「失」婚大作戰: （二）
「叩叩—」門外又傳來敲門聲。
隨之，一個眼大大鼻高高，皮膚白淨得嚟，身材又苗條嘅女仔慢慢行入房。
佢著住白tee牛仔褲，臉上塗抹淡淡嘅胭脂，打扮樸素卻不失光彩。
佢就係Wendy，我嘅女朋友，婚禮嘅新娘。
我拿拿臨收埋信紙同筆，卻仍逃唔過Wendy雙眼。
「你鬼鬼鼠鼠咁收埋左啲咩呀？」Wendy行近我身邊問。
「無…無嘢呀…」
「口窒窒咁，係咪收埋左啲唔見得光嘅嘢？」
為左唔俾Wendy發現，我將紙筆塞入條褲後面，然後攤大手板，再轉一個圈：「你睇下，我無收埋任何嘢呀。」
Wendy仍然唔相信，過嚟摷勻我褲袋同衫袋，結果咩都揾唔到：「唔通我睇錯？」
「都話左你睇錯啦。」
「咁你條呔呢？」Wendy此時發現我條領無打呔.
我拎起放喺梳妝台上嘅煲呔:「喺呢度呀。」
「你做咩無戴住嘅？你唔鐘意條呔呀？」
呢條黑色煲呔係Wendy揀俾我嘅。
「Er…唔係…」
我唔知點解釋好，無理由同佢講我準備唔結婚，所以連呔都唔打。
「哈，估到你唔識打呔架啦，等我嚟幫你。」
Wendy解開打到一半嘅煲呔，然後重新幫我打一次。
「睇住啦，咁大個人連呔都唔識打。」佢哄個身埋嚟，攞住條呔喺我條頸度左「橋」右「橋」。
我唔敢亂郁，靜靜咁望住眼前呢個我最喜歡嘅人幫我打呔。
佢臉上流露幸福嘅笑容，眼神中充滿對我嘅愛意，試問我點捨得離開呢個女人，更唔好講話傷害佢。
唉…
點解個天要咁樣玩我，點解我最鐘意嘅人要係我個妹，點解喺結婚前一日先俾我知？
然而，唯一值得慶幸嘅係，我地兩個無上過床。
Wendy係一個超級虔誠嘅基督徒，堅決反對婚前性行為，最多都係試過用手幫我解決。
「哈哈，搞掂啦，打完條呔成個靚仔曬。」Wendy幫我打好條呔。
「唔該曬。」
「奇怪啦，阿康你個樣好似有啲唔妥，你係咪唔舒服？」Wendy用手背掂一掂我嘅額頭。
「無嘢，可能係呢度冷氣唔夠，焗到我個人暈暈地。」
我扮下嘢咁用手撥兩下風，再睇睇手上嘅錶：「咦，時間都唔早，你快啲去換衫化妝啦。」
「哎呀，係喎，再唔去換衫化妝就趕唔切啦。」Wendy望一望我手上個錶。
「係呀，你快去啦。」
「咁唔同你講住啦，我地陣間見啦。」Wendy離開房間嗰時候，臉上都帶住微笑，心入面一定好期待我地嘅婚禮。
「嗯…陣間見…」 呢句講出欺騙嘅說話。
我同佢唔會喺婚禮上見。
過左一陣，我喺返條褲入面，拎啱先嘅紙同筆出嚟，繼續寫呢封離別信。
我一路寫，一路諗返起過往同Wendy嘅點點滴滴，本來好地地，但當諗到佢係我個妹，發現自己原來一路以嚟都同緊自己阿妹拍拖，原本甜蜜嘅回憶瞬間變味，變成一種無法形容嘅嘅奇怪感覺。
如果我可以早啲知道佢係個妹，當初或者我就唔會同佢一齊，更唔會行到結婚呢一步。
可惜現實無得從頭嚟過。
相愛嘅人要喺結婚前被逼分開，雙方必定係會難過。
我已經幻想到Wendy見到呢封離別信後嘅反應，肯定喊到「飛（fi）哩啡呢」，泣不成聲，臉上嘅妝全部溶開曬，仲發曬癲周圍去揾我。
此情此景，我諗下都覺得心噏，希望佢唔好諗唔開做傻事。
唉……
我無奈歎氣之際，忽然間，成間房變得漆黑一片。
停電？唔係呀嘛，出面日光日白，間房又有窗，就算停電，周圍都唔會黑媽媽架。
殊不知三秒之後，從天花板突然射左道光落嚟，間房無端端多左兩個細路，望落年紀大概係九歲，十歲咁上下。
我當堂嚇左一嚇，心諗日光日白喺教堂，唔係咁猛撞鬼下話？
兩個細路向住我行埋，我問二人：「你兩個係人定係鬼？」
佢地搖搖頭，無出聲回應，隨即有音樂響起。
「♪成婚之前一刻才趕到，難得你來通報才知道
往日共你追憶永遠是好…」
個男仔拎住mic喺度唱歌，個女仔就喺旁邊吹口琴伴奏。
「♪你話只需肯做，差一剎與我拾回舊好
不甘心，尤其這新婚，就像玩犧牲，想過搶新娘…」
聽到我毛管凍，忍唔住大聲叫停，再問返啱先個問題：「你兩個…係人定係鬼？」
「兩樣都唔係，我地兩個係教堂精靈，我就叫Jacob，佢就叫Mary。」個男仔作介紹。
咩教堂精靈？我不明所以，一臉疑惑：「咩係教堂精靈？」
「教堂精靈咪即係住喺教堂嘅精靈，我地最大嘅魔法就係幫人時空穿梭，回到過去。」Jacob將手上嘅mic隨手一丟，支mic隨即就憑空消失不見。
「回到過去？教堂精靈？點解聽落咁十幾年前我細個睇嗰套日劇《求婚大作戰》嘅？」我問。
「無錯呀，嗰套劇入面嘅精靈咪就講緊我地囉。」Mary答話。
「下？我細個睇仲以為電視劇作出嚟，估唔到現實中，真係有你地呢啲專門幫人搶走新娘嘅教堂精靈。」
「你又唔好咁講，我地只係幫人回到過去，揾返那些年錯過左嘅愛情啫。」Jacob解釋。
「咁你地啱先唱歌係做咩架？」我問。
「無呀，諗住唱首歌配合下氣氛啫，因為我睇到你個樣苦口苦臉，完完全全就係嗰啲『新娘結婚了，新郎不是我』嘅慘情樣，呢刻你心入面肯定係極度後悔，好後悔當初點解無好好抓緊鐘情嘅人，不過你好好彩遇到左我，我可以給予你多一次重來嘅機會，嚟逆轉錯失嘅緣分！」
無諗到Jacob人仔細細，講啲嘢都幾老績。
而我聽完都唔知俾咩反應好：「Er…你…係咪有啲咩誤會？我就係今日個新郎哥…」。
「唔係呀嘛？你黑口黑臉，擠都唔笑咁款，除左間西裝靚少少，你無忽似新郎哥喎？Jacob唔相信我嘅說話。。
「咪係囉，我未見過有人結婚係咁愁眉苦臉，而且全身散發一股負能量氣場。」Mary亦表示唔信。
我低頭歎一口氣，跟住將自己此時此刻面對嘅處境，講俾佢地聽。
佢兩個唔知點樣喺衫袋變左兩杯雪糕出嚟，一邊喺度食一邊聽我講。
「哦~原來係咁，唔怪得之你咁愁啦，臨結婚前先發現未婚妻係自己個妹，想逃婚但好擔心咁做會傷害對方。」
Jacob食埋杯中最後一啖雪糕，搭住我膊頭講，「不過，好彩你今日遇到我，或者我可以幫你解決呢個兩難嘅處境。」
「我又唔係想穿越過去追新娘，你點樣幫我？」
「我地精靈嘅能力就係幫人穿越時空，至於平時啲case絕大部分都係想要多次機會追返新娘，填補過去嘅遺憾，今次係第一次見新郎想『撇』新娘…」
「我唔係想『撇』Wendy，你知我同佢係兄妹，道德倫理上根本唔應該一齊，我只係想諗一個方法，能夠喺唔會hurt到佢，又唔會俾佢知道真相嘅情況下同佢分開。」我打斷並糾正對方。
講完之後，我個腦突然諗到一啲嘢：喺舉行婚禮前先嚟話唔結，無論係點都會對女方造成好大傷害，只但係，假如我可以穿越返到過去，令自己結唔成婚或者直接同女方分手咁得唔得呢？！
我將呢個諗法講俾兩隻精靈聽。
「係呀係呀，我啱先咪就係想咁講囉。」Jacob和應話。
「下？Jacob，咁樣得架咩？」Mary用不肯定嘅語氣問。
「得嘅，幫人追女定係『飛』女，性質都係一樣架啫，都係逆轉緣分，加上我地最緊要係有穿越時數啫。」最尾嗰句Jacob講得特別細聲，靜雞雞咁喺Mary耳仔邊講。
「真係得？Jacob，你真係幫我穿越返到過去？」
「No problem啦，咁你想返到去幾時？」Jacob問。
要回到過去嘅話，咁我應該要返去邊一日好？
「咁都仲洗問，當然係穿越返去求婚嗰日啦，如果無求婚嘅話，咁你咪唔洗同你阿妹結婚囉。」Mary提議。
「呢個提議OK 喎，你唔求婚之餘順便分埋手，咁就唔洗結婚，又唔洗同你阿妹繼續一起，簡直一舉兩得。」Jacob附和。
唔求婚就唔會結婚，咁就唔洗亂倫，邏輯上係講得通。
只不過，呢個世界係咪真係有時空穿越？