《前度超渡師》: 第三十四集-學生媽媽（三）
「如果真係要收錢，就喺我啲人工嗰度扣，唔夠就扣埋下個月，我好想幫個小朋友，一個咁細嘅學生就要面對咁多問題，真係好可憐，我想略盡綿力幫一幫個細路女。」腎仔好想幫學生媽媽，作為前度超渡師嘅我，又點會唔想呢？
-
想當初成立「超渡超渡株式會社」嘅宗旨就係幫人，我幫人嘅標準係「人心」，唔係睇人嘅地位、唔係計較佢嘅地位有幾高、唔係計較貧窮或富貴。幫人嘅初心就係睇下咩事，符合自己嘅道德標準先會答應客人嘅條件。
-
幫人嘅同時都要謀生，收錢乃係正常不過嘅行為，同時都要知道，客人唔會永遠大晒，唔可以因為客人會俾錢而要做違背良知嘅行為，永樣都係要符合自己嘅道德標準先會答應客人嘅條件。
-
我唔係做義工幫人「超渡」，我嘅工作先係幫人「超渡」。俾錢唔係大晒，但唔俾錢就乜都唔使講。
-
當然凡事都有例外嘅，見到有需要嘅人要幫手，而你又有能力，點解唔去幫？唔係下下都要講回報，唔通你扶阿婆過馬路會俾錢你、唔通你見到街上面有人暈低，你幫佢call救護車，諗住收返錢嘅？
-
幫人係出自人嘅善心，唔需要講回報，唔好諗住人哋會講「唔該」。真正幫人係唔講條件，唔過問身世，總之能力範圍以內，以你又衡量過對自己同佢嘅安全性，條件許可咪幫。
-
［勿以惡小而行之，勿以善小而不為］
-
去返呢單case，我聽到學生媽媽話留返個BB，我已經唔想再收錢，我覺得媽媽勇敢踏出呢一步已經好感動，自己一個後生女處理咁多問題，好值得尊敬，佢呢個行為仲好過好多不負責任嘅大人。
-
收少一個錢啫，又唔係大蝕底，同埋我可以拯救一條小生命，何樂而不為？
-
「咁你人工變零就好怪我喇喎。」我調戲腎仔咁講。
-
「唔緊要，為咗細路女，我心甘情願。」睇嚟腎仔嘅意志好堅定。
-
「講笑嘅，人工一定會照出，不過就唔好意思，今次呢單case嘅佣金就真係冇喇！大家一齊做善事啦！」點可以為咗自己嘅個人利益而唔出糧呢？每單case腎仔都幫我跑出跑入，又會幫我搜集好多對單case有用嘅資料，冇功都有勞啦！
------
寒暄完，都係要開工處理學生媽媽嘅問題，究竟點樣處理？大家推出嚟嘅意見都係圍繞坦誠同學生媽媽嘅屋企人講。
-
但我心諗，搵佢屋企人唔難，要佢屋企人接受都唔難，我有一個人想搵，我想俾佢知道佢做嘅禍係點影響人哋，而自己開心完之後就逍遙之外，完全冇諗過要負責任。
-
「點解你會識我㗎？」面前呢個男人不解我嘅出現。
-
「BB嘅經手人，乜唔係你仲有邊個。」我攞住學生媽媽嘅相質問。
-
呢個人，就係搞大學生媽媽個肚嘅經手人-一個造型偏向MK嘅青少年。
-
「點解你會知㗎？」呢個男人流露不解嘅表情。
-
「冇！想俾你同睇下人哋幾慘啫，你開心完，拍拍籮柚就走人；而佢呢就要面對幾多嘢啊！」一路講，我啲憤怒值就一直上升，如果打人唔犯法，我相信一見到佢已經一巴大大力車落佢到。
-
「有幾慘啊！佢都有爽㗎！」睇嚟條友都係整唔醒，係時候要帶佢望清現實。
-
「如果你想知佢有幾慘，聽日2點半上嚟呢度。」我俾咗將「前度超渡株式會社」嘅卡片，入面有我嘅電話號碼同鋪頭嘅地址。
------
估唔到佢真係準時應約上嚟，好老實講，佢作為一個血氣方剛嘅青年，唔理我實在係正常不過，我從來冇諗過佢會上嚟，可能佢淨係當我痴線佬，又或者當我無到。
-
可能佢想唔忿氣，覺得我尋日講嘅說話係唔啱，聽完成個「超渡」之後直接當場串爆我嘅無能；可能想當面鬧爆學生妹點解當時會想搞嘢，我好似將所有責任卸落條仔身上，想鬧醒學生妹，要女仔都孭返責任；又或者真心想知道佢前度係幾慘。無論點都好，佢都已經上咗了嚟，我亦都諗掂佢嘅角色係咩。
-
如果當面由佢同學生媽媽屋企人見面，我相信佢哋屋企人應該會喪鬧喪打條仔，為咗唔想有暴力流血事件發生，所以我安排條仔坐喺工作室後面嘅地方，被布遮掩住，淨係聽取我哋「前度超渡株式會社」嘅人，同埋學生媽媽與其家人嘅對話。
-
我今次邀請條仔嘅目的唔係想懲治佢，而係想佢知道，一時嘅快樂帶來幾多嘅禍害。假設我安排雙方進行對話，我相信一定會大打出手，我唔想邀請條仔而係俾人打，我從來唔主張用暴力解決問題，亦都唔想有流血事件發生。
-
就算兩邊人打咗一場大交咁又點？件事都係解決唔到，個BB都已經有咗，學生媽媽嘅屋企人都已經係知道咗件事，冇錯打完條仔一鑊係可以出氣。出完氣之後咪都係要諗埋個BB點處理，件事都係未解決㗎。
-
為咗唔會有呢啲事出現，所以我一定會隔離兩邊人，唔會俾佢哋見面。
------
簡單同條仔交代咗無論咩事，千祈都唔好出聲，淨係齋聽，等佢嘅前度，即係學生媽媽同佢屋企人同我傾。
-
話口未完，學生媽媽已經撳門鐘到達，係時候要開始「超渡」過程。今次超渡過程，我知道要拯救係一條小生命，今次計劃一定要令到屋企人，唔可以放棄個BB，畢竟學生媽媽最後改變佢嘅意思，決定繼續要個BB，唔再有墮胎嘅衝動。
-
我作為前度超渡師，一定會盡我所能，一定要做到客人嘅要求，咁先對得住我個名，幫助客人解決問題亦都係我嘅使命，咁樣先對得住自己，對得住前度超渡師呢個職銜，亦都對得住自己由零慢慢磨煉嘅金漆招牌-「前度超渡株式會社」。
-
唔知呢次會唔會係我臨走前嘅最後一次超渡呢？
-
（待續 To be continued）
IG：chingchingstory