《我強姦咗個女同學》: 《我強姦咗個女同學》(十七.十三)

《我強姦咗個女同學》(十七.十三)




下一個景點係去一個位於海邊嘅商場，睇旅遊書介紹，同現場睇嘅機乎都一樣。

夜晚黑色嘅背景，個海係寳藍色，商場原本嘅白色牆身俾燈光反映到變成紫藍色，室内透出嚟嘅光係黄色，成個配搭好靚，十足一張明信片咁。
我都認唔住講句。



「真係成幅畫咁靚，無介紹錯喎。」

「個海咁黑，有啲恐怖。」

「有咩咁恐怖。」

「如果跌咗落去會搵唔返。」

「你唔識游水咩？」



「識，但都可以驚㗎。」

「咁使咩驚，而且無端端點會突然跌落海。」

宛兒心事重重咁搖下頭：「無啊，講下啫。」

「你以前有跌過落海咩？做咩咁諗。」

「無啊，突然諗到。」



「你咪話我做咩要問你咁多嘢，我唔係要八卦你啲嘢，只係想了解你多啲費事會講錯嘢激嬲你。」

「你會識咁諗㗎咩？邊個教你㗎？」

「呢啲唔使人教㗎嘛？」
都確實係有人咁同我講過嘅。

例如斑咁啦，有時佢會八卦我做咩唔搵個人拍下拖咁，佢數數手指，話我喺呢個年紀試下同唔同嘅人拍拖，學下點樣同人相處，要認真地犯下錯先會長大。

「咁都要搵啱人先得㗎。」

「唔試過又點知啱唔啱。」

「咁㗎咩？咁求其。」



斑好麻甩佬咁，大大力拍落我膊頭：「啱㗎喇，體驗下，反正頭幾個一定唔會係最後結婚嗰個嚟嘅。」

「你咁諗㗎？」

「如果好彩咪會係，唔好彩咪當學嘢囉。」
咁我算好彩定唔好彩。

宛兒話唔知，佢又唔係我，答唔到。但佢話自己生活得幾開心，至少無咩點遇過啲事令佢有好大打擊。

唔係喎，你俾我強姦咗嗰喎，唔大件事咩？

咁我當然無講呢句。

然後就覺得，咁嗰陣宛兒叫我追佢，拍過下拖，咁就大事化小，小事化無。
宛兒搖一搖我隻手。



「就係呢間喇。」

我地去到間食火鍋嘅舖頭門口。

其實嚟呢個商場嘅重點唔係話要睇夜景，睇海只係順便，主要係嚟呢間出名嘅餐廳打邊爐。

「嚟睇下有咩好食。」宛兒打開擺喺門口個餐牌。

「你食得落啊？」

宛兒搖頭：「唔餓㗎，不過如果要食都食到嘅。」

「咁即係唔係咁想食啦。」



「我無問題，陪你食。」宛兒攬住我條腰，挨落我膊頭。

「唔啦，都仲飽。」

宛兒抬起頭：「吓......唔食啊？我鍾意喎。」

「夾硬食有咩謂，諗到，聽日嚟食早餐。」

「有早餐㗎咩？早餐打邊爐？」

「有咩問題。」

「咁聽日原本份早餐呢？」

記得行程表安排聽日早餐係去酒店附近一間咖啡室度食，個地點好近。



「聽日份早餐轉做今晚宵夜咪得。」我睇睇錶：「呢度無嘢好睇嘅話，趁佢未收舖前返去睇仲有無嘢食賣。」
我未等宛兒話好定唔好，就已經帶咗佢走。

……………..