我係一個無牌輔導員，可以令你每日重溫同一件事。//《記》: 海上生明月（二）
王裘居回想：「大概就係咁。其實我都係由嗰日開始，個心梗住梗住。」
我問：「但你哋最後都係順利成婚嘅？」
從進輔導室起，他一直稱伴侶為「老婆」。
老婆老婆，稱呼已有白頭之意。
「都叫順利嘅。雖然，就算我老婆好好，佢已經講咗好多數，只係都唔成功說服伯母，但反正，我哋真係簽咗紙結婚。」
一天，在嘉玟家。
「嫁未啊阿女你，都大個啦，快啲結婚啦。」伯母問女兒。
「就嚟就嚟。」
「阿居買咗樓未啊？買咗就快啲結啦，我個女青春有限，唔等得㗎啦。」
「未買，我哋仲努力儲緊錢⋯⋯」王裘居呢喃。
伯母馬上轉身，對嘉玟說：「吓，咁啊，女，唉。幾時都話，男人呢，要搵就搵個有能力㗎嘛。其實你咁靚女，都仲有好多選擇嘅，唔使逼自己揀——」
「放心啦伯母，我一定可以畀到最好嘅嘉玟。」他語氣強硬。
以上對話，都在王裘居在場之時產生，十分荒唐。
伯母越發肆無忌憚地告訴他：他不配與她的女兒成家立室，因為他買不起居身室房，私人那種。
「最好係啦，女我就得一個，就唔想佢唔好囉。」伯母不屑地看一看他。
其實他感受到伯母真的鍾愛嘉玟，這一種疼愛，不是口空無憑的。平時對女兒的關懷、成長時嚴格家教、甚至是歇力讓女兒學琴——請老師要錢、考試要錢、買琴要錢，通通都是錢。
只是，王裘居入不了伯母的眼。
以前，他對嘉玟的家很好奇，從她口中所講，她有一個與好頗親切的母親，家人都風平浪靜地相處；他想，一定是很好的家庭教育，才令嘉玟有世間所有美好的特質。
現在，他每次拜訪嘉玟的家，只覺得很害怕，硬着頭皮掩飾不情不願。
離開的時候，就像逃獄一樣，但他的心裏早已有座牢籠。
「我好似達唔到同你結婚嘅門檻。」王裘居洩氣。
「冇所謂㗎，我真係淨係鍾意你一個。」嘉玟盡力安撫。
她心知男友因她的母親難受，可是，她又不覺得母親有錯——至少，不算有錯吧？世人都如此，多些自身的算計，未嘗不可。這個家裏，數母親對她最好，一直希望她能過上好日子。
如今，算她「忤逆」。
「我唔上進喎。」王裘居自貶。
「我都係。」嘉玟連忙握握他的身。
「真係想娶你啊，我而家得返呢個願望咋。」
「其實我哋都可以唔結婚住，慢慢嚟。」她一早已認定他，成婚只是遲早的事，遲一點也沒有關係吧。
「你會畀人話嫁唔出，冇男人肯娶你喎。唔得。」他搖頭。
「乜你娶我係因為咁咩，吓？」
「唔係，但係我男人冇所謂啫，個個都話唔結係瀟灑；但你女仔唔同，實會畀人笑——冇人肯畀個承諾你。」
香江這座發達的城市，人們都十分人性化，考慮到女子的身體情況或會日漸衰退、不適合生育兒女，就會友善地提記「大齡」女性，希望以其良苦用心令她們早日覓得好歸宿。因此，如果女子三十歲仍未結婚，已經會被說是「老女人」、「嫁唔出」，男女皆如此賣力地說，盡顯他們的苦心。
當然，王裘居想與嘉玟成婚，不是因為如此。
「沈嘉玟，嫁畀我，好冇？」
他想和她看很多次的日出日落、天陰天晴、月圓月缺；日前，他買了一隻婚戒，挑了最適合她的款式，此刻他單膝跪地。
她低頭看他，笑：「我會畀媽咪鬧㗎。」
「又唔係我畀人鬧！」
「喂！」
他們打打鬧鬧，她首肯，答應了他的求婚。
*
「最後，我哋真係結咗婚，老婆瞞住屋企人，同我簽咗紙。」王裘居說。
我點點頭。
他並非沉默寡言的男人，不用我多作引導。他太需要一個無關緊要的人聽他的苦水，最好讓他感到異性的溫柔。
「咁紙係包唔住火嘅，結婚證書再有法律效力，都係一張紙嚟啫，唔包令其他人認同。」他說。
*
王裘居不知道，嘉玟同樣焦慮。她也很想自己的愛人得到母親的認同。
雖然愛情可以是兩個人的事，但婚姻就難以如此。他們簽紙結婚之後，她的心空虛非常，甚至有些後悔。不是悔恨於錯嫁，而是覺得那一時的衝動，令她留下一些人生的遺憾，譬如——家人沒法見證，母親還要是最疼愛她的血親。
她在想，為什麼呢，一生的摰愛們竟不能和睦共處，真令她難過，愧疚感湧上心頭。
於是，她告訴了母親，自己與裘居已經成婚。
理所當然地，嘉玟母親知道女兒已婚後，十分生氣，她沒有如願讓女兒過上「好日子」。
「佢有樓？你哋住得好？」
「OK㗎，我哋租緊樓，都唔錯㗎。」嘉玟解釋。
「阿女，講咗幾多次啊，咁大個人結婚仲租樓住，咪啫係冇能力囉，咁唔上進嘅男人你都要？又唔係冇得揀，點解要下嫁，委屈晒。」母親摸了摸頸上的項鏈。
「佢對我好好㗎。」
「我為你好咋，呢個世界上，冇人及我咁錫你，做女人，冇嘢比得上揀個好人家。」
「唔係淨係有錢先好㗎嘛⋯⋯」
「你以為啦。個個男人未結婚之前，都會話愛你一生一世，因為大家仲未需要付出大量金錢、去過所謂嘅二人世界。」嘉玟母親惡狠狠地說：「一旦結咗婚，感情又冇以前咁濃，支撐生活嘅，就得返錢。佢冇錢，學咩人畀幸福你？連樓都冇，學咩人結婚？」
嘉玟一直沒有告訴王裘居，其實戀愛之時，母親已極力反對她與家世不好的他在一起，多次勸說之下，仍然無果；便放下豪言，說嘉玟最後一定會離開他。
踏入社會，本來就是會遇見不同的人，當目之所及高於舊日所見，就不會甘心倚在粗糙的裇衫布料。
她知道母親疼愛她，可是，這種言論，令她有感母親瞧不起她的愛。
母親篤定：「唔得，總之，喺你哋買到樓之前，都唔好跟佢過。」
「吓，我唔會同老公離婚㗎喎。」
「點解你講極唔聽？勸咗你咁多次，嗰個男人唔係好嘢嚟！」
「你成日都咁講，話有樓、有錢好重要，點解你仲嫁畀阿爸，然後咁多年都住喺度？」嘉玟情急。
母親一呆，沉默，她捉住項鏈的鏈墜，半晌又道：
「返嚟自己屋企住住先，唔係離婚，我只係唔想你一直租樓，覺得一世係咁都冇問題。」
「嗯⋯⋯」
嘉玟自覺傷害了母親。
「總之就咁話啦！」
從小到大，嘉玟都很聽母親話。
她家境並不富裕，但情感上，她一直都很滿足，因為她是被愛的，至少母親十分疼惜她。她也知道父母關係並不好，雖然一直睡在同一張床上，但下床之後，沒有什麼交流，親暱和甜蜜也欠奉。
「女人，最緊要就係趁仲青春，嫁個上進嘅男人。」母親常將這句說話放在口邊。
平時沒什麼大礙的話，嘉玟都會聽母親的話，因為她知道，母親確實愛她。
偷偷嫁給王裘居，是她這輩子第一次的任性。
*
「本來我同老婆都耍咗陣小聰明，諗住行拖字訣，點知⋯⋯」他苦笑。
「嗯？」我平放雙手。