「失」婚大作戰: （十四）
「Ah…kimochi…Ah…」
穿越一到返嚟，就遇著自己喺度打飛機。
電腦屏幕播住小島南嘅AV，自己左手就chok下chok下咁。
而放喺電腦嗰嚟嘅手機就震個不停。
來電顯示係安仔打過嚟，無記錯嘅話，佢打過嚟係想讓聽日張Blur演唱會飛俾我。
雖然小島南好正，但呢一刻我無呢個心情打飛機，於是熄左電腦著返條褲，然後接聽安仔嘅電話。
「阿康，搞咩咁耐都唔聽電話？」安仔問。
「無，啱先較左靜音所以聽唔到。」
「我手頭上有一張Blur演唱會飛，原本我打算聽日去睇，但係頂佢個肺，我老細臨時臨急call我聽日陪佢去上海出差，仆佢個街，條友正一粉腸嚟，我期待左咁耐嘅concert，俾佢搞到我睇唔成，頂！」
「所以你打過嚟，想讓張飛俾我？」
「咁醒嘅你，係呀，張飛我就幫襯黃牛買嘅，位置大約就喺正舞台頭三排，本身洗左四千蚊買返嚟，依家我割愛平一半讓俾你，有無興趣？」
「嗯…無興趣。」
我其實都算係Blur嘅fans，嗰陣搶唔到正價飛，想買黃牛又嫌太貴，本來都以為去唔成，點知聽安仔話兩千蚊轉讓，我當堂就lur飯應。
好可惜今次為左唔同Wendy相遇，我只能無奈拒絕。
「唔係呀嘛，我記得你都幾鐘意Blur架，係咪嫌太貴？咁我蝕底啲，減多五百，千五蚊讓俾你，制唔制？」安仔割價。
「呢個唔係錢嘅問題，係我對Blur無乜興趣。」
嚴格嚟講，呢句都唔算係大話。
五年前嘅我的確係鍾意Blur呢類英倫搖滾多啲，五年過後，唔知係咪受到Wendy嘅影響，自己越嚟越偏好美式R&B。
「無理由，我明明記得你同我一樣，都係鍾意聽Blur。」安仔話。
「咁可能你係記錯左。」
「我知你諗咩，你都係嫌張飛貴啫，算啦算啦，我免費送張飛請你睇，唔好曬左張飛。」
「唔係呢個錢嘅問題…」
「得啦得啦，陣間出紅磡食串燒，順便俾張飛你，我叫左肥榮架啦，一陣間見，bye bye。」
「喂安仔…安仔？」
對方講完就收左線，我想say no都無得say。
到夜晚十點幾，我嚟到紅磡某間串燒店同佢地食宵夜。
安仔塞左張演唱會飛俾我：「聽日八點喺灣仔會展，益你去睇。」
「Er…我聽日放工好似唔得閒，應該去唔到，不如你俾張飛肥榮啦。」我以藉口推擋。
「你又無女又無剩，放工會有咩做，咪又係返屋企睇AV打飛機，咁難得唔洗錢有得睇國際知名樂隊，你咪唔好曬左張飛。」
「咩演唱會？我識唔識架？」肥榮問安仔。
「你平時聽開初音啲毒撚歌，鬼識欣賞Britpop咩。」
「初音不知幾正，係你唔識嘢。」肥榮咬住串燒，為初音辯護。
「安仔，我…」我剛開口又被打斷。
「阿康，我都大贈送送俾你睇囉，咁你咪收左佢囉，到時睇live錄幾條片過嚟睇下。」安仔堅持將門票送俾我。
對方一番好意，我拒絕到唔好意思再拒絕，最後勉為其難收左張飛。
之後我地一邊食宵夜，安仔就一邊數佢老細嘅不是，又狂呻自己好慘要出差，無得去睇演唱會，兼且再三叮囑我聽日一定要錄啲片俾佢睇。
拎左飛嘅我無諗住去，求其應兩句就算。
大家聽日都仲要返工，食到咁上下，十一點左右就散場，各自返歸。
「你返嚟啦，啱先有個女仔上門揾你。」阿媽喺客廳煲緊韓劇。
「有女仔揾我？咩女仔？」我問。
「唔識架喎，不過佢就話識得你，仲話想入屋等你返嚟，佢個樣好眉好貌，本身我都諗住開門，但最後都係唔放心俾個陌生人入嚟，所以都無開門，我見佢喺門口等你架，你見唔到咩？」
「無喎，門口無人喎。」
「咁可能俾保安趕走左，個女仔幾靚女咁，係咪你個女朋友仔嚟啫？」
「下？我聽落就似係白撞，或者係嗰啲上門呃人傳銷多啲囉。」
「但係個女仔知你個名架喎。」我阿媽對我講。
「咁佢叫咩名？」
「呢個…佢好似有講…但我唔記得左…係咪叫Sandy？」
「 拿，我就唔識得叫Sandy嘅人，如果佢陣間再揾到上門，你再叫我啦。」我不以為然，獨自返入房間。
坐喺床邊，從銀包拎出Blur嘅演唱會飛，我諗緊點樣處置呢張飛好。
去就肯定唔去，一係就上網賣左佢，只但係依家先嚟放唔知有無人買，同埋放幾多錢好。
我反覆思量左一陣，決定試下將張門票擺上網拍賣，定價三百蚊，半賣半送務求清走張飛。
結果第二朝早訓醒，打開電腦，未見到有人認購。
我感到有啲奇怪，點解三百蚊咁抵都無人買？
之後再諗深一層，會唔會就係因為定價太低，啲人以為係假嘢呃錢，所以唔敢bid？
於是我就將個價調高返到原本嘅價錢，期望收工前賣得出。
如往常一樣，食完早餐八點幾我就出門返工。
就喺等緊巴士時，我收到上司電話。
佢話我唔好返公司，直接搭車過元朗，代替佢去見個客。
係喎，呢日我要替我上司去見客。
我有啲唔願意，因為我記得個客都幾麻煩。
我喺元朗見完個客，食埋lunch再出返市區，返到公司都差唔多係下晝三點半。
「咦阿康，乜你唔係去左見客架咩？」坐喺我隔籬位嘅同事問。
「係呀，見完咪返嚟囉。」
「你知唔知朝早呢，有個靚女上嚟公司揾你，不過你就唔喺度，我仲話你今日唔返公司，叫佢唔好等添。」
「靚女？有幾靚？」我開著檯面嘅電腦。
「我諗十分都有八九分架…」
一開電腦就見到網上有人認購我張門票：「咦！有人bid左我張演唱會飛喎！」
隨即我馬上確認訂單，並且約出嚟即日交收。
「乜你條友仔都學人炒黃牛？」同事問我。
「唔係炒黃牛，係多左張飛無人要先賣啫。唔好講呢啲住，你知唔知今日阿頭係咪唔返公司？」我問。
「下？你問我我問邊個？」
隨即我獨自回想一下，記得返呢一日自己嘅上司，應該全日都唔喺公司，因此擅自提早收工，去到旺角地鐵站同對方交收。
買家約左我喺地鐵站接近B出口位置等。
我拎住門票，慢慢行到交收點。
買家已經企左喺度等，從背影睇，應該係一個女仔。我行過去say hi。
當個女仔擰轉身，我第一眼望見佢時，驚訝到講唔出說話。
「阿康？」
個買家竟然...係Wendy？！
我完全意想不到會咁樣遇見對方。
呆左幾秒後，我便轉身離開，心諗自己唔可以同對方相遇。
殊不知Wendy衝埋嚟從後面抱緊我：「阿康唔好走！唔好離開我！」
點解…點解佢會知道我個名？
「唔好走！」
佢攬得我好實，並對我講：「就算係兄妹都好，我都唔介意，我淨係想同你喺埋一齊，所以請你唔好離開我…...」