我係一個無牌輔導員，可以令你每日重溫同一件事。//《記》: 海上生明月（一）

Case 1：海上生明月
 
「阿凝。」
 
以免被討厭父親的人找我麻煩，父親在創立這個「微型輔導空間」時，並沒有公開地將我的身份與他扣連，只說我是一個義工——沒有牌照，但親切、有耐性、有時間。街坊並不會理會我的姓氏，只會友善地叫喚我的名字。
 
反正，父親的姓氏，並不是我的根。
 
一個穿着白襯衫的青年人——看起來大概三十歲的上班族，內進「輔導室」，他是今天預約了的王裘居先生。
 




「叫我阿居就得，唔使見外。」
 
「阿居你好，今日嚟係有啲咩想傾嘅呢？」
 
我並不專業，沒有什麼輔導技巧，他們一般都不是帶着激動的情緒到來，我也不必過分繃緊，大家都體諒我的直接。
 
「我同我老婆，而家分緊居⋯⋯」
 
王裘居沒有再說下去，我想像這是一個愁苦的愛情故事，正欲開口；他續道：
 




「其實我唔貪心。」
 
他沒有流露太多情緒。
 
每個人都曾經幻想自己是人生的主角。
 
譬如，覺得自己可以成為世界之最、有能力改變社會、受到別人的青睞和歡迎、比所有人都更有巧思⋯⋯
 
可是只需長得大一點，已經無法說服自己——只是機會未降臨、沒有伯樂、好運在前方；因為他早已在成長路上感受到不同的殘酷，明暸他從來不是中心。
 




王裘居在大學畢業之後，終於認清，他遠遠不會是人生的主角。
 
因為他是窮撚，是個平凡得不得了的窮撚。
 
別人如是說。
 
「噢。」我發出了感慨的聲音。
 
大學的時候，王裘居參加了不同的團體，Re-u時，每次都去打邊爐、食韓燒，動輒就百幾二百元，其實他有點心痛，因此有時找藉口避過。找工作，又因為不是就讀專科，沒有一個執業的專業資格，隨時就能被他人取代、被市場淘汰，寄了很多份履歷，終於做了一個文員仔。
 
人工當然低。
 
唉，誰FG 50K呢？
 
「本來都OK，其實我已經接受咗，世界總要有唔同嘅人，我都只不過係喺我應該留低嘅位置。」王裘居說，然後沉默。




 
變得有錢就像平定四六——某次香江鄰近城市的於四月六日大屠殺，每天都為每一磚每一瓦勞心奔波，但至始至終是徒勞之功。
 
「咁係咩令你覺得之後唔OK？」我用他使用過的字眼問。
 
大學一年級之後，王裘居與女友沈嘉玟戀愛。
 
一切都很順利，嘉玟溫婉良善，令他在牽着她手的某一刻，覺得真能與她攜手偕老。
 
他們不會經常流連各大商場，不會常常消費購物。
 
嘉玟很喜歡吹着海風和王裘居聊天，沿着海濱行，迎面有不同的行人；二人牽着手，慢慢地行出自己的腳步。愛情可以簡單如此，看着對方，心花怒放，或者一刻感到心安，他知道，嘉玟並不會離開他。
 
他們都努力給予對方承諾。
 




只是，王裘居從來沒有見過嘉玟的家人。
 
「點解咁少聽你提起屋企人咁嘅？」他問。
 
「冇啊，都係正正常常嘅屋企，冇咩好提嘅，我屋企人都好錫我㗎。」
 
「咁就更應該帶我見吓啦，如果唔係佢哋，點養到我女朋友咁完美？一定要好好報告伯父伯母啦。」
 
「哈哈，佢哋養到我咁大，畀你偷走咗，實激死佢哋啫。」
 
「上嚟你度，係咪冇雞髀食㗎？」
 
王裘居自我調侃，他只是紫荊邨的一個公屋仔，沒有華屋美車。
 
嘉玟笑笑：「我都係公屋啫。」




 
*
 
「我當時應該要察覺到，老婆嗰個係苦笑。」王裘居說。
 
我正色。
 
*
 
王裘居第一次拜會嘉玟的家人，是在某個平凡得很的星期六晚上，他來吃晚飯。
 
他帶着即食燕窩、養命酒內進，嘉玟的母親只對他點點頭，然後將禮物傳給所有的家人——嘉玟的父親、弟弟、祖父、嫲嫲。
 
氣氛是很詭異的，至少不是和諧舒適；主人家全部沉默，只默默地打量他。他尷尬又局促，他一直以為，嘉玟的家庭必然如她描述那樣，有個對她無微不致的母親，和睦的相處模式——因此才能養育出她這般的女子。
 




那一刻，他清楚知道，自己只是外人。
 
到了食飯圍坐之時，伯母終於說話，將菜夾到嘉玟處：
 
「嘉玟有着落，我哋都開心嘅。係呢，聽嘉玟講，你經濟條件唔係咁好喎。」
 
嘉玟搖頭：「我幾時有咁講？」
 
「出身同你差唔多，咁咪一樣，都唔係啲咩專業人士，經濟條件會有幾好？」
 
「媽咪啊⋯⋯」
 
伯母無視嘉玟，對王裘居說：「我希望嘉玟可以搵到一個真心錫佢嘅人，始終我哋湊佢湊得咁辛苦，都希望佢好嘅。」
 
「我一定會對嘉玟好好㗎，你放心啦。」王裘居不敢怠慢。
 
「好唔好呢，就唔係得把口嘅。」
 
伯母不信任他。王裘居語塞，自問他已算不善辭令，行動比語言更出彩。
 
伯母又講：「我哋意思係呢，娶嘉玟，都想大家有個保障㗎？就要畀少少禮金啦——」
 
「唔好咁早講呢啲啦。」嘉玟不滿。
 
她不想給王裘居留下「家人很勢利」的印象，總覺得怪怪的，她本人未曾為錢過分着緊。
 
「八萬八啫，幾好意頭吖。」伯母說，一邊摸摸頸鏈。
 
「太多啦，賣女咩？」嘉玟向母親撒嬌，王裘居一個月的薪金都沒有四萬四千元呢。
 
「哇，嫁女喎，你從此之後乜都跟住佢，生個仔都要跟佢姓，當然有啲嘢揸手，大家都穩陣啲啦。」伯母轉向他：「你話係咪啦？」
 
「係嘅。」他竟然附和。
 
八萬八。
 
他不會說這是大數目，但也不少。
 
嘉玟父親完全沒有參與這一次對話，他只漫不經心地翻了翻薑下的蒸魚。
 
「仲有啊，唔要阿女住啲唔好嘅屋啊，一定要嫁到好環境落腳。」伯母又說。
 
「一直都係咁大㗎啦，有咩所謂。」嘉玟說。
 
「說話就唔係咁講，成長環境好影響個人㗎嘛！都好影響婚姻添，住得好，就乜都好㗎啦。」
 
王裘居不自覺地點頭。
 
他盯着伯母左手無名指上的戒指，心想——嘉玟父母的婚姻不幸福嗎？嘉玟一家有老有嫩，全部逼在六百尺公屋，在她祖母和爺爺離世前，一家八口。雖然超户情況並不新奇，他也見過四口之家留在兩人單位裏，因為生了孩子之後沒有申請新的公屋，住慣了又不想輪候，就是如此。
 
「係囉，所以你諗住同嘉玟買邊度嘅樓啊？佢死都唔肯講你嘅計劃，講出嚟唔會嚇親我㗎嘛？」伯母說。
 
「額⋯⋯我哋暫時未有買樓嘅打算。」
 
伯母「吓」了一聲，像是真的驚嚇了她，續道：「咁結婚之後，你哋打算住邊？」
 
「唔好問得咁長遠啦，我哋又唔係即刻結婚。」嘉玟打圓場：「先第一次見家長咋嘛。」
 
「你都廿七歲啦，女人仔，快快趣搵個男人嫁吖嘛，我哋個個都咁錫你，都係想你有個好歸宿啫，你再唔嫁就老㗎啦！你都唔想做賣剩蔗㗎嘛。所以，唔可以冇計劃啦，要清清楚楚先入人哋門㗎嘛。」
 
「我仲好後生吖，而且我諗我都夠清楚啦。」
 
嘉玟無奈，戀愛多年，計劃就是嫁給他；無論她是廿七還是三十七、賣剩蔗還是蘿底橙。
 
她不好意思用太強硬的語氣反駁，因為母親是「為她好」。
 
「咪話我話咩，都咁大個人，少少錢都儲唔到嚟買樓，點靠得住先。」伯母看着他，摸了摸頸鏈：「阿居啊，唔係針對你，講係咁講啫吓。」
 
「嗯嗯。」他連忙點頭。
 
王裘居有點不忿，卻沒有覺得伯母的要求異常不合理，反而有點無奈、自責。他也很想大聲告訴伯母，他可以給予嘉玟一個「好歸宿」。
 
可是，他不能。
 
「個個都有心㗎啦，唔代表你可以同個個都結婚㗎嘛。」
 
嘉玟不明白：「咁都要揀個我鍾意㗎嘛。」
 
「都唔細㗎啦，鍾意呢啲嘢，好易變㗎啫，今日唔知聽日事。」伯母說。
 
一個寬闊的膊頭，是不能擋得住雨的，由一磚一瓦建成的房子才可以，這是成年人的道理。
 
他說：「我信嘉玟唔會變嘅。」
 
伯母答：「但我唔信你，萬一你變心呢，點樣保障我個女？」
 
王裘居惱怒：「我唔會變，希望你哋都相信我。」
 
嘉玟在桌子下，不斷握着他的手，似是給他安慰，又像和他道歉；他忍住，沒有再說什麼。
 
「希望到時裘居都可以畀多份家用啦，你就可以畀少啲，留多啲錢畀自己傍身。」伯母對嘉玟說。
 
嘉玟家人沒有擺出簡陋的飯菜，雖然沒有雞髀，但是有肉有菜有湯，絕不失禮。她的家人，確實很寵愛她——她沒有講錯，伯母句句都為她着想，只是不喜歡他而已。
 
「Sorry，冇同你講我媽咪係——有啲進取。」嘉玟說。
 
她不知怎樣開口，只懂着他打扮得更細緻，不要送便宜的見面禮，她不想親自打碎男友的自尊；因此令他毫無心理準備，更加窘困。
 
「我未儲好錢。」王裘居總結。
 
「唔緊要，我哋可以一齊儲。」嘉玟答。
 
「伯母好似好想我有多啲——成就。」
 
「佢哋都有少少諗法嘅。」
 
「唔係少少啦，佢哋並唔鍾意我。」
 
「唔係嘅，要啲時間啫。」
 
「講到尾，咪又係睇唔起我窮。」他開始晦氣。
 
「可能都係為我好啫，平時佢哋都真係好錫我㗎。」
 
「好唔係大晒㗎喎，咁貪心。」
 
「夠啦，唔好咁講佢哋啦，始終都係我屋企人嚟。」
 
嘉玟和王裘居的手緊緊牽着，面容卻十分難看。