「失」婚大作戰: （三）
「點呀？個婚禮就開始啦，你係咪要穿越回到過去架，係就快啲開始啦。」Jacob催促。
我望一望手錶，距離婚禮仲剩半個鐘左右。
好啦，唔理咁多，就信呢兩條友一次，係咪真係時空穿越到，反正只要試一次就知。
係咁嘅話就採用佢兩個嘅提議，試下回到求婚嘅嗰一日。
我打開IG展示半年前我求婚成功嘅相片：「咁就麻煩你帶我返去呢一日。」
照片中，我同Wendy十指緊扣，佢戴上我送俾佢嘅求婚戒指，滿臉幸福笑意，而相嘅背景係一間高級西餐廳。
呢個係我同Wendy共用嘅賬戶，裡面記錄左我地之間好多點點滴滴。
Jacob拎起我部電話，仔細望一眼：「你確定係呢一日啦嗎？」
我點一點頭，表示肯定。
「既然你決定左，咁就企定定個人，伸手指住前面，之後大嗌一聲『哈利路亞Jacob chance』…」
「等等，」Mary突然「站亂歌柄」，「Jacob，我啱啱醒起，對上嗰次都係你幫人穿越，計翻今次應該輪到我先啱喎。」
「上次係幫人求婚，今次係幫人失婚，個case都唔一樣，所以呢次都係我嚟。」
「搞錯呀，講到明輪流一人一個case架嘛，你攞曬我啲穿越時數，咁我點算呀？」Mary。
「得啦，之後兩次全部俾你咪得囉，ok？」
「拿，係你話架，你唔好反口呀！」
「得啦…」Jacob敷衍答應。
我喺隔籬聽到一舊雲：「你兩個講緊咩穿越時數？」
「其實我地兩個暫時只係實習精靈，要儲夠一定嘅穿越時數，先能夠成為正式嘅教堂精靈。」Jacob答。
「實習精靈同正式嘅有咩分別？」我好奇咁追問。
「正式成為教堂精靈之後，到時就會有好多雪糕食，哈哈！」Mary露出一副為食樣。
「你條友淨係識得食，人地都唔係問呢樣，」
Jacob對我解釋話：「實習同正式最大分別就係，我地實習精靈每次只可以幫人穿越二十四小時，換句話講，即係每次你回到過去，都只可以喺嗰度逗留二十四小時。正式精靈就能夠幫你留耐啲。」
「哦~原來係咁。」
「你係返去『甩拖』，又唔係追女，二十四個鐘夠你用有突架啦。」Jacob同我講。
「係？」
「唔好講咁多啦，事不宜遲，快開始啦。」
我伸前隻手，指住前方，正準備開口之際，Jacob又嗌停：「Sorry，差啲唔記得提醒你，你返到過去後，千其唔好話俾人聽你穿越嘅事，因為一旦俾人發現你係嚟自未來，咁就代表你穿越失敗，就會即刻被送返嚟現實，因此你最好掩飾自己係穿越者嘅身份，盡量唔好俾人發現。」
「明白，仲有無其他要注意嘅地方，有就一次過講埋。」我問。
「無啦。」
「咁我開始啦。」
Jacob做出「OK」嘅手勢。
我深呼吸一口氣，腦袋諗住要返去嘅日子，再按照Jacob嘅指示，擺好個pose，大聲嗌一句：
「哈利路亞 Jacob CHANCE！」
隨即一道強光射埋嚟，掁（音：殘）到我擘唔開雙眼。
道光維持左約莫十五秒，而當我再次打開眼，已發現眼前嘅光景唔同左。
由早上嘅教堂，轉換成夜晚嘅街道。
我望望四周，眼見自己身處喺人來人往嘅紅磡天橋，左手拎住電話，右手拎住公文袋。
我放低公文袋，用力搣一下自己塊臉，feel到痛痛地，咁即係代表唔係發緊夢。
暫時照咁睇，自己好似真係穿越左...
「喂？阿康？」手上嘅電話傳來Wendy嘅聲音。
「係，我喺度，做咩呀？」
「我問你做咩先啱呀，打左過嚟又唔出聲。」
「……」我一時未反應過嚟，唔知講咩好。
「喂？你嗰邊係咪聽得唔清？」Wendy問。
「Er…Wendy…我想問下…今日喺幾月幾號？」
「今日咪三月九號囉，你唔係特登打過嚟，問我今日幾多號呀嘛？」
三月九號？咦，呢日咪就係我求婚嘅前一日。
咁我記得啦，呢一日係星期五，依家嘅我應該係啱啱收工，準備要去珠寶店拎求婚戒指，我打俾Wendy係想提佢聽日我約左佢食飯。
「做咩又靜左嘅？你電話收得唔好呀？」
「Sorry，啱先好似收得唔好，依家聽得清啦。」我清清喉嚨，繼續講，「我地聽晚約左食飯，我驚你唔記得，咪打過嚟提下你。」
「你唔好當我咁無記性先得架，前日提一次琴日提一次，今日又提一次，我記得架啦，聽日一齊食飯呀嘛，長氣~」
「Er...係呀，你記得就好。」
「好啦，唔好同你講住啦，我約左阿姨食飯，佢到依家都仲未見人，我要打點催一催佢。」
「哦，咁好啦。」
「聽日見啦，Bye Bye。」
「Bye Bye。」
收左線後，我睇一眼手錶，所顯示嘅日期的確係三月九日，時間係夜晚八點半。
本來再過多二十四小時，就係我求婚嘅時刻，但依家呢一刻恐怕將唔會發生。
另外，我既然都唔打算求婚，咁隻戒指仲攞唔好攞？
照計就唔攞嘅，不過又諗起我買嗰陣一次過俾曬錢，唔攞又好蝕咁，或者可以試下過去鋪頭，問下有無得退貨。
於是我就嚟到位於尖沙咀嘅珠寶店。
店員攞出預備好嘅戒指。
價值兩萬蚊嘅鑽石戒指，喺燈光映襯下，發出閃爍嘅光芒。
我記得我係揀好耐先揀到呢粒戒指，粒石同個款都好襯Wendy，指環上仲刻住我地二人嘅英文簡稱。
無奈，今次呢隻戒指無法送出去。
「小姐，我想問隻戒指有無得退？」我問店員。
「先生，你想退貨？你係咪唔滿意個設計？」
「唔係，個設計無問題，係我依家唔需要隻戒指啫。」
「對唔住先生，我地呢邊貨物一出，就無得退款，唔好意思。」
「咁算啦，隻戒指我都係唔要，我擺返喺度當係送俾你地鋪頭啦。」我放低戒指，就轉身離開。
店員叫停我，但我無理會。
其實我大可以戒指照攞，只要唔送出去就得。
問題係我唔知點安置隻戒指，要我親手丟左佢我又唔捨得，攞返屋企我又唔想，因為隻戒指會令我諗起之前求婚成功嘅畫面，再諗到自己穿越時空返嚟「收返」嗰次求婚，個心就會「銀」住「銀」住。
有見及此，索性我就唔攞戒指走。
我再打電話去聽日求婚去嘅高級西餐廳，取消左原本個booking，連同餐廳為我求婚時準備嘅小提琴演奏同紅色玫瑰花都一併取消埋。
搞掂曬以上兩樣嘢，原定嘅求婚計劃大致上宣佈「告吹」，成個過程僅僅用左一粒鐘多啲。
Jacob講到無錯，又唔係追女，二十四個鐘真係夠用有突。
接下來，我就要諗下聽日點樣開口同Wendy講分手。