《前度超渡師》: 第四十三集-嶄新人生（一）
見到千億造價嘅大白象大橋就已經知道距離機場唔遠，私家車上冇巴士自動報站嘅提示廣播，反而有腎仔嘅親切提示，打破車廂嘅沉默，大家開始寒暄，為旅程嘅最後帶上一啲微笑。
-
機場，係一個有人歡喜有人愁嘅地方。
-
喺L7嘅離境大堂，有唔少人都係離別要分開嘅地方，或許分開之後，唔知幾時先再見，大家永遠都係「離港」兩字前相擁而泣，盡訴離別不捨之情，同時間都有人喺度留下倩影，記錄友誼可以長存，唔會因為距離而影響彼此嘅關係。
-
相反落兩層嘅L5抵港大堂，個個都充滿笑容迎接佢哋親朋好友，大家因為唔同原因而四散東西，都終於可以喺呢刻再相聚，即使幻想可以好冷靜咁迎接闊別多年嘅親朋戚友，不過當見面嘅時候，難免掩飾興奮嘅心情，衝上前擁抱一下，然之後不斷分享呢幾年冇見之間發生嘅瑣碎事，即使長時間冇見，大家嘅友誼仍然健在。
-
真正嘅朋友唔需要成日見面，但大家心入面都會有對方嘅存在，無論大家身處何地，但彼此嘅友誼都會繼續喺度。
-
同一個地方，所記載嘅感情都唔同，唔知你喺機場留低邊一種感情呢？
------
辦理完登記行李手續之後，尚有一啲空閒時間，大家決定喺機場遊走一下先入閘過關，我哋都把握最後嘅相處時間喺周圍留下倩影，無論係「離港」大字之下嘅例牌打卡位，定抑或入口記錄香港飛行邁進一大步嘅「沙田精神號」模型，甚或抵港大堂兩旁升降機外牆新增嘅電子瀑布，總之可以打卡影相嘅地方，大家都留下回憶。
-
我隨手拎起一架手推車，邀請咗阿嘈登上我嘅「超級跑車」，喺一條無人辦登機手續嘅走廊高速奔馳，腎仔就做隨行攝影師追住我哋拍片，大家歡笑聲不斷，彷彿成個客運大樓都聽到阿嘈坐驚嚇戰車嘅尖叫聲，而腎仔都不遑多讓，搶走阿嘈嘅皇位，繼續由我擔當「柴可夫」，高速遊覽機場，大家一齊笑、一齊叫。
-
呢個時候大家放低瞬間離別嘅悲傷，取而代之嘅係用歡笑遮擋，大家就好似當離開冇咗一回事咁，全神貫注去玩。
-
玩咗一陣，時間都差唔多，係時候要入閘，大家整好自己嘅衣著迎接最後嘅道別。從一號客運大樓嘅尾端沿路行去頭端嘅南面離境閘口，沿途上一直有唔同旅客喺度抱頭大哭，佢哋同我哋一樣都知道，呢刻過後大家都唔可以再好似以前咁輕易相見。
-
穿過一系列嘅商店，最終嚟到分離嘅地方-離港閘口，我同阿嘈再次檢查所有旅遊證件加文件。我轉身攬住腎仔，多謝佢呢幾年嘅陪伴，最後就梗係攬實阿媽，要離鄉別井生活，難免會有不捨。我堅強忍住眼淚，唔俾佢流出，點知我真係忍唔住，當住咁多人面前流下一行男兒淚，而阿媽喺度安慰我，話唔使緊張。
-
我根本冇乜點聽到，我淨係倘喺阿媽嘅懷抱入面，喊聲不斷，就好似小朋友咁樣，享受最後一刻母子時光，不過最終我都係放咗手，要去踏出呢一步。
-
面對閘口準備入閘，我收返自己嘅眼淚，背對住佢哋，掃描護照入閘，我擰轉身望，阿媽同腎仔對住我哋揮手，阿媽大叫「小心身體」，而我同阿嘈都揮手回應，呢刻我真係再忍唔住眼淚，一路揮手，一路繼續對住佢哋強顏歡笑，繼續行入去保安檢查區，我都不斷擰轉望下佢哋，佢哋亦都望住我哋笑，一直喺度揮手，直至彼此消失喺大家嘅視線之中。
------
出到去機場禁區，我同阿嘈都慢慢收拾好心情，搵咗一個咖啡店坐低休息一下，窗口望住好多飛機喺度升降，每一班機都承載住嘅係希望，不論係去旅行定係移民，相信你去旅行，一定好期待接著落嚟嘅行程，或者你移民都好，都會期待去到新地方會有一個點樣嘅新生活。
-
而我呢，對嚟緊嘅生活當然充滿希望同期待，去外國旅行就去得多，但喺外國生活就真係未試過，而呢刻嘅我即將可以踏上新旅程。
------
十四粒鐘之後，終於都可以呼吸一淡新鮮嘅自由空氣，出咗禁區之後，已經見到阿嘈嘅屋企人喺度迎接我哋，阿嘈嘅屋企人即使隔咗咁多年，個樣依然無變，外表威嚴但內心好warm嘅啊爸，同埋一個和藹可親嘅阿媽，寒喧一陣之後，就跟住佢哋坐車去阿嘈位於英國嘅家。
-
經過咗一個鐘頭鬆啲嘅車程之後，已經由市區去到郊區，一幢幢嘅高樓變咗做一間又一間嘅別墅，門口仲有個車房俾你泊車，試幻想一下如果喺地球嘅另一端，你打一世工都供養唔起。
-
「咩……咩話，我同阿嘈係呢間？」落咗車之後，兩位長老放低我哋嘅行李之後，去咗隔離單位開門，而我就望住佢哋呆咗。
-
「一個家庭一間呀嘛，你哋兩個都係一家人啦！」阿嘈爸風趣咁講。
-
「幾時叫埋你阿媽嚟？」阿嘈媽接著關心我阿媽。
-
「叫埋一齊住好似唔係幾好喎。」係囉，無理由老婆老母一齊住，好容易有婆媳關係㗎嘛，雖然我知阿嘈同阿媽嘅關係都唔差，但「相見好，同住難」。
-
「隔離嗰間都係我哋㗎喎，如果你要，我哋可以女婿價，平租俾你喎。」阿嘈爸趁機sell我，睇嚟想阿媽過嚟。
-
「俾啲時間我諗下先。」我就冇咩所謂嘅，當然要睇下阿媽得唔得，如果可以，當然腎仔都可以過埋嚟。以前好渴望住洋樓、養番狗，可惜貧窮限制咗我嘅想像，而家既然有得生活得更加好，係咪應該報答返屋企人先呢？
-
（待續 To be continued）
IG：chingchingstory