<<我有嘅超能力竟然係⋯>>: 第五章 回憶碎片
「送禮勤！我要聽埋個故事啊，快啲啦，快啲啦！」我不停催啊勤。
「係啦係啦！我上次講到邊呢？啊！記起啦，上次咪話第一次約會嘅，果一次佢應該係對我印象幾好，所以過咗兩日已經再搵我，今次佢再一次叫我係超市門口等。」啊勤開始講起回憶。
「喂，送禮勤！等咗好耐啊你？」今日異常化咗唔同風格妝同身穿黑背心，白色牛仔褲嘅背心妹拍一拍啊勤。
「喂，係啊背心妹！你今日好唔同喎，發姣啊？」啊勤一如既往咁直男。
「係姣對象都唔會係你啦！仲有啊，我唔叫背心妹啦，叫我啊怡啦！」谷起個嘴嘅啊怡同啊勤講。
就係咁，佢地達成咗兩個人嘅稱呼，一路去搭車去一個地方～大尾督。
「估唔到你竟然會係同我去踩單車，有少少愕然添！」啊勤話。
「見你成日翻工，放假一定成日困係屋企唔岀街唔運動。我宜家帶你去做下運動，感受下大自然啊！」啊怡講。
「我翻工已經體力勞動，宜家仲要我郁啊？果度有架雙人，不如⋯？」啊勤用期待眼神望住啊怡。
「下⋯人地呢啲係俾情侶踩㗎喎。你同我又唔係情侶⋯」啊怡怕怕醜醜咁講。
「唉，是但啦是但啦，唔強迫你啦。快啲去租啦！」啊勤用失望同唔開心嘅感覺同啊怡講。
「好啦好啦，同你踩啦，真係好煩啊！你唔好唔郁啊！」啊怡即刻拉一拉啊勤個手袖。
啊勤點點頭，拎銀包示意俾錢，但啊怡係轉眼間已經俾咗。就係咁，一對男女就咁開始咗踩上水壩嘅踩單車之旅。
「呢條斜路唔好踩啦，我推上去啦，你負責行上去得㗎啦！」啊勤手推單車慢慢上去。
「你得唔得架？好似好辛苦咁。」啊怡口講但無幫手推嘅意慾。
「得㗎啦！你行上去先啦！」啊勤講。
啊怡一路行上去一路向後望啊勤，呢個畫面好男友視覺，啊勤一路沉醉住呢刻畫面，慢慢推單車。
「呼！搞掂！」啊勤鬆一口氣。
「辛苦你啦！拿，抹下啲汗啦！」啊怡遞紙巾俾啊勤。
兩個人開始踩單車，但係唔知係咪無夾過點踩，踩得好唔順暢，毫無合作。
「不如我地數下，一，二，一，二，咁樣會唔會好啲。嚟，試下，一～左腳⋯」啊勤提岀建議。
「得啦得啦！成功啦我地，仲知一早咁踩啦！」啊怡露出久違嘅笑容。
兩個人越踩越舒服，空氣中佈滿兩人笑聲，溫柔嘅陽光照射住海面，微風輕輕咁吹住踩單車嘅兩人。過咗一陣，兩個人停咗落嚟，坐咗係旁邊。
「係呢，都過咗咁耐，你都無同我講過之前點解你會咁神不守舍咁係超市岀現。仲唔記得俾錢，要我幫你解圍嘅？」啊勤問。
「係啊，其實我果日係同男朋友嗌交，因為佢好似有咗第二個⋯⋯」啊怡講咗成件事。
「所以就分咗手啦，哦～咁炸嘛！呢d男仔要唔要都罷啦！再搵過個咪仲好，好似俾人呃好耐咁啊。」啊勤鬆一口氣。
「咁不如問下你啲野啊？你會唔會中意我呢種女仔啊？」啊怡眼定定望住啊勤。
呢一刻嘅啊勤心入面諗，哇，其實我咁耐以嚟都無俾女仔表白過⋯仲要咁靚嘅女仔，之前我表白親都瀨野㗎喎。啊勤諗咗一諗，望住啊怡，無再考慮同回應，佢直接錫咗落去。
軟軟嘅嘴唇，帶住少少士多啤梨味潤唇膏嘅香氣，感覺好似係士多啤梨味嘅蛋糕上面輕吻一樣。
持續數秒之後，兩個人之間嘅氛圍唔同咗，啊怡面紅到好似蘋果咁，啊勤就唔敢直視啊怡。
「就咁話㗎啦！唔準反口！」啊怡攬住啊勤。
「呢一個就係我地一齊嘅故事，聽落好甜好幸福，但係事實嘅往往都晪係你所想像嘅野。係嘅，我地一開頭一年真係好幸福，接收工，一齊成就好多第一次。但係慢慢都會有嘈交嘅時候，女人歲數隨住不停增長就會去到一個想快啲有未來嘅諗法，話就話想同你有未來，其實係怕浪費時間，老咗無人要。之後嘅3年，我同啊怡成日都嗌交，無咗好多之前嘅快樂，而佢都慢慢地開始嫌棄我所有野」啊勤嘆息。
「喂！你究竟撩完交嗌未啊！叫你執一執好啲野咁唔情願嘅你，你估我好想煩你㗎？你諗下你做男仔幾廢啦，識你果時做梗超市，係啊宜家唔係超市啊，不過都仲係officeboy呢！一個月得果一萬多少少，點生活啊大佬！我想要嘅野，我已經算數乜都唔買㗎啦！宜家連執少少野都發脾氣？」啊怡指住啊勤話。
「你講到我咁廢，我無改變過咩？知唔知點解我咁唔願意執啊？係因為呢d垃圾係你製造岀嚟㗎！你整完嘅野要人幫你執手尾？咁樣係邊個錯啊，係啊我做officeboy得咁少人工啊，但我想㗎咩？我已經重讀書啦！就係唔想一世係超市度做野，等你無咁無面啊！」啊勤反話翻啊怡。
兩人爭論不休，慢慢地開始唔再同對方講野，過咗一陣，啊怡問啊勤一句說話。
「你究竟想唔想娶我？」啊怡問。
「宜家呢個境地，我真係答你唔到。」啊勤答。
從此之後兩個人無再嗌交，只有普通食下飯，睇下戲，兩個人嘅笑容都慢慢減少。
時間再到咗啊勤買花果一日~
啊勤感覺再咁落去會錯失一段美好嘅感情，佢去買咗一隻求婚戒指，去花店拎一早訂好咗嘅玫瑰花，諗住去接啊怡收工。
可惜嘅係到咗佢公司樓下嘅啊勤見到啊怡挽住一個西裝男嘅手臂，見到啊勤佢無感動，無開心，無驚訝，只有不屑，不理嘅表情同行動。
「之後你知㗎啦~就係你見到嘅畫面囉~啊dee。」啊勤講完，輕咗一口氣。
「終於講晒岀嚟，呢件事我無同人講過，就算屋企人到呢一刻都仲係以為我同佢拍梗拖㗎！我諗今日收工翻到去有教好訓啦！」啊勤拍一拍我膊頭。
「原來係咁。。無事嘅，仲有我係度陪你啊嘛，有咩都應該講岀嚟㗎兄弟！」聽完啊勤故事嘅我無諗過會係咁傷感。
我用手再一次伸向啊勤嘅額頭，果然一岀力，啊勤就訓著咗。而同時，白色世界再次出現，書架上面關於啊勤嘅書入面內容重視，書後有一粒紅色嘅水晶。我再環望周圍環境⋯⋯⋯多咗一本書。