<<我有嘅超能力竟然係⋯>>: 第四章 Dr.

收工又放假嘅我格外精神，我聽住光頭幫嘅歌搭車翻歸。

「今日聽日都未知幾時過得好，三個光頭仔 清晨Hustle到朝早，唔着你對鞋 一直走自己條路，唔使你 教我呢樣果樣點做。叮！」耳機內音樂和訊息提示聲。

「你翻工得㗎啦，唔駛搵我㗎啦？要我搵你先記得我㗎啦！係咪啊？」一位國家級重要關鍵人物發訊息俾我。

係收到訊息嘅呢一刻，我係驚咗，唔知點回答，就好似細細個俾老師記欠交落手冊唔敢俾屋企人簽名，但係偏偏就發現咗然後用心寒嘅聲音叫你過去準備教訓嘅感覺。

無錯，佢就係我拍拖拍咗四年嘅ok妹。唔好問我點解佢會叫ok妹，因為佢個名就係有ok所以就咁叫。





「翻工翻完好攰又訓得太舒服所以先無覆㗎！今日我放假，過嚟搵你食午餐啊！」我回覆。

「算啦！呢幾日我都知你好似唔太舒服，唔怪你，下一次你就知死！咁今日十二點係我公司附近等啦！」ok妹回覆。

我翻到屋企後都無訓教，反而開電腦搜尋下超能力呢樣野。但係一堆都係講最想有嘅超能力啊，一係就話所有人都有超能力果啲。

係我碌咗大概幾分鐘，有一個網址係叫「如果你擁有超能力⋯請你小心」，我㩒咗入去睇，個網站全黑嘅，乜都無。一開頭諗住就咁就㩒走佢，但係唔小心㩒實左鍵一拉，有幾句說話由一位叫Dr.嘅人發佈嘅。

「如果你係有超能力，可能係因為你近排太大壓力。造成你有幻覺！ Dr. 上」





呢一刻嘅我，有想將佢由個網入面「的」佢岀嚟打一餐再磨地，之後我好嬲咁㩒走佢之後去打機睇片。

到咗十一點度，我就岀發搵ok妹，個腦不停岀現Dr.果幾句說話。個人周身唔聚財咁，唔知係咪真係有呢個人，如果有又俾我知道係邊個一定要教訓下佢先得。

「我地去食咩啊？」ok妹問。

「去食大頭蝦啦！果度啲野好食啊！」我秒答。

坐底嗌完野食我就開始同ok妺講呢兩日奇事嘅事，佢都聽到好疑惑，半信半疑咁望住我。





「可能咁啱姐，你再睇下先啦」ok妹認為我呃佢。

食飽同ok妹分開之後我就翻咗屋企訓。

我慢慢進入個夢境，周圍環境全白一片同有一個書櫃直立係白色的地上，夢境中嘅我感覺到自己輕輕飄起，身體不受控制，慢慢地開始向書櫃飄去。

書櫃上只有一本書，書名為「啊勤」，我打開本書，一睇就見到啊勤同我講嘅故事，但內容未夠完整。

究竟呢本書有咩用？如果完成呢本書嘅內容又會有咩特別？我無從得知。

呢個夢過得好快，我突然向下墜落，係呢個離心力嘅情況下我醒過來。

夢境非常清晰同真實，我記得好完整，唔似之前發過嘅任何夢。

起身嘅時候已經第二日嘅清晨5點半，我竟然訓咗咁耐。





打下機聽下歌睇下劇就到咗下午三點幾，因為今晚要翻工，所以要令自己訓著，但我完全訓唔到。係呢個時候我萌生一個想法，嘗試確認一下係咪真係可以令人秒訓。

我用力諗住訓教，用右手擺係自己額頭上面，下一秒我好似成功，我見到自己係一張枱上面做功課。當時嘅我好驚，有個人向住我行過嚟，係我「老豆」。

「叫咗你做好晒功課先好訓㗎嘛，做乜又欠交啊？係咪我每日收工翻嚟(的)你起身都係一樣啊？即係要我打啦！」隨後聽到背後有幾下（發發）聲。

我再一次係夢境醒來，醒咗嘅我右手發冷同疼痛，仲全身震，我知道唔係病，而係驚。但時間唔允許我再慢呑呑，唔係就會遲到！

我飛快翻到公司，好彩趕得切，如果唔係嘅話，年尾都唔知會唔會扣獎金。