《前度超渡師》: 第三十八集-忘不了的妳（十三）
唔捨得係有，唔習慣都係有。咁又點，明明她已離開你，同埋「分手」呢句都係我開口先，憑咩唔捨得、憑咩唔習慣，一切都係自己攞嚟。
-
「人總需要勇敢生存，我還是重新許願，例如學會，承受失戀。」
-
遠方嘅阿嘈，放唔低我就決定重遊舊地，單人匹馬回流香港刮我出嚟，因為佢好愛我。而我呢，講就好愛喇，但又冇佢咁癲過嚟搵我。當阿嘈搵我嘅時候，我又話自己好愛佢，再相處、再認識嘅時間都冇，就即刻一齊。十幾年冇見嘅光陰入面，大家轉變咗啲咩，唔知，大家心態上改變咗啲咩，唔知。我哋冇嘢知，淨係知道呢刻一齊咗。
-
愛，講出嚟係冇用嘅，做啦！
-
彌補十四年嘅光陰，同時亦都要為阿嘈嘅人生負責，又要兼顧自己嘅事業。我哋已經唔再係天真無邪嘅細路，唔使諗之後嘅將來，淨係享受當刻拍拖嘅快樂；而係我哋都要規劃人生嘅下半部分，要大家有一個好好嘅共識先一齊。
-
「攞你本passport嚟吖，我要訂機票！」阿嘈急住要我本護照，證明要離港嘅日子唔遠。
-
「你諗住幾時走啊？我要預時間執嘢，我要去埋我想去嘅地方，見埋我要見嘅人。」生活喺香港二十幾年，好多嘢都好想重新再望多次，望多次香港嘅變化，用自己眼睛更新自己對「家鄉」的認知。
-
可惜時間唔等人，冇半年、冇一年咁長。而係……
-
「就下個月十五號啦！速戰速決，你冇咩要搞，淨係俾passport同少少個人資料我就得，你放心做埋自己嘢就可以㗎喇！」
-
一個月，三十日，時間好快就會過，但我想做嘅嘢有好多，要完成我手頭上嘅工作、安排好腎仔啲交接、同媽子道別、同自己嘅事業道別、同腎仔道別。
-
每一次嘅道別，係嚟迎接下一次嘅相聚，但我都唔知，今次道別之後，下次幾時先有得再相聚。
------
其實「前度超渡師」同客人嘅關係唔係單單係一個金錢與服務嘅地方，好多客人「超渡」完成之後，都會成為朋友，會同我分享最近嘅感情事，亦都有唔少客人成為咗我嘅朋友，會一齊出去食飯。
-
「好多謝你，我而家都唔再咁毒男喇，我俾欣欣玩完之後，我學識咗點樣同人相處。」還記得故事嘅第一個個案毒男，當時俾欣欣玩到天旋地轉，以為欣欣好愛佢，但原來唔係。最後經過「超渡」就睇到欣欣對毒男冇真感情，最後佢就改過自身，改變自己心態、改變自己造型，唔再係一個毒男，亦都唔再愛一個唔愛自己嘅人。
-
每一個因為前度嘅醜惡而對愛情失望，又或者係太愛前度而放唔低都好，上得嚟呢度，我一定盡我所能解決事主嘅煩惱，呢個係我嘅職責嚟，而成功擺脫前度嘅路程好漫長，最複雜係解決心靈上嘅傷口。
-
大家成日將心事收收埋埋，任由件事沉澱就覺得最後一定會解決，但咁樣做先係對傷口最差。當你唔去理件事，就會做其他嘢去令到自己分心，同用麻醉藥有咩分別？兩者係可以提供即使麻醉嘅作用，等你當刻可以忘記傷心事，不過當藥效過後都係一樣咁痛，甚或之後會更加痛，因為你已經長時間習慣咗無痛嘅感覺。你可以選擇服用一世嘅止痛藥去忘記痛楚，但你知唔知止痛藥係傷身，仲會有後遺症？長期服用係會影響身體機能，換言之任由件事沉澱都係傷害自己，一日唔直接解決痛楚，呢個傷口一直都喺度。
-
我知道揭開傷疤，面對自己嘅問題係好痛楚，但唔揭開傷痕又點對症下藥，點樣令到傷口複合？無錯，瘡疤揭露係好痛，冇人想揭開傷疤俾人睇，唯獨修補每一個傷痕先會成長，任由傷痕放置不理，喺度受感染，終究個傷口會越嚟越大，一世都唔會好，自己都唔識逃離confort zone，唔敢面對自己嘅心事一定唔會成長到。
-
修補傷疤，當然要消毒，消毒同復原期間一定會好痛，呢個痛楚或許比放置不理更加痛，一段時間復原後，你唔會再有任何呢個傷口嘅痛楚，亦都唔使舊患復發，亦都唔需要因為傷口而限制自身嘅活動量。
-
倒返轉去感情嗰邊講，當你對受情傷，對感情有防範嘅時候，截然有一條刺喺度，而呢條刺就係限制你可以做嘅事，因為你放唔低前度，而你就會唔想再搵下一個，自己心情亦都會一落千丈，影響自己嘅人生，同時你唔敢面對前度，你又會選擇做好多嘢忘記，偏偏呢啲都係暫時性，都係徒勞無功，永遠都唔真真正正放低前度。
-
又或者被上一任玩感情，你心中條刺就係唔敢搵下一個，擔心下一任都係咁樣傷害你，而你就會同一切玩得埋嘅異性保持距離，以免發生感情，唔會再墮落感情嘅輪迴入面。
-
只有斬釘切鐵咁止痛，你先可以活動自如，唔需要再因為放唔低、唔需要因為驚對方係玩感情而唔一齊。躺開心扉先係一個對下段戀愛負責嘅行為，繼續收埋自己，只會影響同另一半嘅咁感情。
-
［明明就可以犯錯，漸漸卻掩飾太多。喉嚨內吞了又吐，移走甚麼？］
-
面對我們成長必經鬥幸福競賽，唔撞板係唔會成長，有邊個一出世就識處理感情事。我唔敢講自己對拍拖好有經驗，我冇資格教人拍拖，因為每個人嘅相處方式都唔同，有啲人鍾意轟轟烈烈嘅戀愛，有啲人鍾意平平實實，總之大家搵到一個同自己夾嘅咪一齊到，每次拍拖就係令自己知道自己係一個咩類型嘅人，發掘自己嘅長處短處。
-
「一些事情，一萬年都不會變。」戀愛課題，從盤古初開到廿二世紀，問題都一直無變。
-
（待續 To be continued）
IG：chingchingstory