《我強姦咗個女同學》: 《我強姦咗個女同學》(十七.十四)

《我強姦咗個女同學》(十七.十四)





咖啡室其實就喺酒店樓下，返到去時都仲未收舖。但而家已經係夜晚，估計都唔會賣剩太多嘢，不過去到又唔係喎，都仲有唔同款式類别嘅麵包可以揀。
我問宛兒：「想要邊樣？」

「你揀吖，揀咩我都鍾意。」



「咁揀啲咩都無剩係得個包嘅俾你㗎喇。」

「可以啊，咁你呢？」

「一個得啦，都仲好飽。」

宛兒拉住我件衫：「唔係囉，我想而家食。」

「咁快肚餓？」



宛兒擰頭：「凍冰冰唔食，我想而家食啊，你叫人整返熱吖，要好熱嘅。」

佢交代完就坐低咗喺門口附近嘅一張檯仔度，雙手托住個頭。

「坐低喺度食啊？」

「嗯。」宛兒點頭。

「咁飲咩？」



宛兒諗咗諗：「唔要甜嘢，今日食咗好多甜嘢喇，好悶，你幫我揀吖。」

「唔用腦唔得㗎。」

「會點？」

「你自己諗下啦。」
除咗麵包，另外仲買咗杯茶俾佢。
「你嗰份呢？」

「一齊分嚟食夠啦。」

宛兒打開紙杯個蓋，聞咗下：「茶嚟嘅。」



「唔鍾意？」

「唔會啊，不過好熱。」

「咁攤一陣先囉。」

「個包熱唔熱㗎？」宛兒指下個咩都無嘅包。

「叫人整到最熱㗎喇。」我用兩個叉篤開個包：「超熱㗎，你要小心食。」

宛兒都係用返兩隻手托住頭：「你餵我。」

「咁大個人，自己嚟啦。」

「唔制。」



我篤咗一細舊出嚟：「好熱㗎喎。」

「唔怕。」

我將舊麵包遞過去，掂一掂佢嘴唇。

「熱唔熱啊？」

宛兒擰頭：「可以啊。」

「咁你自己嚟喇。」然後我攞支叉擺落佢隻手。

「你咁㗎？」



「咩？唔可以成日就你㗎，縱慣晒。」

我攞起杯茶嚟飲。

宛兒就自己撩開個麵包，細細啖咁食。

「阿峰你唔同咗喇。」

「我知啊，係有少少唔同。」

「咁點算？」

「我覺得咁樣幾好吖，呢日好似開心過以前。」

「仲有兩日咋。」



「哦，以後無㗎喇？」

宛兒停低，放低支叉捉住我對手：「加油啊林紹峰，你要努力呃到我為止。」

我抖咗啖氣，放低杯茶。

「咩呃你啊？唔知你講咩。」
好地地做咩要講埋呢啲嘢，搞到氣氛即刻差晒。
宛兒知我嬲咗，拉張櫈坐埋嚟。

「你咪過嚟啊，我唔受你呢套。」

宛兒見我咁樣，攞起杯茶。

「你飲晒喇？以為你剩係飲汽水嘅㖭。」

「邊有飲晒，有留返一半俾你㗎。」

「啊！我知點解，陣間去便利店買汽水俾你就會開心返。」

「仲買做咩，一嚟到嗰時買嗰罐都未飲。」

突然間又記返起雪櫃嗰罐嘢。

「咪係囉，得一罐之嘛，我都要。」

我特登唔理佢。

宛兒見我無應佢：「你唔食嘅話咁我食晒佢㗎喇。」

「你鍾意啦。」
結果杯茶都真係俾我飲晒，佢一啖都無飲過。

…………….