃嘅合照。。
合照上有佢阿媽，仲有阿康阿爸。
佢有睇過阿康細細個時影既相，當中不乏家庭合照，所以認得出對方阿爸。
「點解阿媽會同阿康老豆一齊影相嘅？佢地識得架？」Wendy感到不可思議，隨即翻閱日記，看個究竟。
而日記嘅內容就令人更加覺得不可思議。
佢睇左幾篇，見到過身嘅母親喺日記裡面，寫左好多關於自己同一個叫Vincent嘅男人嘅事。
其中一篇係咁寫：
「九月三日，陰天。我今天去了醫院產檢，走的時候在門口遇見了Vincent。他是跟她的太太和小孩一齊來的。
他見到我隆起的肚子，露出了震驚的表情。我想他一定沒料到，我沒有聽他的說話，把胎兒打掉。他的眼神中除了驚訝，還帶著冷漠。
他只看了我一眼，然後就和我擦肩而過。他就是這樣一個無情無義的男人。
是我當初太傻才喜歡上他。不過我相信自己會好快忘記他，從今有肚裡的孩子陪我，那就足夠了。」
Wendy睇到眉頭緊皺，心諗日記入面嘅Vincent，莫非就係講緊自己嘅親生老豆？
亦即係合照中企喺阿媽隔籬，同阿康老豆餅引一樣咁嘅男人？
佢記得之前阿康間唔中都會講起自己老豆嘅事，但印象中，對方並無提及過個名。
然而，萬一真如日記中所講嘅，阿媽俾一個叫Vincent嘅男人滾大左個肚，而個男人就係阿康個老豆嘅話，咁咪代表自己同阿康一樣，都係同一個老豆生？
咁佢同阿康咪即係…兄妹？！
「本嘢寫左啲咩？做咩你睇到成個人呆曬咁嘅？」Paula拍拍Wendy個膊頭。
「無…無嘢…」呢一刻，Wendy思緒混亂。
佢再揭多幾頁睇下多幾頁，揾下有無多啲個男人嘅資料，佢好想知阿康同自己嘅親生老豆係咪同一個人。
「噔—」
突然之間，成間房變得漆黑一片。
「咩…咩事…」Wendy嚇左一跳。
「唔洗睇啦，隔籬房個新郎就係你阿哥。」
一道白光從天花板照落嚟，一個細路女食住雪糕，慢慢向住Wendy行近。
「你…你係人定係鬼…」Wendy口震震咁問。
「你好，我個名叫Mary，係呢間教堂嘅精靈。」
「教堂精靈？係咪好似以前套日劇《求婚大作戰》嗰種精靈？」
「嗯嗯，係呀。」
「乜原來電視係無呃人架，咁頭先你講咩話？」Wendy望到身旁嘅Paula成個人定左格，絲毫不動。
「我係話，你個未婚夫就係你同父異母嘅哥哥。」Mary 答話。
「哈…」Wendy忽然失聲一笑，反問Mary，「妹妹，呢個係咪大整蠱嚟架，係咪阿康搵本日記夾埋你嚟玩我？」
Mary搖搖頭：「呢個唔係惡作劇，我真係精靈，本日記亦都係真嘅，你啱先睇左咁應該都知，你阿媽同過一個叫Vincent嘅男人一齊，而個Vincent就係阿康嘅老豆，你同你未婚夫係兩兄妹。」
Wendy收起笑容，重新再翻閱一次日記。
日記上面寫嘅野幾乎都指向一個事實：佢同阿康都係同一個老豆生嘅。
而佢卻不願相信：「無可能，我同阿康點可能係兩兄妹，一定係有咩搞錯左…」
「無論你願唔願意相信都好，你未婚夫就已經接受左呢個事實，佢知道你地係兩兄妹後，為左避免同你結婚搞亂倫，家陣正嘗試穿越到過去同你分手。」
「阿康都睇過呢本日記？點解佢無同我提過嘅？」
「因為佢驚你知道左之後，會對你造成好大打擊。」
事實係呢件事帶俾嘅衝擊，確係令Wendy無所適從。
佢心入面仲等緊阿康推開門入黎，解釋呢一切都只係一場惡作劇。
「咁你提到阿康穿越過去同我分手，又係咩一回事？」Wendy追問。
Mary就將阿康時空穿越嘅事講曬出嚟。
Wendy聽完後，思緒就更加混亂，同時又好驚，擔心假如真係好似Mary所講，阿康正扭轉過去同佢分手嘅話，咁即係代表佢唔單止結唔成婚，仲將會失去對方。
佢接受唔到亂倫，但更接受唔到同阿康分開。
對佢嚟講，阿康係要同自己一生一世嘅人。
「你記唔記得半年前，你未婚夫同你講分手嘅事？」Mary問。
「我記得，嗰日我地喺一間日本餐廳度食飯，佢當住我面講分手，不過後尾我地好快就和好如初，第二日就一起返。」
「就係你未婚夫知道你地嘅真正關係後，穿越返去半年前嗰日同你講分手。」
「按你意思，當日同我講分手嗰個，係時空穿越左嘅阿康？」
「無錯，因為每次穿越只能停留二十四小時，穿越時間結束後，你未婚夫還返個身體俾半年前自己，而半年前嘅嗰個佢並唔知你係佢個妹，所以好快就嚟揾返你復合。」
Wendy聽完Mary咁講，再回想當日嘅情景，發覺講分手嘅阿康同揾佢復合嘅阿康，似乎又真係判若兩人。
而佢地已經上過床，假如真係兄妹嘅話，佢地已經亂左倫。
既然唔錯都錯左，咁不如將錯就錯，反正錯一次同錯一百次都係一樣。
呢個念頭喺Wendy腦海中，一閃而過。
「如果阿康回到過去，成功同以前嘅我分手，咁係咪代表呢個婚禮都會消失？」Wendy問Mary。
「可以咁理解。」
「咁你有無辦法阻止佢？」
「嗯？你地係兄妹嚟架喎，你咁都仲想同佢一齊？」
Wendy靜左幾秒，流露不捨嘅眼神：「我唔想失去阿康，更何況單憑一本日記其實都唔足以證明我地係兄妹。」
「嗯...你又講得有道理嘅，如果你想阻止佢，或者我可以幫到你。」Mary食埋最一啖雪糕。
「你有辦法？」
「好簡單啫，你都穿越返去同一日，唔俾你未婚夫分手成功咁咪得囉。」
Mary提議Wendy嚟一次時空穿越，阻止分手發生。
Wendy要考慮一下，而Mary就偷偷地穿過幅墻，到隔籬房偷望。
好快佢就返過嚟話：「快啲決定啦，你未婚夫準備要嚟第二次穿越。」
「咁佢要返去邊一日？」
「係兩年前你地去長洲嗰日。」Mary答。
「長洲？點解佢揀左呢日？」Wendy感到不解。
「呢啲等你穿越左先再慢慢諗，事不宜遲，我地依家開始啦。」
「咁…咁我要點樣做？」
Mary快速講解一次，雖然Wendy對於穿越嘅嘢，有啲半信半疑，但都照樣按對方嘅指示，伸手指向前方。
然後佢抖一啖氣，對住前方嗌一句：「哈利路亞 Mary chance！」
隨即一道強烈閃光撲面而來。
就係咁，佢開展左第一次時空穿梭之旅。