《前度超渡師》: 第三十七集-忘不了的妳（十二）
而我嘅事業、我嘅屋企人通通都喺香港，之前感性上嚟梗係想直接陪阿嘈去外國展開新生活，到我理性嘅時候，我會諗到好錫我嘅阿媽、一個親手打造嘅事業，我唔可以話「前度超渡株式會社」搞得好好，但起碼可以養活我同阿媽、仲有我嘅好朋友，多年嚟嘅合作夥伴-腎仔呢。
-
無論點都好，都係要決定要拋棄照顧我好多年嘅阿媽……返工作室同阿嘈瞓覺啫，唔通夜晚嘅「造人」活動俾阿媽撞破咩？我尷尬、阿嘈尷尬、阿媽仲尷尬，所以食完飯都同阿媽道別，返屋企再玩夠本！
-
五光十色嘅通菜街即使去到夜晚都非常熱鬧，有人排隊買「臭名遠播」嘅臭豆腐同即炸即切嘅邪惡肥膏炸大腸，而鄰鋪售賣嘅係一隻又一隻活生生嘅昆蟲，究竟係相映成趣定係大減食慾，從長長人龍應該睇到，即使隔離有令人聞風喪膽嘅昆蟲，甚或後巷精靈活潑嘅老鼠，都排到長長人龍就知道呢間餐廳嘅出名程度係遠近馳名。
-
熱愛排隊嘅香港人見到有隊點會唔排，而作為香港人嘅我哋梗係排埋一份，無懼身邊惡劣嘅污糟環境、無懼身邊有唔同嘅動物，總之夠好食同臭就得。
-
只可惜人流如卿嘅場景不再，因為間鋪頭已經敵唔住時代嘅變遷而消失於太子街頭之中，取而代之嘅係吉鋪一間，等待有錢人再度投資充滿歷史意義嘅鋪頭。
-
如果大家有行開金魚街，相信對呢間鋪頭嘅味道非常深刻，鍾意食嘅人會覺得好香、好好食；相反討厭嘅人聞到浸味會避之則吉，甚或會兜路走。無論你鍾意又好，唔鍾意都好，間鋪頭已經唔會再重現喺大家眼前，油炸時發出嘅臭味都唔會再有，大家又少一個集體回憶。
-
沿著西洋菜南街南行，旺角嘅熱鬧唔同以前，街邊高質嘅表演已經被大媽舞一步一步侵蝕。劣幣驅逐良幣，一班高質表演者睇唔過一班大媽搞到呢度烏煙瘴氣，唱得難聽唔緊要，但最大問題係賣弄美色。好心啲姨姨五十幾歲就唔好以為自己仲係十八廿二，大把客仔先得㗎！慨嘆仲有一班伯伯不斷打賞支持，跟住啲大媽又以身相許答謝打賞，搞到條街變咗流動雞場，核突到死，而且個喇叭仲要大聲，慌死你哋聽唔到大媽們「精湛美妙」嘅歌聲。
-
由一個俾自己展露技能嘅地方，變成一個賣淫場所，係人都睇唔過眼啦，所以條街逐漸被一班賣淫嘅大媽佔據，即使去到夜晚九點，條街佔得最多唔係一對又一對後生情侶，而係一班大媽表演者同打賞阿叔，真真正正嘅年輕人已經去咗第二度發揮自己嘅專長，可惜政府大大收窄表演範圍，但同時任由一班大媽污染充滿生氣嘅旺角。
-
穿過行人隧道，逃出難聽嘅歌聲之後，迎接我哋嘅就係一個又一個企街嘅性感大媽。當然大家都知我哋唔係要上去出火，況且我身邊有個大美人，何解要俾錢吉一個老auntie呢？
-
返到屋企梳洗，勞碌嘅身軀隨著沖涼液沖到大海，換來嘅係輕鬆嘅心情，大家坐喺床睇電影，一路睇住電影，一齊展望緊未來。
-
「我要第時同你一齊喺英國生活，一齊砌雪人、一齊飲住熱朱古力行聖誕市集……」
-
阿嘈講咗好多想同我一齊做嘅夢想，可惜呢啲偏偏都係同前度一齊做過，阿嘈講過嘅每一個地點、做每一件事，所記載嘅回憶一切與我無關，唯獨阿嘈想再一齊嘅人，就係我；想繼續創造回憶嘅，都係我。
-
［然後我，然後我，恨不得當初，懂得愛惜你。］
-
想當初，講分手嘅係我，但唔捨得嘅都係我。我係咪一個玩感情嘅人，我覺得自己唔係，可惜現實證據上顯示我係一個仆街。當年正正因為對阿嘈嘅感情淡咗，大家生活入面開始冇咗大家，再加上外在嘅時差因素，大家有各自新生活圈子，而我就選擇分開，決定放低「感情」呢個包袱，遠方阿嘈內心諗咩？我都唔知，或許佢接受到Long D？或許佢接受大家冇喺現實相見，只要心中有大家就接受。
-
可惜我真係接受唔到，淨係單靠心靈上嘅陪伴就一齊，even大家有時差，究竟有幾多時間真係坐低傾電話談心呢，深宵明明就係最佳談心時間，我深宵嘅時候，佢先啱啱開始入夜，展開精彩嘅晚上；好唔容易捱到阿嘈嘅深宵時段，Sorry我已經到日頭，迎接第二日嘅生活。
-
大家唯一坐低冷靜傾心事嘅時間都冇，又點可以維繫呢？難道靠嗰幾隻字嘅text chat就可以維持。冇可能啦！大家有各自嘅忙碌，都係簡單講下自己喺邊、做緊乜嘢，名義上報備，令對方放心。每日嘅忙碌加上時差，又點可以有空閒時間互相認識大家，一齊走過漫漫長路。
-
［你要走，我要追車，彼此生存路線，各有月台。］
-
種種因素加埋，即使所謂嘅「心中」有大家，但連心靈嘅陪伴都冇，又點能夠繼續一齊？橫跨九千五百公里距離，唔見得、唔傾得，乜嘢都唔做得嘅時候，理所當然對阿嘈嘅感情會淡。
-
至於阿嘈有冇對我淡，我就真係唔知。我知道分手當刻，阿嘈曾經有挽回過呢段感情，我知道佢唔想分手，亦都覺得即使隔住咁遠，只要心中有大家就足夠。佢心中有我，但我心中已經將佢淡出第一名嘅位置。我唔係唔鍾意佢，而係冇連繫真係好難維持段掛名名份。
-
放低佢嘅係我，同時放唔低嘅都係我，當初忍心割愛，好聽啲講就為咗阿嘈幸福先分手，現實上係我對佢嘅感情已經淡咗，我已經冇以前咁愛佢。
-
人往往去到失去先識得珍惜，自從生活上少咗阿嘈之後，就開始唔習慣，冇咗阿嘈嘅親切嘅虛寒問暖、冇咗阿嘈乖巧嘅報備，總之有阿嘈嘅生活，通通消失於分手之中，回復單身，都很覺荒涼。
-
（待續 To be continued）
IG：chingchingstory