「失」婚大作戰: （七）
下午六點。
放工之後，我嚟到中環碼頭。
聽日禮拜五係佛誕，我同Wendy趁住有假，約好左一齊入長洲，享受一個兩日一夜嘅小假期。
「咁早到左嘅？」Wendy拍一拍我膊頭，出現喺我身後。
佢上身著住灰色恤衫，下身係黑色短裙同粉紅色平底鞋，陪襯得簡單得體。
「見公司無乜嘢做，咪早啲收工早啲到。」我答。
「哈哈，我仲驚自己早左到要等你添，咁事不宜遲，快啲上船啦，遲左又要等下一班架啦。」Wendy挨近我，翹住我隻手行。
18:45有一班船，本來應該趕得切，偏偏排隊入閘嘅時候，前面有條友搞左好耐都入唔到閘，拖延左一啲時間，令到我地錯過班船，又要等下一班。
上一次就係我遲到，導致上唔到18：45分呢班船，今次就入閘有阻滯而趕唔到，兩次結果都一樣，都係上唔到嗰班船。
呢個唔係一個好嘅兆頭。
入到長洲，我地先到海邊度假屋check-in，跟住出去市集行下逛下，又嚟到文青打卡地點長洲冰室，坐低食杯冰。
呢間冰室係一個好關鍵嘅地方，想當日我嗌左芒果冰，食完就即刻絞腸痧，急住去廁所而賴低電話喺檯面，好衰唔衰我兩個friend咁啱喺WhatsApp group度講起，我朝早炒牛熊輸錢嘅事。
Wendy一個唔覺意，就睇到曬電話彈出嚟嘅對話通知。
到我去完廁所返嚟就見到佢黑曬口面，之後仲全程都嬲爆爆唔出聲，直到返去酒店先「嚟料」。
而呢次實行要「案件重演」。
我照樣嗌左杯芒果杯，食左兩啖詐肚痛，仲有意無意將電話留低喺當眼位置。
大約十分鐘後，我去完廁所，施施然返到座位。
驟眼一望，已經發覺Wendy臉色有啲唔妥，再偷偷地望下電話，嗰兩個死仔果然喺group chat笑我輸左三皮。
回程路上，Wendy似上次咁粒聲唔出，我詐假意問佢：「Wendy，咁咩突然咁靜唔出聲嘅？」
Wendy無應我，好似扮聽唔到咁，繼續唔出聲。
我諗佢依家一定係鬱埋度氣，等緊陣間一次過爆出嚟。
照咁睇，事情似乎正向預期之中發展。
我地慢慢行返度假屋，上到房Wendy就攤上床呻攰，又話想沖個熱水涼relax一下：「阿康，你未咁快沖涼住架嘛，咁就讓俾我沖先啦。」
沖涼？呢個時候佢唔係應該劈頭第一句，問我係咪炒股輸左錢架咩？
「Er…Wendy…你唔係有嘢想同我講咩…？」 我問。
「嗯？我有咩想講呀？」Wendy反問返我。
「……」
我答唔上話，心諗點解會咁嘅，唔通佢無睇到我電話顯示WhatsApp嘅對話通知？
「做咩呆左唔出聲嘅你？」
「無…無嘢…」
「無嘢咁我去沖涼先啦。」 Wendy拎左一套黑色lace邊絲質睡衣作更換。
每次我地兩個喺出面過夜，都會做啲男女間嘅親密接觸。Wendy由於係虔誠教徒，因此呢度嘅親密接觸並唔係指「啪啪啪」，而係指佢用手幫我解決。
如果係咁就麻煩，Wendy唔同我嘈交分手不得止，仲有做啲親密行為，咁樣完全係同原先嘅計劃背道而馳。
睇嚟今次，我要「自投羅網」先得...
間房有一個望到海嘅細露台，我喺沖涼房外一聽到水聲停左，就快快脆行到露台扮講電話。
「噠—」我聽到開門聲，Wendy慢慢從沖涼房行出嚟。
喺露台嘅我隨即擰轉身，舉起電話：「安仔，下個禮拜個市點睇呀？升定跌？」
「……」
我停兩秒，假裝聽緊有人喺電話講嘢，隨後有意無意提高聲量： 「個市咁樣仲有得跌？拿安仔，呢鋪我真係信曬你架啦，你知啦，我今日先輸左三皮嘢，翻身就真係睇呢鋪架啦…」
講到自己輸左三皮嗰陣，我特登擰轉身，營造一個當場被斷正嘅場面。
果然，Wendy著住黑色睡衣企喺後面，聽到曬我講嘅嘢。
我放低電話，故作震驚：「Wendy…你聽到曬…?」
Wendy呆呆望左我幾秒，然後問：「阿康，你喺電話同人講輸左三萬蚊，係咩一回事？唔好話我聽，你又學人炒牛熊啊下？」
我本來打算第一時間如實招認，卻又諗到正常人做錯嘢，唔會咁快就坦白，於是就答話：「無，唔係我輸錢，係安仔條友今日炒股輸左三萬銀，打過嚟同我呻苦啫。」
「啱先我明明係聽到，你係講緊自己今日輸左三萬，你唔好呃我喎，快啲同我從實招來，究竟你係咪炒牛熊輸左錢？」
「你應承我聽完唔好嬲呀？」
「你肯定坦白我就唔嬲。」
聽到對方講呢句說話我就放心啦，皆因女人次次講自己唔會嬲，最尾都係會好嬲。
我從陽台慢慢行返入屋，坦白招供：「件事係咁嘅，我見之前炒牛熊輸左筆錢，一直都唔甘心，成日都好想贏返嚟啲錢，咁啱遇著前幾日港股連跌，一心以為今日有得谷底反彈，所以咪膽粗粗，攞三皮出嚟博番鋪囉。」
「結果呢？賺定蝕呀？」
我舉起三隻手指：「輸左三皮。」
「咩話？咁咪即係輸清光？林家康，你記唔記得之前應承過我嘅嘢？你講過以後都唔會再掂牛熊證呢啲投機炒賣嘅嘢，但係今日你又走去玩，仲輸曬啲錢，有無離譜啲呀你！」Wendy氣上心頭。
「咁我只不過係想賺返之前輸嘅錢啫，點估到咁黑仔輸曬三皮嘢啫，我都唔想架。」我為自己辯解。
「依家最大嘅問題唔係你輸左三萬蚊，而係你無口齒！之前你炒牛熊加加埋埋輸左萬幾蚊，你當住我面，應承過我話以後都唔會再掂呢味嘢，點知轉過頭你又走去玩？身為男人，你講嘢點可以咁唔算數架？」
雖然我預左俾Wendy鬧，但聽到咁嘅說話，個心都有啲唔爽。
「咁對唔住囉，三萬蚊唔輸都輸左囉，最多咪以後唔玩囉，不過其實就算輸，都係輸我自己啲錢，你理咁多做咩啫？」
呢句係一句難聽嘅說話，第一次講我係意氣用事，唔小心衝口而出，而呢一次卻係明知故犯。
有時情侶間嘅鬧交，本身可能只係為左啲小事嗌霎下，過程中萬一其中一方唔小心講左一兩句好難聽嘅說話，另一方聽見又唔忿氣駁兩句，嘈嘈下好容易由小鬧變大吵，甚至演變成分手收場。
Wendy嬲到塊臉都開始變紅：「好！既然你唔咁想我理，咁我咪以後都唔理你囉！當初又係你自己實牙實齒話唔會亂洗錢，要同我一齊儲錢買樓結婚，結果就係拎啲錢亂咁炒。」
「你鋪話法呀，我炒股贏到錢嘅話，咁我地咪早啲儲夠錢早啲『上車』囉！」
「最弊你玩嗰啲衍生工具，只係投機賭博，係倒錢落海，而唔係投資。」Wendy反駁。
「你知唔知咩係富貴險中求，牛熊證風險高但回報大，咁賺得先夠多，你明唔明呀？」
「明呀，你鐘意嘅咪繼續玩，繼續輸錢囉，總之以後你啲嘢我都唔會再理，你依家安樂曬啦，林家康？！」
「係就最好啦！唔好到時反口覆舌，有口話人無口話自己！」
劇集入面啲男主角，為左取得女主角嘅歡心，千辛萬苦咁回到過去，就係想糾正自己曾經講錯嘅說話或者做錯嘅事，我就係啱啱相反，有啲說話明知講出嚟會瀨嘢，但我都要重複再講一次。
Wendy雙眼通紅，下一句佢就會對住我講分手，然後趕埋我出門口。
我憤然離開，當自己一個喺出面冷靜落嚟，發覺自己啱先說話講得太重，想返去講對唔住氹返對方，咁啱個天就刮起狂風暴雨。
我匿喺大樹下避雨，另一邊廂嘅Wendy擔心我會俾雨dup，專程擔遮出嚟揾我。
後來我地兩個返到度假屋，我真誠致歉，並請求對方原諒，最後差唔多氹左成晚，先氹到對方肯原諒我。
然而，以上呢個劇情將會出現改動。今次我打算俾Wendy趕走後，直接坐最後一班船離開長洲，唔會返去氹返對方。
Wendy怒氣衝天，講左句：「哼！既然你咁唔想我理你，咁我咪唔理囉，有本事你就繼續玩，我睇下幾時輸死你！」
？
Wendy呢句唔係應該講：「好，林家康，你驚我反口呀嘛？既然你咁驚，咁我地就分手啦，咁我以後都唔會再理你，你鐘意點就點，你嘅事以後都唔關我事！依家即刻同我消失，快啲走，我唔想再見到你，衰人！」架咩？
唔通我講漏左邊句嗌交嘅說話，所以未觸發到佢講分手？定還是啱先語氣唔夠重？
唉，都唔得理得多，唯有繼續撐到恆。