一篇潮文改變一生: 第七章
如果呢個世界上真係有神，可以主導一切事情既發展，我真係想話你知，我屌你老味ON柒尻，你係咪痴撚左線呀？咩春野事呀到底？呢D咩尻情節來架？叫雞比公安拉呢D牛頭角陳師奶都諗到既野你都夠膽死比佢發生？而家你係咪即係玩尻我呀叫做？信唔信我一手插你屎眼再過肩摔摔到你個富貴仔屎眼爆裂呀？
可惜呢個世界始終無神，就算有都應該唔會怕我威脅，因為係呢一刻，我終歸都係坐左係個拘留室度，做左一個比人拉既叫雞人仕……
唔好見我係威係勢咁係度屌，其實我而家個心驚到仆街，練武丫練武丫？一個打九個又點撚樣？見到公安咪又成隻狗咁！一早我個仆街阿叔教我做貪官好過啦！
環觀四圍既人，大多都係西裝骨骨咁，都唔知係咪一放工就上來按邪骨，早就話左斯文多敗類，雖然今次我都敗埋一堆堆……
唔係真係要勞改十四日下話？唉！點同屋企人解釋好呀？話我返左青藏濟貧算唔算合理原因呀？
我以前睇戲，見阿周星馳用左一舊水加幾飛煙仔就連靶都唔洗打，唔知我身上D錢仲夠唔夠派呢？死啦！頭先見佢地都幾多公安架喎！一日最衰都係個死人仆街曾俊狗，又話派六千，搞咁耐都未到手，如果我要受牢獄之苦我一定會上街遊行，拉你個仆街下台！
等呀等！除左係度無意義咁等，白白浪費寶貴既青春之外，我都唔知仲可以做到D咩……
突然，一個公安走入來，望左幾望，指住我怒喝：「你！跟我出來！」
點解？點解又係我？行先死先，呢度咁鬼多人，你個個都唔搞係都要搞我？靚仔有罪咩？
不忿極都只可以跟佢行，我偷瞄到其他囚犯，望住我露出個一路好走既恥笑表情，唉！又係既，人係不幸既時候，最大娛樂就係恥笑D比你更不幸既人……
比個公安押到某個櫃台，心諗好彩而家唔係再用簿仔回鄉證，起碼唔洗比人蓋個「嫖」字……哎吔唔係喎！會唔會改為印係我塊面度，要我遊街架？
只見另一個公安放左一袋野上枱面，又喝我：「點返齊你D私人物件，係呢度簽個名就走啦！」
我差D以為我聽錯，隻眼碌到大個二次元生物：「吓？咩話？」
「咩呀？係咪唔想走呀？」
我即刻快過急口令：「走走！我走！」
仲點咩鬼丫！拿拿臨求其袋返好曬D野，撩隻龜，快快離開呢個鬼地方！
丫！到底咩事呢？大陸人而家真係咁有人情味？莫非見我一幅忠直樣，成個貴公子咁，唔捨得要我勞改？
懷住滿腔疑惑，離開拘留所，迎面就有一個高大既人行埋來同我講：「請問你係咪就係阿龍？」
「……嗯！」
佢好禮貌咁同我講：「龍哥，麻煩你來一來呢面，我地大佬想見你。」
嘩！咩事？江湖片呀而家？係大陸跟個陌生人走，係一件好白痴既行為，但係貌似係佢幫我出返來架喎！如果呢條友仔連公安局都搞得掂，咁小小一個我又可以點防佢呢？跟佢去搞清楚咩事都好！
我跟佢行左個街口，佢就指示我上一架泊左係路邊既歐洲車，嘩頂！一望架車就知車主非富則貴，係D MK先鍾意日本車架姐，我彎低身，看一看車內人係咩料，唔看尤自可，一看嚇一跳！
係喪威！
點…點都估唔到，呢個世界上，仲有人係咁唔九UP既，原來佢真係大有來頭……
見係一個都叫做認識的人，我安心上左車，同喪威一齊坐係後座，我一上車，佢同我打聲招呼之後，就指示司機開車前行。
「哈！阿龍，估唔到咁快就有機會比我見返你！」
我都估唔到，今次真係叫雞遇貴人：「威哥，今次真係唔該曬！」
佢豪氣咁拍左我背脊一下，大力到差D拍到我肺都甩埋：「妖！男人老狗客咩氣丫！你叫我喪威得啦！」
我再次點點頭，無言感激。
「阿龍，你今次真係唔好彩呀！係入面無野丫嘛！有無人烚你先，有你唔怕同我講喎！」
我搖搖頭：「無！咩事都無呀！」
「拿！我喪威份人就好簡單架姐！你桶我一刀，我一定桶返你廿刀；你救我一次，我就照你一世！以後有咩你同我講得架啦！遠D我唔敢包，廣州之內無野我照你唔起既！」
哈！呢種性情中人我至鍾意架啦！當然我講緊既係我無桶佢一刀既大前題抵下啦！
係喎！係大陸禮貌上要請人整返口煙仔，我正想話係個衫袋到拿包雲煙出來，喪威就先一步遞左支雪茄過我面前……
「整返支先再講丫！」
「……少食少食。」
我地又天南地北吹左輪，佢都簡單地知道我來自香港。
「係呢！阿龍你專程上來大陸搞咩呀？」
我輕嘆一口氣：「無！見仲後生，想話學人搞下D小生意咁姐！」
「哦？後生仔有大志！好丫！我至欣賞！咁你搞成點？」
「唉！唔好多提，遇人不淑，上左來無耐就比人搞到損手爛腳，而家個袋得返幾千蚊……」
我半側頭，以四十五度角既方向望向車窗外的藍天白雲，眼神中充滿蒼桑，就仿如一個係外國讀完MBA，帶住辛辛苦苦儲返來既幾百萬上大陸投資，點知比商場大鱷呃曬D積蓄既有為青年咁款！
我當然打死都唔會話佢知，我本金得五千，上左來唔夠兩日就比人因叫雞拉Q左啦！
喪威望住我個咁瀟灑蒼涼既側面，笑笑口安慰：「唏！後生仔，少少挫折唔洗無曬心機喎！我唔係睇少你，但係見你咁後生，都唔荒話真係帶左好多錢上來搞生意啦！係大陸，你o個三兩百萬真係好容易無架渣！」
「嗯！」我點一點頭，懶係振作咁望下佢。
佢又拍一拍我膊頭，依然係咁鬼大力：「阿龍！跌下碰下閒事來姐，後生仔話咩易東山再起！」
佢見我反應唔大，又同司機講：「喂！周仔，去漢陽路！(老作地名，免被起底)」
我唔知佢想帶我去邊，但係呢個環境，邊度都要跟佢去架啦！
唔洗一陣我地就去到目的地，喪威同我一齊落車，我見呢度雖然殘舊，但係都幾熱鬧。
喪威帶住我，行左陣，去到一棟唐樓，我望入去見到黑Q媽媽咁，忍唔住開口問：「呢度咩地方來架？」
「地下賭檔law！」
我頂！你叫我東山再起就係帶我來賭錢返身呀？咁我自己唔識過大海咩？
「威哥！」
門口一個小嘍囉狀麻甩佬，一見到喪威就必恭必敬咁招呼佢入去，而我亦只好跟佢走入呢個黑媽媽既地方。
一度行，喪威一度向我解釋：「呢個鐵檔來架！好安全，你大可以放心！」
唉！唔會比人拉，但係會比人劏呢！講賭點賭得贏d賭場架？
沿路而入，終於去到間大房，場內理所當然地燈光昏暗、煙霧迷漫，場內大概有七、八張賭枱，大多係玩d老式玩意：牌九、番攤、大細、魚蝦蟹……
張張枱都有十幾廿人圍住，宏喝聲此起彼落。
喪威領我到大細枱面前，問我：「你點睇？」
「大掛！」
「大咩呀大？我問你覺得呢檔野點？」
又傻仔左，如夢初醒咁答佢：「好旺呀！不過大煙左d law，但係呢d地方係咁，都無計。」
喪威撘住我膊頭話：「嗯！咁以後呢張大細枱係你架啦！」
「吓！」
「咩呀？睇唔起呀？」
我耍手擰頭：「唔係呀威哥，只不過做咩無啦啦……」
「屌！再咁婆媽打七你架！我知你諗咩，我無諗住叫你跟我，唔係下下都要社團中人先叫自己友既，話過同你做兄弟，咪當見面禮law。拿！老老實實，呢d細眉細眼既檔仔搵唔得幾多架姐，一個月十零廿萬倒啦！你咪當出住份糧先law！有咩大搞作慢慢再諗！」
我受寵若驚：「唔…唔係喎！」
佢有d不耐煩：「唔咩春丫！諗諗諗，射精又唔見你要諗……細鬼！」
一個短髮瘦削，面掛賊笑，一睇就知最叻睇人眉頭眼額o既o靚仔走左埋來，向喪威道：「係！有咩吩咐威哥？」
喪威反手拍一拍我心口，我肯定同佢做多幾年朋友我九成會內傷：「呢個叫阿龍，你認住佢，後面個張大細枱以後d收入就交曬比佢，你每個月埋數分返開筆錢啦！」
細鬼即時醒水：「收到威哥！你好呀龍哥！」
喪威又轉向我續說：「拿！阿龍，你以後逢月頭就搵呢個仆街仔收數得架啦！唔得閒o既話你可以唔理，佢會同你計返，呢個仆街仔都幾醒目既！」
我始終都係未接受到，支吾以對！
之後我ON居居咁又同喪威同細鬼傾多左陣，之後簡單咁交換左連絡方法，喪威就話佢有野搞要走先，仲問我有無地方要去，有就車埋我，我拒絕左佢，諗住四圍行下。
離開左賭檔，自己一人係大街度四維踱，想比風吹醒下個頭腦，係呢一刻就更清楚自己原來無咩腦……
簡單整理下而家既資產總值：現金3275蚊，外加兩包雲煙……仲有一張賭枱！