「失」婚大作戰: （四）

喺出面茶記食個飯，我就返屋企。

入到門口，我阿媽行埋嚟話：「阿康，你返得嚟啱啦，屋企個上網又壞左啦，我睇劇睇到一半無左畫面，你快啲幫手搞搞佢。」

「應該係條線鬆左啫。」

我行埋router度插返緊條線，再重新開機，一陣之後，屋企又有返WiFi。

阿媽拎住iPad，睇得返韓劇：「阿仔好嘢喎，咁快就整返好個上網。」





仲記得之前第一次搞，我都整左好耐都整唔好，今次知道問題所在，結果一下就搞掂。

「阿媽，你日日喺度煲劇，唔悶架咩？」

「悶呀，咁你快啲同Wendy結婚，跟住生個孫俾我玩，咁我咪唔洗日日睇劇咁無聊囉。」

換轉係之前嘅我，肯定第一時間就答好，依家呢個我只有無言以對。

「唔出聲即係你同Wendy唔打算生小朋友？」





「Er…都唔係嘅…」

「咁就快啲生個俾我湊啦！」

我無正面回應，直接轉移話題：「阿媽我想問下，好耐以前有段時間，你經常同老豆嘈交，係咪因為你發現老豆喺出面搞三搞四？」

阿媽面色一沉：「嗯？無端白事做咩摷返陳年舊事出嚟講？」

「無…無咩，隨口問下姐。」





「咁耐嘅嘢我都唔記得，你沖完涼早啲訓，我入房煲劇先。」阿媽返入自己間房。

雖然佢唔肯答，但其實我隱約記得老豆仲喺度嗰陣，屋企每隔一排就會家嘈屋閉。

細細個嘅我有時都會偷聽到佢地鬧交嘅內容，阿媽每次都好似係因為發現左老豆偷食而嘈交。

假如俾阿媽知道左，Wendy係阿爸滾大其他女人個肚所生嘅，唔知會有咩反應。

最低限度肯定唔會講得出，啱先嗰啲叫我同Wendy結婚生仔嘅說話。

沖完涼我就返房，攝高枕頭諗下聽日點樣講分手。

然而我其實並唔擅長講分手。

真話就絕對唔講得，一係用啲最常用嘅理由，例如係「感情淡左」、「性格不合」、「我配唔起你」等等。





我一整晚訓喺床上，不斷構思分手要講說話，腦海中模擬分手嘅場景，將會係一個折磨痛苦既時刻。

到左第二日，我打電話book過第二間餐廳，約好Wendy晚上七點去食飯。

幾名好熟嘅朋友都紛紛喺WhatsApp group中，祝我求婚成功。

我只係覆左個微笑表情，敷衍回應。

嚟到傍晚六點。我提早出門，開車到Wendy屋企樓下接佢。

佢今日精心打扮，米白色長裙搭配平底鞋，散發著清新可愛嘅氣息。

上到車佢笑笑口咁問我：「我地陣間去邊度食飯呀？」





「去到你咪知。」我也笑一笑回應。

喺車上我地依然同平時一樣有講有笑。佢嘅笑係出自真心，笑容之中帶著愛意，而我嘅笑卻只係強顏歡笑。

呢刻嘅佢仲未知道陣間嗰餐飯，係我地最後嘅晚餐。

我特登將架車揸得好慢，好慢，只想好好享受我地兩個最後一程路。
 
半個鐘後，我地嚟到一間日本餐廳。

呢間餐廳我地好耐之前嚟過一次，食物味道都ok嘅，最主要我係貪呢度啲獨立包廂隔音好，加上鋪頭會一直播住一啲柔和嘅日系音樂。

陣間分手時，雙方情緒如有咩波動，起碼仲有啲音樂嚟平靜下心情。

「呢舊拖羅好正呀，你試下。」Wendy將一舊肥美嘅拖羅壽司，餵到我嘴邊。





我張開口接收送到面前嘅壽司。

「好唔好味呀？」

「嗯，好味。」我一邊咀嚼一邊回答。

「哈哈，咁不如再試下呢舊海膽，我覺得都幾正。」對方又將一舊海膽送入我口中。

事實係，我滿腦子都係諗緊講分手嘅事，根本食龍肉都無味。

本身我打算等到食飽飯先「攤牌」，不過餐飯食到一半，Wendy已察覺到我成晚心不在焉。

佢放低筷子，一臉正經問：「阿康，你今日好似有啲奇怪，係咪唔開心？定係有心事？」





唔知係咪女人特別識睇眉頭眼額，直覺可能又特別準，我都已經盡量掩飾，扮到若無其事咁食呢餐飯，結果都係俾Wendy睇穿。

分手嘅說話難以啟齒，可惜我無得揀，現實世界同二次元或者AV嘅世界唔一樣，哥哥同妹妹唔得喺埋一齊。

琴日我諗過點開口講分手，但係到左真正要開口嘅時候，說話嚟到嘴邊卻又講唔到。

我放下筷子，抹一抹嘴，又飲一啖熱茶，拖延少少時間，喚起要講嘅說話。

沒料到，短短一句「Wendy，我要同你分手」，竟比想象之中更難開口。

「阿康？你有嘢要講？」Wendy追問。

林家康，你地係兄妹，你同佢唔可以再一齊，開口講分手啦。

我喺心入面不斷催促自己。

包廂內沉默無聲，而我內心獨自嘅掙扎，卻鬧得沸沸揚揚。

大約兩分鐘過後，我糾結一輪，好唔容易，終於鼓起勇氣開口。

「Wendy…我…我...」

頂...講到一半又講唔到落去…

Wendy用迷惑嘅眼神望住我，等待我繼續講落去。

林家康，唔好拖拖拉拉，講出嚟啦。

最後，我大啖吸一口氣，一鼓作氣，一口氣講左出嚟：「Wendy我想要同你分手！」

Wendy聽到我講分手，眉心一緊，眼神略過一絲驚訝。

兩秒之後，又失聲一笑：「哈哈，講咩呀你，今日又唔係四月一號，做咩開啲咁嘅玩笑整蠱我？」