「失」婚大作戰: （八）
「輸…輸你個頭，就係你成日咒我，先搞到我輸錢。」我反過嚟怪責對方。
「我幾時咒過你，係你自己無眼光睇錯市，信埋曬你啲兄弟嘅山埃貼士，先搞到自己輸多錢！」
「你…你…」我無料到佢會咁講，一時唔識反駁。
「拿，你駁唔到，即係我無講錯啦，如果唔係我一直喺你身邊，提你唔好掂呢啲嘢，你隨時輸得仲多錢。我對你咁好，你就良心當狗肺，仲話我多管閒事，你真係正一衰人嚟架……」
Wendy繼續開火，但無論佢點鬧我都好，都始終無講出「分手」兩個字。
「...你今晚就訓地下啦！」 Wendy將床上其中一個枕頭dum落地下，跟手就熄燈訓教。
「有無搞錯？點解要我訓地下？」我表達不滿，佢就唔出聲，唔理我。
我再撩佢講嘢，佢都係對我不瞅不睬，半點不搭理。
就係咁，我地陷入左冷戰狀態。
呢種膠著嘅情況就最尷尬，對方唔肯出聲，我又唔知佢諗緊乜，想鬧想氹都無從入手，尤其係我無預計會出現呢種情況，家下都唔知點算好。
我對比返兩年前同啱先同Wendy嘈交嘅情景，諗緊自己會唔會係因為招認得太快，對方見我咁順攤認左所以就無咁嬲？
諗起頭先第二句就認左，都真係太坦率，我應該學足上次咁，一直打死都唔認，等對方嘅憤怒值去到某個位，準備要發難，叫我拎部電話對質，咁先再招供。
不過佢今次好似無睇到電話，唔會知我電話有證據，一直否認落去隨時過到骨都未定。
無諗到鬧交都咁有學問，講究天時地利，又講timing又要講技巧，我啱啱睇嚟係有啲失策。
除低手錶，臨訓前我再睇下個時間，穿越時間仲未完，話唔定Wendy訓醒發現仲係好嬲，決定開口講分手，因此都未可以咁快落定論。
到左第二日朝早。
陽光經露台朝入屋內，我揉揉雙眼，掀開張被單，漸漸從睡夢中醒來。
而Wendy已經起左身，享受緊香噴噴嘅通粉加煎蛋做早餐，不過就無預我。
我同佢講聲早晨，睇下佢仲同我冷戰緊，得出嚟嘅答案係：無錯，仍然冷戰中。
佢依然一言不發，眼掘掘咁啤住我，從眼神中宣示對我嘅憤怒。
呢種沉默令我周身唔自在，心諗Wendy真係咁憎我嘅，咁快啲講嗰兩個字趕我走。
時間逐漸流逝，眼見就嚟夠鐘，雙方仍然無言冷戰，我終於忍唔住開口：「你唔出聲咁即係算點，你係咁頂我唔順又咁憎我嘅，咁咪同我分手囉！」
「分手」兩個字，始終都係要從我口中講出。
Wendy瞪大對眼，怒目而視，嘴巴微微顫動，似想開聲又忍住左。
「唔好話我話你，你做女朋友嘅，好應份支持我呢個男朋友，而唔係成日喺我耳邊，叫我唔好做呢唔好做嗰樣，係我先忍到你咁耐，換係第個男人，早就飛左你。」
說話一出口，我就有後悔，講埋啲咁嘅嘢會唔會過份左？
Wendy無任何反應，我淆淆地補多兩句：「其實又唔係既，有時有啲都係善意提醒嘅。」
依舊無回應。
過左一陣，佢突然執齊自己嘢，準備想離開。
我就問佢：「你…你要去邊呀？」
佢淡淡然回左一句：「夠鐘check out。」
同一時候，一道強光閃現喺眼前，二十四小時嘅穿越時間已過，意味住我地嘅分手未如預期般成功。
不過唔緊要，返到現實之後，過去嘅我睇到銀包入面我所留俾佢嘅字條，會知道自己唔允許繼續同Wendy一齊，我諗到時佢會識得點做。
未等強光徹底消散，我就半閉眼睄下周圍，越睇越發覺唔對路。
再望真啲，發現自己又喺返同一間教堂，身穿同一件西裝，打緊同一條煲呔，所有嘢絲毫無改變。
雖然Wendy喺長洲無同我講到分手，但都叫做鬧左場大交，而最關鍵嘅係我留左張字條喺銀包。
佢睇到嘅話，無理由無反應，絕唔會繼續同Wendy一齊。
唔通過去嘅我無睇到張紙條？
「無可能…張紙就放喺銀包，好難見唔到架喎，咁奇怪…？」
「喂，你口噏噏喺度噏咩呀？」
Jacob失驚無神彈出嚟，我俾佢嚇左一跳：「頂你，無端端成隻攝青鬼咁閃出嚟。」
「點呀？今次想穿越返去邊一日？」Jacob問。
「仲嚟？已經衰左兩次啦喎。」
「有左上兩次經驗，呢次一定掂啦，更何況上次你都差啲成功，同埋你都無得揀啦，喺婚禮上飛起新娘，好無陰功架嘛。」
「但係兩次都唔成功…」
「♪過去你太放任，放棄愛與責任，披起婚紗我帶著傷感—」Jacob無啦啦又喺度唱歌，都唔知攞景定贈慶。
「♪穿起傷心婚紗，記掛說過愛我的你…」
「唔好唱啦，都唔知你唱乜，唱到我心都煩埋。」
「梅艷芳嘅《黑色婚紗》呀嘛，係就係冷門啲，不過就好啱Wendy聽，等你走左之後，我真係要推薦俾佢聽下。」
（我後來有專登去查過呢首歌，原來Jacob唱嘅前半句係梅艷芳嘅《傷心教堂》，後半句先係《黑色婚紗》，條友傻下傻下將兩首歌歌詞合埋一齊唱，雖然駁埋聽落都幾夾。）
Jacob繼續加鹽加醋：「眾目睽睽下喺婚禮上被人飛，呢個婚禮一定好難忘，我估Wendy呢世都唔會唔記得，從此心入面永遠有一道痛苦既疤痕。唉，♪穿起傷心婚紗…」
「好啦好啦，聽你講埋咁次，我可以再穿越多次，咁你有無能力將我帶返四年半前嘅東京？」
Jacob充滿自信咁點一點頭：「當然無問題，咁你要邊一日？」
我翻閱IG，碌左一陣，揾到一張喺日本東京影嘅櫻花相，同時睇到嗰張扭耳仔發誓，唔再玩牛熊證嘅相都仲喺度，只係上載時間唔同左。
我果然係我，果然唔會令Wendy失望。
講返呢張櫻花相，係我同Wendy拍拖半年嗰陣去東京旅行影嘅。
我相信唔少人都有旅行嗌交嗌到分手嘅經驗。
旅行係一段感情嘅煉金石，旅途上兩人朝夕相對，喺一處陌生嘅地方會遇到各種事情，過程中就好容易產生摩擦或者意見分歧，一個唔小心隨時嗌大交。
而相中嘅東京之旅就係Wendy同我嘅第一次旅行，途中我地嘈左一獲勁嘅，幾乎分手咁滯。
計翻五年嚟，我同佢淨係嗌過兩次大交，一次係炒牛熊輸錢，另一次就係呢個東京之旅。
我揀呢個日子，理由係想Wendy喺討厭我嘅情況下同我分開，而且我地相識不足一年，感情唔算深厚，揀呢個時候分開都唔會太hurt。
唯一痛惜嘅係，隨後一齊嗰四年半嘅回憶同經歷都會統統消失，不復存在。
你問我捨唔捨得，我絕對唔捨得，只係我無得唔捨得，正如我好唔捨得Wendy，但都無得唔放手。
回過頭來再諗返嗰次旅行，就覺得當下嘈嘅嘢其實好濕碎，不外乎都係意見不合嗰類。
例如係我鐘意hea住玩，佢鐘意計劃好曬逐個地方趕行程，我想佢陪我秋葉原，佢就想我陪shopping買衫，又或者佢將酒店book錯左做民宿，我就帶錯路等等無傷大雅嘅事。
有樣嘢值得提一提，嗰次旅行我以為有得搞嘢，無估到佢係一個好虔誠嘅基督徒，連掂都唔俾掂，個心暗啞底有啲唔爽（家陣諗返就係另一種感覺），因而對我嘅情緒可能都有些少影響。
至於鬧交嘅導火線亦係一件好普通、好普通嘅事，就係佢電話無電，問我借「尿袋」。
咁啱我用緊嚟叉電，就話唔借俾佢用，佢向我呻左兩句，我又多口駁左幾句，之後漸漸演變成嗌交，彼此都藉機將積壓喺心目中嘅不滿同怨言，一次過發洩出嚟。
鬧到大家都講到要分手，要從此一拍兩散咁滯，直頭我兩個分開左半日，各自各旅行。
後尾唔知係咪緣分所致，我地喺某個河畔，於櫻花樹下重遇。
雙方都好似心有靈犀咁，朝早分開左，到黃昏卻又不約而同，嚟到同一個地方睇櫻花。
就喺櫻花飄絮嘅環境下，我地雙方冰釋前嫌，好快就下左啖氣，之後揾個地方坐低，平心靜氣，用對話同溝通解決左分歧。
其實，拍拖嘅嘢不外乎就係你遷就下我，我遷就下你，同埋平時就唔好將啲嘢積積埋埋，有不滿就直接講出嚟，最好一齊傾一齊去改，呢啲都係我兩個喺嗰次旅行中所領悟嘅相處之道。
IG嘅呢幅櫻花相就係紀念我地嘅和好如初。
然而，再返去一次嘅話，我會選擇直接坐飛機返香港，唔會再出現櫻花樹下嘅和解。