<<我有嘅超能力竟然係⋯>>: 第三章 啊勤

「大家埋位啦！」控制室內嘅ic同我地講。

「點啊你啊Dee，今日訓唔訓到？我今日翻到去同尋晚一樣訓到好似死咗咁啊！」啊勤好開心咁同我講。

「我今日都異常地訓得好啊！係呢，我有啲野想問下你⋯」我同啊勤講咗尋晚嘅事。

啊勤收起咗佢開心嘅心情，面有難色同眼泛淚光。隨即係youtube搵咗段片俾我睇，畫面有一對男女同一個跪係地下嘅「男士」，而片中嘅男士就係啊勤。

周圍嘅路人有啲停下腳步「食花生」，有啲低頭玩手機。





「你知唔知我忍咗你幾耐，宜家俾你知道咗都無辦法，分手啦！」個女仔就拖住咗個男仔走咗。啊勤跪係原地望住地上嘅玫瑰花持續咗幾分鐘。

「你女朋友咁賤嘅！點解會咁㗎」我問啊勤。

「因為佢嫌我廢，我廿幾歲做保安，又無能力。覺得我無上進心，所以識咗個又有車有樓嘅男仔。」啊勤深嘆一口氣。

「邊個話保安廢？做保安好多知識係一般人都未必會知道，你個ex真係0尊㗎喎。你平時為咗佢連份糧都俾晒佢去買衫買盛，宜家俾綠帽你係咪癲㗎！」我其實都知道保安呢一行俾人感覺係無聊無上進心同廢人先去做。

「你想唔想聽一個長長地嘅故事？」啊勤問我，我表示想聽。





「三年前嘅我，係一個理貨員。果時做人豪無目標，翻工就係為咗解答客人嘅問題同上架啊拉架。有一日有一個女仔係零食區踎係地下，而身位毒毒嘅我就100%望㗎啦！佢係黑長直，著住白色小背心同長嘅牛仔褲，唯一最怪嘅係佢好似喊緊咁，果時嘅主任叫我去留意下個女仔，過咗無幾耐佢拎住幾包薯片就去咗收銀，但佢唔係去俾錢，佢係直接岀門口，啲同事喝住佢，佢先停下腳步。而最好笑嘅係，佢無帶銀包，我就膽粗粗行過去幫佢俾咗。」啊勤面上有翻笑容。

「原來你三年前已經係水魚嚟㗎喎，哈哈哈哈！」我笑住話啊勤。

「係啊，不過呢個行動令到我有見多佢一次面，過咗兩日佢就突然出現咗係我眼前。」勤說。

「喂！點解你尋日無翻工㗎！唔駛做啊你？我係嚟還翻錢俾你㗎！我前日發生咗啲野唔記得咗拎銀包落樓。」背心女向啊勤講。

「咁少錢由佢啦！仲要落嚟還翻俾我做乜鬼啊！不過你連句唔該都唔講就真係過份咗囉師姐。」啊勤一路上貨有少少燥底咁講。





「係啦！對唔住啦！前日唔該晒你啦，咁你錢又唔收..一係咁啦，你今日幾點收工啊？」背心女問。

「兩個鐘後囉！約我啊？」啊勤睇一睇隻破舊嘅手錶。

「好啦，一陣間再見啦！」背心女衝衝忙忙咁走咗。

「之後呢？你有無真係等個女仔啊？」我問啊勤。

「有啊！佢仲早咗少少到，收工換完衫一行岀去就見到佢拎住袋野，仲去咗食三哥添啊！」啊勤講。

「呢度小小心意啦！報答你幫咗我個忙，唔係好貴㗎炸。」背心女遞袋嘢俾啊勤。

「哇！多謝多謝！估唔到幾包薯片換到一餐譚仔同禮物，下次真係幫多啲人找數先」啊勤好開心咁講。

呢次短短嘅一餐充滿歡樂同回憶，為啊勤由毒毒嘅生活增添一點色彩，亦帶嚟下一次約會嘅機會，雙方交換咗聯絡方式。





「點解你地兩個唔會介紹下自己嘅？叫大家咪喂嚟喂去咁囉？」我好奇地問。

「你講起呢樣我都覺得好好笑，我地交換咗電話，佢係直接用我手機改自己名叫背心妹！你話佢係咪癲，我就改自己叫送禮勤。」啊勤好自豪咁指住自己。

「都幾襯你地㗎喎！之後呢？你唔下佢果日做咩咁奇怪嘅？」我問。

「點會咁快問啊，人地前日先唔開心完，後日就提人傷心野咩，果次之後再約先問啦緊係！啊Dee，你睇下個天，天光啦，我要打鐘搞埋啲野收工啦。下次再講，你聽日放假啊！」啊勤敲一敲我個頭。

「係喎！開心嘅時間過得真係快，又係時候講拜拜。」我有啲唔捨得咁講。