「失」婚大作戰: （五）
我吞一啖口水，神情保持嚴肅：「我唔係講笑，食埋呢餐飯後，我地以後都唔好再見。」
Wendy收起剛才嘅笑容，望住我問：「你真係講真？」
「係，我真係要同你分手。」我語氣堅定。
佢瞪大眼，露出錯愕嘅表情：「喂呀，阿康，唔好拎呢啲嘢嚟講笑啦…」
「我唔係講笑，我再講一次，我要同你分手！」我再用極肯定嘅態度同佢講。
每講出一個字，我個心就好似俾刀割左一下。
Wendy嘴巴顫抖，講唔出任何說話，驚恐嘅表情話緊俾我聽，佢不敢相信自己所聽到嘅說話。
「對唔住，我唔可以繼續同你喺埋一齊，我知一時間你好難接受...」我為此抱歉。
「點解？我地喺埋一齊好地地，點解你突然要分手？係咪我做錯左啲咩，令到你唔高興？」對方打斷我嘅說話，情緒亦開始波動。
「唔係你問題，係我嘅問題。係我對你嘅感覺已經變左，已經唔再鐘意你。」嘴裡講出違心嘅說話，雙眼唔敢直視對方。
「無可能…你明明話過會愛我一生一世…你無可能就咁『dum』低我架…」
Wendy講講下，忍唔住喊左出嚟，透明淚珠不斷從眼角流下來。
見到佢咁樣，我個心真係好痛，痛到幾乎讓我窒息。
但係我無得心軟，喺呢個時間分手，總好過臨結婚先嚟分開，後者只會令佢傷多幾錢重。
「呢隻錶係你送俾我嘅，我依家還返俾你。」我將手上嘅手錶除落嚟，準備動身離開。
呢隻錶係對方送俾我嘅生日禮物，我一直都好鐘意，每日都會戴喺手上。
Wendy衝過嚟，捉住我隻手唔俾我走：「阿康…唔好走…係咪…你係咪因為我一直唔肯俾你…所以…你...」
「唔關事！問題唔喺你身上，係我對你無左嗰種愛嘅感覺。」
「我地喺埋一齊好地地...你點會咁突然...話唔愛就唔愛...」Wendy捉到我好實，唔肯放手。
我感覺自己都有眼淚想湧出嚟，於是立即擰歪臉，唔俾對方見到。
Wendy嘅苦苦哀求令我好想留低，但係我唔可以超越道德倫理嘅界線，只能狠下心腸。
我用力一下「fing」甩佢隻手，並快步行出包廂。
行出門口一刻嘅同時，淚腺失控，眼淚偷偷流出嚟。
Wendy，對唔住。我寧願你依家因我嘅「變心」而痛心難過，都唔想臨到結婚你先見唔到新郎，更唔想你知道我地真正嘅關係。
到時嗰種相愛不能愛嘅感覺，只會比依家更加痛苦。而我好了解呢種痛苦，因為呢刻嘅我正經歷緊。
我一邊抹走不斷湧出嘅淚水，一邊行出店鋪。
記得Jacob話過一次穿越可以留二十四個鐘，計翻時間，都差唔多夠鐘。
估計到我再睜開眼嘅時候，自己唔會再係喺教堂。
我習慣性地看一眼手錶，卻唔記得左隻錶啱啱已歸還俾Wendy。
左手手腕上咩都無，想睇時間都無得睇。
就喺呢時候，一道強光射埋嚟，我下意識擋住雙眼。
十幾秒過後，強光才消退。
我慢慢睜開雙眼，第一眼見到嘅，竟然手腕上Wendy送俾我嘅手錶，再望望自己身處嘅地方。
教堂？
點解我又返翻嚟同一間教堂？
無理由架，我明明無求到婚，因咩解究仲喺度？
唔通係眼花？
我捽一捽眼，忽然個頭一陣暈陀陀。與此同時，腦海浮現一啲奇怪而又好真實嘅畫面。
畫面中，我全身濕透，好大力喺度拍門，嘴裡嗌住Wendy個名。
一陣之後，雙眼通紅嘅Wendy打開門。
我好緊張咁問佢：「Wendy，發生咩事？我打俾你咁多次，做咩你唔聽我電話？」。
Wendy撲向我懷抱，伏喺我心口度大喊，然後主動錫埋嚟。
我開頭未反應得切，後尾就慢慢同佢越錫越激，由門口錫到入房，錫下錫下，對方剝掉自己身上嘅衫褲…
之後…我地兩個仲…上左床？！
What the fuck！
以上畫面俾我嘅感覺都非常之真實：Wendy溫暖嘅體溫、急速嘅呼吸聲同埋柔軟嘅胸部，全部都好似曾經親身感受過一樣。
仲有，點解我仲會出現喺教堂，兼且身上著住穿越前同一套西裝、皮鞋，以及Wendy揀俾我嘅煲呔？
會唔會係嗰兩隻精靈呃我？所謂嘅穿越只係幻覺？
「唔係幻覺，你的確穿越左。」身後傳來Jacob嘅聲音。
房間又再次變得漆黑一片，一道白光照射由天花板照落嚟。
只見兩隻精靈食住雪糕，坐喺梳妝台前。
「你兩條友喺度就啱啦，你又話我真係穿越左，咁點解我仲喺度，我明明無求婚架？」
「你有，試下再諗真啲。」Jacob答我話。
「咪玩啦，我連結婚戒指都無攞，乜都無做，幾時有求…」說話講到一半，腦海又浮現一啲畫面。
係我向Wendy求婚嘅畫面。
我馬上打開IG，真係揾到一張求婚相。
同樣嘅餐廳，同樣嘅戒指，同樣嘅幸福笑容，唯一就只係個日期唔同左。
由三月十號變左做三月十一號。
另外，個post下面仲多左句caption：
俾鬼迷，分了手，俾佢@WendyC.c.迷，求了婚。無論如何，從今以後，就是一生一世。
Jacob無講錯，我真係有求到婚。
我返去珠寶店，取回嗰原本嘅求婚戒指，重新預訂嗰間高級西餐廳，喺浪漫嘅小提琴聲下，我跪喺度向Wendy求婚。
情景幾乎同之前嘅一模一樣。
「點解會咁嘅…」我疑惑不解。
「因為二十四個鐘穿越時間過左，你返嚟現實後，過去嘅你就又變返原本嘅嗰一個你，當時你並唔知道Wendy嘅身世，而且深深愛著Wendy，認定對方係你託付終身嘅另一半。」Jacob食住雪糕解釋。
「所以，穿越嘅你就算無求到婚，甚至講左分手，但過去嘅你都照樣揾返Wendy，再一次求婚。」
「唔單止係咁…我…仲同左…Wendy上左床…」我不敢相信。
「呢樣就怪你分手嗰陣講得唔清唔楚，搞到Wendy以為你係介意佢唔同你『咩咩』，於是為左箍煲咪主動獻身，再加上做完嗰樣嘢你又真係同返佢一齊，成件事就演變成因為你條友鹹濕，因為得唔到人地嘅肉體而講分手。」Mary對我講。
上完床第二日就求婚，鹹濕得嚟仲好負責任...
我無法接受，拼命叫自己唔再回想嗰啲畫面：「頂…點會咁架…我點會同左自己個妹上床…」
「算啦，唔做都做左，由佢啦。」Jacob安慰我。
「算？亂倫喎？求下你幫我再穿越多次，今次我一定唔會俾自己同Wendy上床。」
「一個時間點只得一次機會，我可以再幫你穿越，但就無辦法幫你返去同一日。」Jacob答。
「唔係呀嘛，咁即係無得挽（救）？」
「有得挽，你可以返去再早啲時間點架嘛，假如可以再早啲嘅日子同你未婚妻分開，咁咪唔會出現之後嗰啲事囉，包括你地上床單嘢。」
Jacob提議我穿越返到比求婚更早嘅時間點。咁既話，所選擇嘅時間點一定要令到我同Wendy徹底「斬攬」，只要咁先可以杜絕往後嘅事發生。
我決定再穿越一次，咁應該返去邊一日好？
我托頭認真尋思。