《前度超渡師》: 第三十五集-學生媽媽（四）
超渡正式開始，除咗學生媽媽喺度之外，佢嘅兩老同時都喺度，相信佢哋都知道嚟呢度係解決前度嘅問題，至於估唔估到除咗要「超渡」前度嘅問題之外，仲要解脫肚入面嘅BB呢？
-
我：「歡迎嚟到『前度超渡株式會社』，我係前度超渡師。今日要你哋上嚟，大家都知阿女有事需要搵我哋超渡。我想你哋應承我同阿女，無論發生咩事都好，你哋都唔可以郁手或者鬧阿女。呢件事已經發生咗，亦都冇人想嘅，我希望你哋可以和平理性非暴力處理呢件事，可唔可以？」
-
時間有限，無謂搞咁多無謂開場白。
-
「究竟係咩事要我哋上嚟呢？啊前度超渡先生。」滿面鬍鬚嘅爸爸對今次上嚟嘅事表示好奇。
-
「好對唔住，我有咗個BB。我之前同前度去咗宅度假，唔小心有咗個BB。」學生媽媽已經唔再驚屋企人嘅介意，直接開門見山。
-
「我同Daddy一早已經知道，見你呢幾日不斷嘔，個人又呆呆滯滯，我自己都試過大肚，都明白懷孕初期會有呢啲症狀，大概估到你有咗㗎喇！」瞞得幾好，都係隱瞞唔過媽咪，話晒阿媽由細睇到大，點樣呃到呢？
-
「雖然你呢件事真係好離譜，簡直係完全錯晒，乜你有能力去照顧一個小生命咩？邊個賺錢養佢啊？」用文字嚟表達，各位讀者可能覺得Daddy好似用咗一個好威嚴、好憤怒嘅語氣鬧阿女，話晒咁細個就整咗個大頭佛。但企喺親耳聽嘅角度嘅我，反而覺得完全冇任何怪責嘅感覺，帶俾我嘅感覺似係溫柔式嘅詢問，多過兇猛嘅責罵。
-
阿女呢個時候都忍唔住再次流下後悔嘅眼淚：「真係好對唔住，我都好後悔答應咗佢呢個決定，而佢都因為有咗而唔要我。」
-
正常為人父母聽到阿女俾男朋友搞大咗，仲要完全唔負責任，揚長而去，一定會好嬲男方。不過唔知係咪呢對父母望落好後生，會唔會因為年紀比較年輕所以思想前衛，接受到學生時期已經搞嘢。
-
「阿女，唔知你有冇留意你同學嘅家長，好多都同我哋格格不入，身邊啲家長都四、五十歲，但你望返我哋兩個，四十歲都未到。冇錯，其實你嘅出現都係我同媽咪十九歲嘅時候，去旅行唔小心而有咗你。」我相信應該係Daddy第一次同阿女講佢嘅由來。
-
媽咪：「當時我同Daddy都想唔要你，因為我哋真係無能為力照顧你，我哋仲有自己嘅人生目標，我想繼續享受青春嘅大學生活，你Daddy想創業，半工讀喺度儲錢，諗住開間屬於自己嘅公司。
-
決定繼續要你之後，一切夢想都已經打破，大家都冇再讀書，直接投身社會，Daddy為咗你出世之後可以享受更加好嘅生活，日頭返完正職之後，夜晚就去超級市場做倉務員，咁辛苦就係唔想我哋冇錢生活。
-
我哋都好想落咗你，斷送咗自己嘅青春就去咗照顧你。由細睇到你大，我好感激當時留你嘅決定係做得冇錯，就算斷送咗自己嘅人生，都係好值得。
-
你未試過做人媽媽，但當你十月懷胎去到產房，準備生仔嗰一刻，你就會感受到母愛嘅偉大，係大到即使犧牲自己都要你出世，想見你一面，無論個代價係點，都係想親眼見到你一面。呢個就係做媽媽嘅心情，自己嘅性命安全都唔再重要，最緊要係你嘅安全。
-
就算個BB冇咗爸爸，唔緊要，呢度有BB嘅公公婆婆支持你。如果真係想留住BB，又想讀書，想有個好出路，我同Daddy會出錢出力照顧呢個小朋友，你都可以繼續讀上去，我哋都係會好好支持你。
-
你大個女喇，個BB嘅去留，我同Daddy唔會干預你嘅決定，總之你需要任何support，我哋都會俾到你。你要記住有BB係唔容易㗎，係上天俾你嘅禮物嚟。」
------
大家都係學生時期懷孕，兩老嘅採取方法就係：留住個B。因為佢哋就算開心完之後，都知道要負返個責任，唔小心製造咗一個小生命，就要負責，照顧好個小朋友。
-
學生妹：「開頭我真係好徬徨冇助，我之前搵咗呢度之後，我諗咗好耐，我決定好：唔會落咗個BB。同時我自己都會好好讀好啲書，第時搵多啲錢照顧BB，呢段時間就麻煩Daddy同媽咪代為幫手照顧，但第時放心，即使得我一個女人仔，都會孭起照顧屋企嘅責任。」
-
而學生妹今次嘅決定完全正確，而我終於都成功搞決咗一場可能好大嘅家庭糾紛，亦都循循善誘拯救一條無辜嘅小生命。
-
幫人解決問題咪就係前度超渡師嘅使命囉！
------
我最理想、亦都係最希望嘅畫面就係，經手人肯出嚟道歉。因為我尋日接觸佢嘅時候，我都覺得佢未惡教到極點，從佢青澀嘅眼神睇到仲有一點良知，仲識得分別是非對錯。
-
就算條仔最後覺得我帶佢上嚟嘅決定係錯，又或者當場奚落我嘅錯誤判斷都唔都好，起碼我都盡力改變男仔嘅諗法吖！係咪？
------
當我仲沉思緊點樣繼續「超渡」嘅同時，坐喺布幕背後嘅男仔，突然忍唔住自己嘅良心，衝咗出嚟。我想截住佢都截唔切，佢已經雙膝跪咗喺學生妹屋企人面前。
-
嗯！至少而家我成功咗。佢衝出嚟跪低已經係想懺悔，想為佢過嘅行為負責。幫助客人解決問題，又可以改變其他人嘅觀點，唔好咩？
-
有啲嘢唔試過，又點知得唔得呢？就算失敗咗又點？咪當吸收經驗囉，有邊個人又會第一次就識呢？
-
（待續 To be continued）
IG：chingchingstory