一篇潮文改變一生: 第八章

哈！哈哈！哈哈哈哈哈哈哈！
我終於切切實實咁肯定到自己今次真係執到寶，忍唔住仰天狂笑！要明白一張賭枱都未係話最著數，需知道係大陸做生意最重要係咩？人事關係丫嘛！而家同一個有頭有面既人物建立左良好關係，你話我點會唔開心！
好了，下一步應該點行呢？
而家形勢係，只要過多一個月，我就自自然然會有十零廿萬本錢，我諗最聰明既做法，莫過於係呢一個月內，盡可能搵出一D用十零萬就可以賺大錢既生意！呢個方法應該係最有效率……
但係回心一諗，唔係喎，一日錢未到手，一日都仲有好多未知之數，呢個世界好鬼衰既，有邊個諗得到我條J都放到係芳婷口邊佢都含唔到丫？所以其實我係咪應該諗下計，將如今身上已有既三千幾蚊滾大佢先係正路呢？
腦海交戰，而家叫做有兩個不同計劃……
Plan A：咩都唔好搞住，去尋求一D用十零萬就可以發展既事業。
Plan B：諗計確實地滾大手頭上既資金。
嗚呀！好煩惱呀！有無人話到比我知我應該點做至好！
 




我仲係o係大街度ON居居咁遊盪，正當我諗得出神既時候，街邊一D事物吸引左我視線……
係一個地攤，而呢個地攤放滿曬大大小小不同既畫作，睇來係以替人畫人像為生o個D攤檔，而呢種檔口自不然會放左好多舊作來show off一下個檔主既畫功，我就係比呢d作品吸引左。
當然，我唔係d識欣賞藝術既人，係我眼中畢加索d畫同我之前替個姨甥仔換屎片時d屎跡差唔多款，所以我成日話好彩我唔係d有錢無地方洗又洗忽痕既二世祖，如果唔係我好大機會會比人呃，用二千萬賣塊屎片比我，我仲要用鏡架鑲係屋企大廳，之後招呼d親戚朋友，一度飲住紅酒一度讚嘆：「啊！呢幅畫個意境真係高，用色巧妙、落筆灑脫，你地睇下佢表現出o個份激情係幾咁澎湃！尤如人性對心靈同新生o個份執着！」
而之所以咁藝術白痴既我都會被地上既畫吸引，其實原因好簡單，就係因為佢畫得實在太靚！靚到連我呢個門外漢都忍唔住連大氣都唔敢透，行埋去細細欣賞佢既傑作！
地上既作品好多元化，風境、人像、寫實風、幻想風咩都有，幅幅都好靚，其中我最欣賞係兩幅人物畫。
其中一幅，係一個擁有明亮大眼睛，頭戴尖尖巫師帽的女法師，一套淺紫色的連身裙剛好蓋至膝蓋對上數吋，活潑得來又不會太過性感，雙耳上設計簡潔的耳環，令她的耳珠看起來格外標緻，完全是一望就令人愛上的那種青春少女，畫的右下角寫着「GIGI」。
另一幅，是一個身材高挑，乳房豐滿，貌似刺客既成熟美女，佢身上露出肉的部份同比衫蓋住的部份我諗有成七三之比，如果唔係我見佢身上咁多武器我仲以為佢係比堅尼模特兒，而最奪目既要算係一雙完美長腿，照比例來看起碼有成四十二吋，唔止長，線條仲完美到不行！畫中既佢神采飛揚，四周係唔同既妖魔怪物向佢聯手而攻，但係佢卻看來應付得輕鬆自如！而畫的右下角，就簡簡單單地寫住「女刺客」三隻字。
兩幅畫都充滿夢幻風，我諗應該係D自創既魔幻故事人物。
而個檔主就一直低着頭，席地而坐，見佢穿着一件殘舊既T裇，外加一條吊帶牛仔工人褲，頭頂六、七十年代D英國派報童好興戴既賊仔帽，看不清顏面。
我好奇地望左一陣，心血來潮，索性坐低係佢檔口張椅仔度，個檔主一見有人坐低即舉頭招呼：「歡迎光臨！」




佢的聲音響如銀鈴，又幾鬼好聽，看清佢個樣，見佢鼻高眼大，青靚白淨咁，原來係個美少年，不過係多多少少有D污糟咁解姐。
「丫！D畫好靚，有料到喎！」
佢笑得如陽光燦爛：「多謝你呀！」
我求其拿起地上一幅靚到成幅相咁既風景照，望兩望：「你畫左好耐架拿？」
「係呀！我四歲開始就學畫畫，真係好鍾意架！」
「你又幾乖喎！咁細個就出來擺檔幫補家計。」
佢輕輕皺眉：「我廿歲架啦！」
我一時口快：「吓！廿歲都未變聲？」
佢一聽到，忍唔住黑面：「變咩聲？邊個話我係男仔呀！」
又衰多口，睇真D，佢又真係無喉核架喎！而且唇紅齒白咁，的確係有幾分似女仔。




「Sorry！唔好嬲，我幫襯返你當和數！」
佢一聽我咁講，即時笑返曬：「好呀！十蚊丫！」
我拿出我D錢，想比十蚊佢，點知佢一見到就話：「唔收港幣架喎！」
咁又有道理，但係我懶得唱，就同佢講：「我身上係得港幣渣，一係我比廿蚊你啦！好無？」
「又好！」
佢收左廿蚊，叫我擺個POSE，就開始運筆如飛咁畫，我隻眼就望住佢條工人褲，其實我從一開始就留意到，佢右褲褲管度畫左一隻大鵰，極目遠眺，舉翅欲飛，我見隻鵰畫得形神俱佳，再加上唔單止係一隻好似樣既鵰咁簡單，而係同佢條褲既色水、外形都十分配合，仿如渾然天成，型格異常。
我問佢：「你條褲自己畫架？好靚喎！」
「嗯！」佢略一點頭，雙眼仍是注視着畫版。
「啊！勁喎！係其他質地度畫畫，會唔會難過係紙度畫好多架？」
佢雙眼始終都係我臉上同畫板上一直遊走，枝筆亦沒有一刻停下來：「工多藝熟姐！」
「咁你畫一條褲要幾耐呀？」
「視乎幅圖想畫成點啦！一般來講就幾個鐘。」
我雙眼一轉，即時就心生一計！
一個發財大計！