「失」婚大作戰: （一）
（故事純屬虛構，如有雷同，實屬巧合）
教堂位於山腰，屋頂上嘅十字架同白色嘅外墻俾人一種神聖嘅感覺。
場內佈置有白色花球同粉紅色絲帶，襯托出浪漫又喜慶嘅氣氛。
今日，呢度將會舉行一場婚禮。
喺教堂後台有兩間細房，平時用嚟俾牧師休息室同放雜物，當有婚禮嗰陣，就會讓出嚟俾新郎同新娘做化妝同更衣室。
依家係朝早九點，就喺其中一間房入面，有個年約三十歲嘅男人對住梳妝台嘅，雞手鴨腳咁打緊煲呔。
佢身上著住灰黑色三件頭西裝，配襯一對深啡色皮鞋。
呢個男人係今日婚禮嘅新郎哥，通常結婚嘅人都係開開心心，但呢個男人卻愁眉苦臉，唉聲歎氣。
唉……
呢個苦口苦面嘅新郎哥就係我。
同女朋友Wendy一齊左五年，呢日終於迎來我地結婚嘅大日子，能夠同鐘意嘅人結婚理應係一件好值得開心同高興嘅事，不過呢刻嘅我唔單止笑唔出，而且情緒低落。
我同Wendy拍左拖咁耐，感情深厚，彼此一早認定對方係可以廝守一生嘅伴侶，但係偏偏，偏偏，偏偏就喺結婚嘅前一日，俾我知道一個令人無法接受嘅事實——
Wendy竟然…竟然係我個妹！？
相愛左五年嘅愛侶，到頭來竟然係自己同父異母嘅妹妹，仲要好死唔死，喺臨結婚前一日先俾我發現。
真估唔到呢種《雷雨》級別嘅戲劇橋段會發生喺自己身上。
我完全接受唔到，腦海可以話一片混亂。
雖則只係同父異母，但始終係有血緣關係，Wendy同我一旦成婚就即係亂倫。
唉……
我深深歎一口氣，將打到一半嘅煲呔隨手丟埋一邊。
「叩叩—」
呢個時候，一個中年女人敲門入嚟。佢係Wendy嘅阿姨，慧姨。
「阿康，點解你仲喺度？琴日你應承左我會同Wendy結婚架，你唔係想反口呀嘛？」
「我…」
我剛開口，慧姨就打斷我：「Wendy係你個妹，你唔可以同佢結婚架，趁婚禮未開始，你快啲走啦。」
「我依家好亂…我知我唔應該同佢結婚…但係…但係…」我始終唔願意相信事實，「其實…有無可能係你搞錯左…Wendy有咩理由係我個妹…」
「阿康，嗰本日記你都睇過架，我家姐喺裡面寫到明，佢俾一個叫Vincent嘅男人搞大左個肚，而你老豆就係嗰個Vincent，日記入面仲有一張你老豆同我家姐嘅合照，點會搞得錯？」
慧姨隨即就喺手袋拎出殘舊嘅日記，翻開其中一頁：「本日記就喺度，你自己親眼再清楚睇下多次，裡面白紙黑字記錄左我家姐同你老豆嘅事。」
日記上嘅字跡有點褪色，不過仍然睇得清楚，當中一篇日記就係咁寫嘅：
「六月五日，晴。今日我去找Vincent，他給了我一萬蚊，叫我拿這些錢我上深圳墮胎，但我不肯，並哀求他留在我身邊。他卻冷冰冰地把錢塞到我手中，命令我以後都不要去找他，然後頭也不回地走了，
原來他是這樣一個負心的人。我恨他，我恨他這麼不負責任，同時也痛恨自己，恨自己為何那麼蠢，愛上一個賤男。
我真的很傷心。雖然Vincent不要我，但孩子是無辜的，我真的不忍心殺死自己的骨肉，所以我決定了把孩子生下來。」
篇日記記錄左Wendy阿媽俾一個叫Vincent嘅男人「𡁻完鬆」嘅事。
除此之外，日記中間仲攝住一張相，係Wendy阿媽同一個男人嘅合照。
個男人我一眼就認得出，佢就係我老豆，而我老豆個英文名係叫Vincent，由此而推斷出，搞大完人個肚又唔肯負責任嘅人，確係我老豆。
事實擺在眼前，只係我抗拒相信，奢望話唔定只係人有相似，又咁啱撞名啫。
無奈嘅係，就算依家想揾我老豆或者Wendy阿媽去求證，想問個清楚都唔得。
因為二人早已不在人世。
我老豆喺我十歲時候因意外離世，至於Wendy阿媽喺Wendy升中嗰陣，患上惡疾而過身，剩低慧姨一人照顧Wendy。
如果唔係早兩日佢地間屋俾人打劫，成屋啲嘢俾個賊摷曬出嚟，慧姨都唔知原來屋企收埋一本好耐以前Wendy阿媽寫嘅日記。
我曾經俾過自己同老豆嘅合照慧姨睇，所以佢對我老豆個樣有啲印象。
慧姨完整睇曬成本日記，喺發霉嘅陳年合照中認出我老豆。
相隔多年，佢終於知道害到佢家姐要獨力辛苦湊大Wendy嘅，嗰一個「無名無姓」嘅賤男，就係我老豆Vincent。
睇完本日記，慧姨第一時間揾我出嚟傾呢單嘢，同我講Wendy係我同父異母嘅妹妹，並極力勸阻我唔好同Wendy結婚。
問題係婚禮舉行前一日，先俾我知道呢個驚人嘅事實，我根本反應唔切，到呢一刻我都當自己係發緊噩夢。
「阿康，我知你好難受，可惜有啲嘢唔到你唔接受。你同Wendy的而且確係同一個老豆生嘅，你地係兩兄妹，道德上係唔允許你地結婚生仔，所以呢個婚你係一定唔可以結！」慧姨努力遊說。
「……」我也無法反駁。
佢講得啱，有啲嘢唔到我唔接受。呢個唔係夢，而係現實。
就算我幾唔想承認都好，但事實真係擺在眼前，Wendy係我個妹，我唔能夠同自己個妹結婚，甚至唔應該繼續同佢一齊。
呢個婚我唔可以結，但又試問我點忍心，喺婚禮上離棄最愛既人…
「阿康，婚禮仲未開始，你要悔婚仲嚟得切。」慧姨敦促。
我望一眼手錶，距離婚禮開始仲有唔夠一個鐘。
唉......
我無奈歎一口氣：「慧姨，我知點做架啦，陣間嘅婚禮我唔會出現，但係你可唔可以應承我，唔好將我同Wendy係兄妹嘅事話俾佢聽，我驚佢接受唔到。」
慧姨點點頭：「好，我應承你，咁你都要應承我，陣間嘅婚禮你一定唔可以出現。」
我流露出悲傷嘅神情，回答話：「嗯，你記住，呢件事只可以我地兩個人知。」
慧姨答應我，然後就離開房間。
之後我揾左紙同筆，打算寫一封信留低俾Wendy，想同佢講聲對唔住，交代自己無法同佢結婚。
留一封離別信總好過不辭而別。
然而，我寫寫下，寫到一半就發覺，無論講咩對唔住，幾有交帶都好，喺呢個關頭先嚟悔婚，換轉任何一個女人，都一定無法接受。
Wendy到時絕對會非常難過，而我最唔想見到佢難過。
最衰係講真話又唔得，俾佢知我地係兄妹，佢實會更加崩潰。
究竟點樣做先可以喺婚禮上失場而又唔會令新娘傷痛？
會唔會有一個方法係可以令我地雙方「無痛失婚」？
唉……
算啦，呢個世界邊有咁著數嘅嘢，邊有新郎悔婚而唔會傷害到新娘？
除非…
無，根本無「除非」。