「失」婚大作戰: （六）

而兩隻精靈無端端喺我諗緊嘢時嗌交。

「Jacob，今次輪到我啦掛。」

「下？點解？」

「因為你應承左之後嗰兩次都係輪返我囉。」

「係呀，問題係次次我地都係一人一個case咁做，呢次個case都未完，咁都會輪到你？」





「唔係呀嘛？乜係咁計架咩？」

「係呀，你等下次啦。」

「唔得，你點可以咁奸茅！」Mary不服氣。

「無得唔得，總之今次都係我幫佢穿越，穿越時數以都係歸我，所以呢度無你嘅事，你唔好喺度阻手阻腳啦。」Jacob趕Mary走。

Mary十分不爽咁「哼」左一聲，然後就喺房間消失：「Jacob，食屎啦你！」





家下成間房得返我同Jacob。

「點呀？諗到今次要回到過去邊一日未？」Jacob行近我身邊問。

啱先佢兩條友喺度嘈喧巴閉，搞到集中唔到精神，諗極都諗唔到揀邊一日好。

「仲未諗到？有無咁難諗呀…」

「Shh—你唔好嘈住！」我叫對方收聲，想安靜地思考多一陣。





秒針轉左兩圈，兩分鐘之後，我終於諗到要返去邊一日。

我打開IG，展示兩年前嘅一個po，相中嘅我對天舉起三隻手指，擺出懺悔求饒嘅表情，下面留左句Caption：

「本人林家康發誓並承諾以後都唔會再炒牛熊證，如有再犯就將本人每月人工全數交給Wendy保管，今以此po為證。」

兩年前我沉迷玩牛熊，輸左唔少錢，Wendy見我屢勸不改，最後忍唔住同我炒大獲，仲提出分手。

我仲記得自己氹左好耐，先氹到對方原諒我。

呢張相就係我好不容易氹返對方後，對方要求影相為證所拍攝的。

我揀返去呢一日嘅原因就係與其自己開口講分手，不如由對方講分手。

一嚟我唔洗做hurt人嗰個，二嚟嗰陣我地關係都算幾差，揀喺嗰個時候分開應該會比較順利，對Wendy所造成嘅傷害照計都會比較低。





「係呢一日啦嘛？」Jacob確認一眼我揀好嘅日子。

「無錯，係呢一日。」

「咁準備好就嚟啦。」Jacob伸手指向前，指定動作。

我照住佢嘅pose，好似上一次咁對住前面大嗌一句：「哈利路亞 Jacob CHANCE！」

眨眼之間，我就時空穿梭回到兩年前。

刺眼嘅強光慢慢消退，我睜開眼發現自己正匿埋喺公司廁所，拎住電話坐喺屎塔上。

電話屏幕上一片紅光，正顯示恆生指數全線下跌，累積已跌超過四百點。





在此之前恆指連跌三日，我一心諗住博反彈，賺返之前輸左嘅錢，加上信左兩個friend肥榮同安仔嘅所謂技術分析，於是我就買左三萬蚊「牛」。

殊不知低處未算低，開市半個鐘股市突然狂瀉。

短短幾分鐘我就蝕左幾千銀，再跌落去成個牛證就會被強制收回，到時就連渣都無。

牛熊證嘅玩法就同賭大細差唔多，只要估中升跌就贏錢，本小利大但同時風險好高。因為如果跌或升到某個收回價，咁牛熊證就會被收回，無曬啲錢，亦即係俗稱嘅「打靶」。

我匿入厠格目的就係想冷靜一下，喺我印象中個市會繼續跌，而嗰陣嘅我係賣左止蝕，都勉強叫做輸少當贏。

至於今次我打算唔放，蝕到渣都無為止，等到Wendy發現我又瞞住佢炒牛熊，仲輸左咁多錢，個憤怒值肯定會更加高。

當佢咁嬲我，就會提出分手，而且會更加決絕。

最好真係一刀兩斷，咁先防止到往後嘅事發生，譬如係結婚嘅事，或上床嘅事。





一如所料，恆指中午過後跌幅擴大，收市合同跌左千幾點，結果我嗰三萬蚊「全軍覆沒」，「斗零」都無剩。

對比兩年前我輸左幾千蚊，心有不甘又驚Wendy發現，現在嘅我稱得上係心如止水，波瀾不驚。

另外，經過上一次嘅教訓，我今次都學精左。

我喺自己位揾嚟一張Memo紙，喺上面寫上：阿康，Wendy是你同父異母的妹妹，你們不能再繼續在一起！

然後就將memo紙攝入銀包，到我同Wendy分手，返到去現實之後，過去嘅我就算想追返Wendy，只要見到呢張紙就會馬上打消念頭。

我將張紙盡量攝出啲，等佢容易啲發現。

林家康，希望當你睇到呢張紙，會決心斬攬，中止呢場「禁斷之戀」。