《前度超渡師》: 第四十五集-嶄新人生（三） 結局
我哋呢個「家」，而家就移師去英國，拓展一下自己嘅版圖，順便俾自己一個喘息嘅空間，唔在喺狹窄嘅城市生活。只不過生活都需要錢嘅，唔通我哋唔返工，一家人喺度坐食山崩咩！
-
先講最冇生活壓力嘅阿媽先啦，阿媽就梗係慢慢食佢嘅退休金安享萬年，辛苦咗人生咁多年，又養家又打理好呢頭家，去到老年就梗係輕鬆享受一下人生，而我作為「孝順」仔仔，當然都有俾家用阿媽去用啦！
-
隔離嘅腎仔知道自己冇學歷，唔可以去科技或者金融界佔一席位，加上語言不通，難以融入外國嘅公司。與其去到外國做嘢被人歧視，倒不如試下創業，一嚐做老闆嘅滋味，既唔使受外國人歧視，又可以自己掌管小生意，賺返嚟嘅錢全部自己袋。
-
不過而我所知，腎仔對飲食業嘅興趣唔大，再加上每日要返餐廳搏殺咁困身，一個人一腳踢做晒又會冧檔，如果請人負責做樓面、廚房，但又驚佢哋做唔掂，佢哋唔熟手又驚拖累檔生意，做到熟手又會另起爐灶，左驚驚右驚驚咁，所以從視像通話得知，腎仔打消咗做飲食業呢個念頭。
-
腎仔諗咗一陣之後，最後選擇做佢嘅老本行，計劃喺英國開返間「前度超渡株式會社」，幫返受前度困擾嘅港人，話晒邊度有人，邊度就有感情問題。再加上而家移民潮去到一個巔峰嘅地步，每日都有唔少人移民，咁感情問題都會隨住呢段移民潮而應運而生。
-
移民、long d、唔適應新環境，再加上唔同嘅因素，分開嘅人唔少，分開嘅港人更加唔少，至於上文提及嘅語言隔膜，呢個時候喺英國已經可以放心啦，淨係接待分手嘅港人都夠做。
-
腎仔想搵返我一齊合夥，畢竟大家共事咗咁耐，習慣彼此嘅工作模式，又對「超渡」前度嘅步驟咁熟悉，有我喺度對發展佢嘅事業肯定輕鬆好多。
-
可能腎仔預咗我哋會幫手，一齊搞檔生意出嚟。但係我覺得與其再做「前度超渡師」，不如試下跳出自己嘅框框，試下發掘其他興趣，冇理由做一份工就做成世㗎嘛，況且我相信即使腎仔冇咗我，都可以發揮得好好，靠住呢盤小生意養活自己，唔使因為啱啱開展事業，喺英國嘅口碑又冇以前喺香港咁好，唔使擔心一開頭搵得唔多又難出糧俾我哋。
------
正當我諗緊呢度有咩工作可以適合我嘅時候，我突然諗起我細個係好鍾意寫作，一得閒就會拎起電話，瘋狂打打打，無論散文定係長篇小說，都難我唔到，當然人氣欠奉都係冇乜人睇啦，最後因為生活所難而打沉呢個寫作嘅興趣，既然而家有時間又有資金，不如再揸返支筆，再重拾自己嘅興趣啦！
-
重新開筆嘅第一個故事梗係要寫得爆啲先吸引讀者嘅眼球，但又諗唔到寫咩，又冇乜特別爆嘅靈感，唔通寫點樣移民？傻啦，出面大把教學，仲要資料鬼咁詳細，大家都知今次移民我淨係負責買機票同執嘢，生活住宿一早有人安排好，咁你答我點樣寫移民教學喇！
-
正當我輾轉思考寫咩嘅時候，突然靈機一動，我決定將咁多年做「前度超渡師」遇見有趣又特別嘅個案，用文字記載落嚟，一路重新審視以前啲個案，一路回味返以前做「前度超渡師」嘅熱誠，將個案同埋自己嘅抒發，寫成一本書，中間又可以加下啲失戀筆記，記錄埋年少無知追女仔嘅失敗嘅經過。
-
呢本書一於就叫《前度超渡師》，第一個故事一定要由毒毒嘅水泡男做開始……睇住唔同經驗嘅人對處理一段關係完結，到底係用咩方法，由A0第一次拍拖，到經驗「玩家」老手，最後仲要迎接一個唔應該出現嘅小生命。唔知你又點睇佢哋嘅行為，唔知又對我嘅「超渡」有冇啲咩評價或者建議呢？歡迎留言同我講，等我改善一下我嘅「超渡」技術。
-
無論你哋受情困擾，定係幸福美滿，都可以一睇小弟「超渡」嘅經驗，話唔定你又有一番新體會呢！令到你可以放低前度，重新投入一段新感情，或者睇到呢啲咁慘嘅故事之後，話唔定可以令到你更加珍惜對你好好嘅另一半。
-
雖然同大家分享以前事主嘅個案，無可否認違反當初嘅條文，雖然違反條文都冇懲罰，亦都冇理由自己懲罰自己咁無聊。相信大家都記得條文最重要嘅就係保障事主，不過我而家都唔再係前度超渡師，違反又有咩所謂喎。反正條文又係自己寫，大不了幫自己釋法囉，我就係咁無賴㗎喇！吹咩！
-
寫小說一定要戴返個頭盔嘅：
-
「本故事純屬虛構，如有雷同，實屬不幸。」
-
至於以上嘅故事係真定係假，聰明嘅你就自己領略下，細心咀嚼一下字裡行間嘅深意！
------
文章嘅最後，希望大家知道，前度，係每一個曾經拍過拖嘅人都會有，分手可以係開心或者難受，開心嘅就係可以放低一個差嘅，可以再次投入一段新感情。
-
放低嘅時候大多都係難受，唔係個個人都可以認真放低，再投入下一段感情，「前度超渡師」嘅職責就係幫助客人，令佢哋嘗試放低前度。
-
「前度超渡師」唔可以改寫佢事主嘅記憶，發生咗嘅就係發生咗，作為「前度超渡師」改變嘅係佢嘅未來、改變佢未來對人做事嘅做法。要佢知道前度雖然有唔好嘅回憶，但都要嘗試放低，唔可以俾前度繼續影響佢嘅生活，等事主可以繼續幸福落去，無論第時會有另一半又或者繼續單身，都唔會因為前度而後悔咁生活落去。
-
我哋「超渡」唔係一個高光，唔值得攞光環嘅工作，畢竟都有機會影響到事主以外嘅人，要佢哋浪費時間幫事主去放低，亦都經常俾人話為咗事主而傷害事主以外嘅人，令到佢哋麻煩，但為咗事主，我在所難免，要戴上「衰人」嘅頭銜。
-
但我永遠最自豪就係自己係一個「前度超渡師」，最渺小的位置，但最拼命，這是霸氣。
-
《前度超渡師》正文 完
-
番外篇、後記 有緣待續
IG：chingchingstory