《前度超渡師》: 第四十四集-嶄新人生（二）
入到去，我真係不敢相信呢度竟然係我嘅屋企，自問小弟都未試過住一間咁大嘅屋企，細個住政府公屋，一個一房二人單位公屋有幾大，相信各位都一清二楚。自細到大都係做廳長，係到讀完書先開始有啲錢，就同阿媽租咗一間大啲啲嘅居屋嚟住，而我係去到呢個時候先至有自己嘅獨立房瞓。
-
不過而家，特大豪華客廳，大主人套房連套廁，幾間客房呢啲當然不可缺少，三層大豪宅再加一個後院，個後院係大到可以約晒成班朋友過嚟燒嘢食、開Party，甚至玩一個full-gear版露營都仲得，間屋嘅size可以話係幾何級數咁增大。
-
細個想住大屋嘅幻想，呢刻竟然可以成真，只不過想分享嘅對象偏偏喺十幾萬公里之外嘅地方，距離再加上時間，咁點傾呢？
-
好彩嘅係，即使大家相隔好遠，但呢個世界有樣嘢叫「智能電話」可以聯繫，唔使好似以前咁樣寄信，寄完又要等一頭半個月，而且遺失嘅機會都唔細。大費周章寫咗一大段嘢，當你心思思諗緊對面收唔收到嘅時候，點知對方回信寫返嘢俾你，你呢刻先知道，原來係收唔到你嘅來信嘅，咁大家又點可以繼續透過書信傾偈維持關係呢？智能電話真係改變呢個世界，大家溝通唔再受時間地點限制，想傾就傾。
-
拋開個話題太遠，講返我哋呢邊。放好啲行李之後，我哋同阿媽加埋腎仔嚟一次視像通話，俾佢哋睇下我嘅新屋企，佢哋都不約而同，嘩然有一間大屋，暗示對呢度嘅生活有啲羨慕。喺對話中，我透露隔離有一間吉屋可以俾佢哋租，而業主就係親家嘅阿嘈爸，代阿嘈爸問佢哋有冇興趣搬過嚟生活，而且阿嘈爸可以俾折扣我哋一家人去租。
-
以我對阿媽嘅認知，佢應該會唔捨得遠岸嘅環境而唔過嚟，至於腎仔，因為佢經濟能力唔算十分好，而應該唔會過嚟長住。雖然都知佢哋冇興趣，不過都循例問下啦，話唔定真係有驚喜呢！
-
無論點都好，我都係要俾少少時間佢哋思考下，沉澱一下呢個決定，話晒要放棄多年習慣嘅生活，重新適應。而我同阿嘈就梗係借住呢個機會二人世界，一路探索呢個新地方，同時間都一路認識阿嘈。
-
不過睇嚟呢個二人世界都應該好快就要講再見，點知佢哋兩位睇完我哋嘅居住環境之後，都即刻答應要過嚟一齊生活，雖然唔知係真講定係搞笑，又或許阿媽真係好想我快啲娶走阿嘈，又或者唔知乜嘢原因都好，當我聽到佢哋有興趣過嚟都有啲愕然，但又有啲開心，至少可以大家一齊繼續相處。
-
至於我哋幾時出發，玩呢個二人世界？咪就係而家！仲等咩啊？佢哋兩個電燈膽就到㗎喇！廢話少講，即刻嚟一場公路旅行。
------
「去去武器走！」估下我哋喺邊度？
-
我哋去九又四份三號月台搭火車去到霍格華茲校園，同哈利波特飲住牛油啤酒咁學魔法，落堂之後打咗一場魁地奇，夜晚去咗飯堂分學院揀位坐，大家估下我同阿嘈分到咩學院？以我同阿嘈聰明又勇敢嘅性格，梗係非葛來分多學院莫屬。
-
當然呢啲梗係呃你㗎啦！我哋身處緊喺呢個人山人海嘅哈利波特博物院，同緊入面啲公仔互動咋，雖然呢度好大，但呢度人多到好似維園年宵咁，大家你推我撞，目的就係為咗同心儀嘅公仔影相，體驗一下做魔法師嘅滋味。
-
可惜人太多，遊戲體驗真係欠奉，由魔法師搖身一變成為瘦身師，俾遊客夾兩夾，即刻瘦咗一個碼，去到英國，唔係個人瘦，係個銀包瘦得快，成日食好嘢，又周圍去玩，當然就瘦得快啦！
-
話說喺英國嘅呢一個月裏面，同阿嘈踏遍唔同嘅大城小鎮，第一次一齊體驗一個新環境，一齊適應呢度嘅文化，以前喺香港，做咩都講速度，行街要快、搭車要快，總之做任何嘢都要快，但去到呢度就完全唔同，呢度啲人鍾意享受生活，唔同時間競賽。
-
當然最大轉變就真係語言，以前無論喺邊度，總之見到啲唔順眼嘅嘢，都可以路見不平出聲幫手，去到呢度，語言不通真係令到我變鵪鶉，基本出街做啲必需對話就還好，例如去餐廳點餐、搭巴士買車票真係冇問題，但去到同啲鄰居閒話家常就出事，err到冇朋友，平時用開嘅諺語、潮語去到呢度完全唔識，借問「hea」、「A0」點樣翻譯呢？語言真係一個好大嘅障礙嚟。
-
真心嗰句，有冇後悔過嚟，我可以好肯定咁答你，完全冇後悔。呢度嘅環境同自由嘅空氣真係喺以前嗰度係搵唔到，你未體驗過喺呢度生活就唔好話差先，我唔係話以前嘅居住地唔好，而係當有比較嘅時候，人嘅潛意識會不斷比較邊個好啲、邊個差啲，就算係親人、女朋友都會攞去比較，憑著自身嘅經驗加上人哋嘅分享去比較。
-
我唔信你唔比較喇，去餐廳食嘢都比較價錢、環境、食物質素等等，甚至去到選擇另一半都會考慮樣貌身材性格，分分鐘都可能比較埋床上技巧啦，係唔話俾你知道啫。
-
成日話淪為二等公民，但呢度二等公民啲福利都唔係差得去邊，拍得住喺以前嘅地方做所謂嘅「一等公民」，唔同嘅福利不在話下，最緊要個環境真係舒服好多，地方大又舒服。
-
你話物價貴，就好似之前有報紙話呢度啲牛油貴，賣成90蚊港紙一盒，望落條數係貴，但盒牛油1kg喎，平時喺呢度200g都30蚊港紙一盒啦！雖然我知佢哋首要任務係抹黑外，歌頌大佬，但都唔使咁無腦去為寫而寫嘅。
-
Anyway，都決定紮根喺呢度，阿媽同腎仔都即將過嚟生活，唔知將來會唔會再去其他地方生活，至少呢一刻會住喺呢度先，好好享受一下得來不易嘅自由空氣。
-
地方只係一個俾你哋相處嘅載體，就算離開咗所謂嘅「家」，只要邊度有人，邊度就係「家」。
-
（待續 To be continued）
IG：chingchingstory