一篇潮文改變一生: 第九章
「搞掂！」
畫左大半粒鐘，終於畫好，我拿過來一望，又真係幾鬼靚喎！我估大半原因應該係個模特兒型仔既關係。
佢問：「有無D咩唔滿意？」
「滿意！仲靚仔過真人，點會唔滿意？」
我小心捲起幅圖，跟手問佢：「係呢！你平時檔野生意好唔好架？」
佢有點愁容：「麻麻啦！」
我打蛇隨棍上：「哦！如果我要你幫我畫褲，你收我幾錢？」
「呢D我自己玩下架渣！無諗住賣到錢架！」
我笑笑：「你無諗住姐！我就係有興趣！你答我實收我幾多錢就得架啦！」
佢雙眼骨碌骨碌咁轉：「但係又要買褲，同埋D顏料都貴D……」
「OK！咁褲同顏料我提供比你，你話我知你收幾錢手工就得！」
佢諗左陣：「嗯！一條三十蚊人民幣啦！」
三十蚊？正！有得諗！
「成交！我以後就搵你畫褲！」
佢看來好開心：「好丫！你話我知要畫咩圖案，我過兩日就可以比到你。」
「嗯！咁你比你個電話number我丫！」
佢搖搖頭：「我無電話架！」
都唔出奇，始於看佢都應該幾窮：「無手提，咁屋企都得！」
「我都無架！直情咩電話都無。你要搵我你來返呢度得架啦！只要唔落雨，我日日都係度擺檔，朝十晚八。」
我聽到佢咁講，心內不免有點難過，唉！話就話大國堀起，其實有好多根本基層都係度過緊D苦日子……
「好！我叫阿龍，你叫咩名？」都用落左，費時煩，暫時就沿用返呢個名啦！
「我叫銀鈴！」
咁搞笑？把聲似銀鈴就叫銀鈴？咁好多女歌手都應該改返個藝名叫「老牛」！
告別銀鈴，我第一時間就求其搵間找換店，將手頭上D錢兌曬做人仔，方便之後使用，跟手就去上網，係淘寶開返個戶口，頂！好Q煩，又支付寶又盛，好唔容易搞掂，我就去入貨。
周圍搵呀搵，終於選左間貌似幾黑心既成衣店，入到去左簡右簡，簡到條個款OK型既牛仔褲。
我叫個店主埋來，個店主係個頭頂半禿既阿叔，笑口笑面咁過左來。
「我想問下呢條幾錢？」
「老細有眼光呀，呢條好受歡迎架！一百蚊條！」
「我買三十條有無折？」
「哈！我地其實都係賺好少架渣！不過見你咁靚仔，計平D，九十五啦！」
「四十！」
「嘩老細！唔好玩啦！咁點得呀？一係咁啦！九十好無？」
「五十！」
「我地真係賺你好少架渣！唉！無計，見係你渣！八十七啦好無！八十七我比你！」
「五十五！」
「唔好咁啦老細！我地真係賺好微，我入貨都要成八十蚊一條架！洗唔洗我比張貨單你睇下……」
「五十！」
「喂喂！做咩反而仲少左架？唔好咁唔好咁，一係咁啦！八十五，真係計到盡架啦！至多送幾條皮帶過你啦！」
「四十！」
「你玩野咩？係咪有心買架？一口價！就八十蚊條啦！我唔賺你，當交個朋友架渣！」
「屌！」
我唔理佢，丟低條褲轉身就走，急到佢賴屎，即刻叫住我：「好啦好啦！四十就四十啦！」
我轉返身，露出個超仆街表情，舉起三隻手指
「三十！」
成功屈到批褲之後，我就開始盤算再下一步行動。
我地呢種DIY買賣，最緊要係兩樣野：真材實料同埋宣傳！
真材實料方面：褲本身就一定係CHEAP，但係o係大陸網購D人都有心理準備，D料係會CHEAPCHEAP雞，只要到時加返個不能水洗既標籤就OK，問題不大。我D貨既賣點係型格，看過銀鈴既畫作、即場速寫、同埋佢自己條工人褲，我對佢投以100%信心票，我敢肯定我批牛仔褲外形方面一定係屬於有料到！
所以接住落來，我要搞既，就係宣傳方面既事……
我帶住其中兩條褲，返去搵銀鈴，交代話要佢一條就畫一個裸女，而個裸女我就直情照住芳婷個look描述比佢聽，但係要係背脊度加返對天使翼，另一條，我要佢畫有個十字架，比好多鐵鏈鎖住咁。
係咪感覺好MK？哈！我既對象顧客係一班懶潮o靚仔，而家D大陸o靚仔潮流觸覺同香港D MK已經好貼近，所以呢D就啱架啦！呢D佢地先鐘意！
銀鈴指示我去買某種特定既顏料，佢話個D顏料易上色落牛仔布度，完成之後又唔會咁易甩返，我心諗就算你無畫野上去，D死人黑心牛仔褲都唔濕得水。
不過我當然都尊重佢既專業意見，但係我懶，所以就比左錢佢叫佢自己買，當然仲比埋人工個六十蚊佢啦！
銀鈴好開心咁話聽日會交到貨比我，我欣賞地點一點頭。
跟住，我拿出我部生活態度四，準備打一個電話。
呢個電話係打比我個friend，基本上佢係一個不折不扣既仆街，我地個個朋友都叫佢「禽獸聰」，我通常叫佢獸聰。
「喂！獸聰！」
「丫！你個仆街仔咁好死搵我？咩料？」
「無呀！你個個禮拜都上大陸浦架嘛！我想問你去開咩場？多唔多後生仔女？」
「你ON9架？唔多後生仔女去來托呀？依……等陣，你唔係無興趣架咩？叫過你幾次都話唔去架？想JOIN呀？」
「係呀！想JOIN埋你一齊玩。」
「屌！終於都大個仔啦你！識諗啦！我好感動……不過今晚唔得，有野搞，聽日啦！聽晚我同你上！」
「It’s perfect !」
呢個獸聰無野叻，但係講到浦，佢就真係浦到成精，我知道佢帶我去D場九成符合我心目中既目標，一切定妥，終於可以安安心心咁去搵個瓦遮頭訓返個靚覺！
到左第二日，我早早起身，因為今日有目的，所以花多D時間搞下自己個死人髮型，其實我都唔係咁識搞，皆因一向都無咩點理，有理無理照住D 咩春日韓台星咁SET返個飛輪海頭，照下鏡都尚算滿意。
食D野之後就去銀鈴度拎返兩條褲，唔知搞掂未呢？
去到銀鈴擺檔既地方，見佢高高興興咁交左完成作比我，哈！果然靠得住！
望一望兩條褲，嘩吓！果然藝術家即係藝術家，我D俗到不堪既要求，佢居然可以畫到咁Q型！充滿歐美風格，着上身落夜場真情係橫掃個隻！
一切就緒，我只待夜幕來臨，到左傍晚，我就係廣州車站等獸聰個死仔上來。
「喂！等左好耐呀？我專登架！吹咩？」
個仆街仔一到埗就係度九UP，而我亦舉起中指熱情咁迎接佢。
「WOW~戰鬥格喎！今日咁Q型仔，你個仆街唔好搶曬D女呀！大陸D女多到你唔信，飽Q死你呀！」
我一早就換好左銀鈴畫既褲，我簡左以芳婷做參考對象畫個條，因為只係我口耳相傳，所以個樣唔係話畫得好似真人，但係個裸女都索到啪啪聲！
「唔好咁多廢話，有好野益你！換左佢！」我係我個型仔Porter度拎出另一條褲，一手丟比獸聰。
「嘩！唔係要我同你着情侶褲咁嘔心下話？係咪靚野來架？我着開名牌子，CHEAP野我唔着架喎！」
屌！你個仆街仔D野我一清二楚啦！扮咩丫你，你返份BOY搵五千蚊個月，個個月上大陸跳舞呃蝦條，名你老味個牌子，佐單勞你都着唔起啦！
又同佢你屌我、我屌你一輪，佢先乖乖入廁所換左條褲。
「丫！又幾型喎！你個仆街仔今次果然有好帶挈呀吓！」
準備就緒！正式向呃蝦……SOR九RY，正式向宣傳大計進發！