《前度超渡師》: 第三十六集-學生媽媽（五）
「我就係BB嘅經手人，我好後悔當初做咗呢個決定，並不負責任咁走咗去。
-
尋日前度超渡師搵咗我，佢同我講：知唔知我爽完之後，個女仔要背幾多嘢？我真係唔知，我淨係知道我搞完就可以消失喺佢嘅面前，以後都唔會再關我事。
-
我尋晚上網睇，原來落仔個感覺係好慘，當胎兒喺胎盤攞出嚟嗰一刻，真係好難受，想塞返入去已經唔得，原來呢次見面就係媽媽同BB嘅第一次見面，亦都係最後一次，我唔想你攞咗胎盤之後先去後悔，我就好想你Keep住個BB。
-
我覺得自己係壞咗嘅男人，咁樣傷害你、咁樣傷害你屋企人。聽完你屋企人講嘅嘢之後，我好內疚，覺得自己係一個仆街，所有責任都俾你孭，而自己就朦然不知。
-
我好想成為一個真真正正嘅男人，想負返因為一時貪爽而有BB嘅責任。或者你哋已經對我失去咗信任，覺得我之後都係會揼低你哋，繼續風流快活，但我保證，唔會再有呢啲事發生。我想好好照顧你肚入面嘅BB，想佢有一個幸福嘅家庭，有父愛、母愛可以享受。
-
我錯喇！我真係知道錯喇！你哋可唔可以俾次機會我？」
------
成場嘅人呆咗，望住尷尬嘅男仔，真係衝出嚟……認錯。
-
場面係好尷尬，個尷尬程度係媲美同高層開緊會嘅時候，突然有個三唔識七嘅閒雜人等飆咗上嚟會議室。
-
「人誰無錯，我以前都係一樣，我都係貪爽而喺學生時期成為爸爸，我都好明白落咗個BB對大家都好，又可以繼續追夢。最緊要係，之後唔使負咁多責任呀嘛！
-
當你做咗爸爸之後，你會好想保護自己個女，你就算自己幾辛苦返工賺錢，都好想個女有個幸福嘅生活，呢刻你係唔會明白呢種父愛大過天嘅感覺，我理解到嘅，因為你唔想要個女，覺得係負累。
-
唔知係你真心想回心轉意定係想繼續呃我個女，我都唔緊要，最緊要你呢刻開始，應承我個女要負責任，過去嘅事我就當粉筆字抹咗去，但前提你係真係可以照顧我個女，同埋我個孫。」
-
爸爸講咗一大段道理，而跪低嘅男仔早就喊到收唔到聲，不斷點頭表示收到。
-
「多謝你哋俾呢次機會我，我一定會好好照顧媽媽同BB嘅，唔會再揼低任何一個人！」男仔連忙答謝各位嘅俾多一次嘅機會，相信佢應該可以改過自身。
------
大團圓結局，幾好啊！唔係大家都想睇到呢啲結局嘅咩？定係大家鍾意悲慘嘅結局咁呢，話晒可以食下花生呀嘛。
-
可能大家都覺得啱先啲劇情真係好膠，就開始抄襲大台啲膠劇情，爭在未上天台BBQ咋。個男仔棄暗投明嘅轉折位真係好九唔答八，一個壞男人點解可以即時變好，究竟係用咩魔法先可以咁做？
-
冇錯，現實就係有好多荒謬又無理頭嘅事，男仔嘅劇情完全冇套路、完全唔係同我哋溝通而做出嚟，當然佢係真心改過定抑或繼續欺詐當事人，我哋就不得而知啦。當然我哋都希望佢真係會全心改變自己啦！做返一個男人應該有嘅責任。
-
我作為前度超渡師，成日面對唔同嘅個案，好多case都係出乎意料之外，點樣化解一切嘅難題就係我哋嘅工作挑戰。
-
需要我去「超渡」嘅客人多不勝數，可能要「超渡」嘅要求都橫蠻無理。正正就係因為咁，我哋可以改變客人嘅諗法。當客人轉牛角尖嘅時候，我就係黑暗中嘅明燈，引導客人重回正軌。
-
講就兇狠，做就碌撚，講到尾，咪又係為份糧，邊有人返工咁講熱誠㗎。眾所周知，香港人最大嘅訴求就係返工，作為奴性最重嘅香港人，梗係返工行先啦。
-
唔經唔覺已經日落西斜，喺啱先男仔嘅道歉之後，佢哋兩家人傾咗好多偈，從日常生活到做人經驗，無所不談，而我哋三個，完全融入唔到佢哋嘅話題。白白聽咗佢哋談心兩個鐘。
-
客人永遠是對的，當然我哋都唔會催客人走啦，咁樣係唔啱㗎！
------
終於都到晚餐時段，記唔記得今晚約咗邊個呢？約咗阿嘈實在係正常不過，係今晚特別啲，約咗一個重要嘅人，同時要去一個地方食飯……
-
「媽！我返嚟食飯喇！」
-
約咗嘅唔係邊個朋友，而係我阿媽。成日都想我帶女仔上去食飯，而家開心都嚟唔切啦！
-
「家嫂隨便坐吖，好快食得飯㗎喇！」阿媽見到阿嘈已經興奮到不得了，見到我拖埋阿嘈已經要劏雞還神。
-
呢餐飯就係好似玩緊你問我答，阿媽不斷追問阿嘈嘅故事，而訓練有素嘅阿嘈對住呢啲問題當然迎刃而解，又可以氹到阿媽笑到見牙唔見眼，所以都話阿嘈係好女仔嚟。
-
食完飯，阿嘈想幫手洗碗嘅時候，就俾熱愛做家務嘅阿媽一下阻止，話家嫂唔使做家務，開心開心咁俾我寵幸就得。而我當然就俾阿媽捉咗入廚房問話。
-
家嫂係攞嚟錫，但家嫂嘅男朋友就攞去奴役，咪就係奴役我去洗碗，一路洗碗一路俾阿媽教落點樣留住女人嘅心，作為溝女無數嘅我（同時都係失敗無數），當然得心應手啦！
-
同阿媽對話嘅同時，我都同阿媽講，我哋會搬去工作室到住，之後都可能同阿嘈去外國生活。阿媽喺對話入面都默默表露唔想我嘅離去，話晒佢都係得我一粒仔，而我遠走高飛之後，香港再冇任何親人陪伴阿媽。
-
企喺婆媳關係嘅中間真係好辛苦，一方面要迎合下半生同下半身嘅幸福，即係阿嘈，佢想繼續去外國發展；同時我又要滿足上半生照顧我幸福阿媽，佢又想我留喺香港陪伴佢……
-
去定留，我真係唔知啊！
-
（待續 To be continued）
IG：chingchingstory