《前度超渡師》: 第三十三集-學生媽媽（二）
你問我？我一定唔會落咗個BB，我即使節衣縮食，都要湊大個BB，站在我嘅立場一定要好好照顧BB。始終人哋唔係我，我唔可以為學生妹嘅人生負責，我冇得決定BB嘅去向，但我唯一可以改變嘅係學生媽媽嘅意願。
-
雖然『前度超渡株式會社』-前度超渡條文，寫明前度超渡師需要客觀持平中立，唔可以盲目偏幫客人，亦都唔可以違背客人嘅意思，但今次我大膽提出違背客人意願嘅方案，我真係唔想斷送一個無辜嘅小生命。
-
違反條文還違反條文，首先客人已經搵錯咗我哋，我哋係前度超渡，而BB都唔係媽媽嘅前度。而且我哋唔可以修改客人嘅記憶，我哋所謂嘅「超渡」，唔係法術儀式上嘅「超渡」，而係透過實體嘅開解，去「超渡」前度對客人嘅影響，好讓客人忘記同前度一齊所產生嘅痛楚回憶，放低一切，重新上路。
-
而超渡BB當然唔啱啦，所以按常理 唔會接呢單case，之不過「法律不外乎人情」，既然學生媽媽肯相信我嘅服務、相信我嘅專業操守精神，我都覺得可以網開一面，幫助學生媽媽解決難關，不過就肯定唔會係「超渡」BB，我唔係法師，我做唔到呢個技能，我亦都唔可以修改學生媽媽嘅記憶，令到佢忘記有BB嘅出現。
-
我淨係可以做嘅，一係要佢接受BB，一係要佢狠心咁落咗個小朋友。雖然從啱先學生媽媽嘅自述得知，佢係想墮胎，想唔要小朋友，但我一定唔會俾呢件事發生。
-
［無言親親親，侵襲我心，仍寧願親口講你累得很。］
-
就算客人好想逃避呢個責任，就算客人好想唔面對做媽媽嘅責任，就算客人好想唔要小朋友，我都係堅持己見，即使條文寫明唔可以違反，我今次點都會違反㗎喇！唔知大家又知唔知，其實啲條文都係由我去撰寫，由我本人執行一切嘅條文，所以違反規條，咁又點？
-
［你瞞住我，我亦瞞住我，太合襯。］
------
沉默寡言嘅阿嘈終於忍唔住出聲。
-
阿嘈：「阿妹，姐姐我都後生過，我都理解你會想滿足男朋友嘅需要，答應佢嘅要求都係好正常不過，好彩當時我鼓起勇氣拒絕咗佢嘅要求，如果唔係，我都可能好似你咁樣，求助無門，自己又迷茫。
-
姐姐唔係要怪責你做咗呢個決定，因為我相信你係唔會拒絕，你擔心你拒絕咗，就代表你唔愛你男朋友，而佢就會不斷攞呢件事而狙擊你，甚或唔同你做愛而離開你。
-
而當時我嘅男朋友正正因為我唔同佢做愛，佢就開始對我冷淡，之後仲出埋軌，你知唔知我喺邊度搵到佢？我喺酒吧捉到佢識到個女仔，然後仲瞓咗一晚。我嗰刻好嬲，亦都好傷心，我諗緊佢肯定係好愛我，係因為我唔同佢搞嘢，佢先去搵第二個解決需要。我自己都唔知、好迷茫，諗咗好耐佢到底係咪真係愛我啊？
-
我成個人失去支柱，身在異鄉為一嘅靠山都冇，我真係諗唔通，點解佢會出軌。我之後用咗唔少時間沉澱，我諗清楚一樣嘢。就算同佢搞嘢都好，我相信佢都係會去酒吧搵女，繼續出軌。人嘅慾望係無窮無盡，你唔再吸引佢時，佢都係會搵第二個，當刻有得同你搞嘢咪覺得好愛你。之後呢？以後呢？當佢移情別戀嘅時候，你就算幾愛佢，佢都係睬你都傻，因為你已經再冇任何利用價值，你都滿足完佢嘅需要，而佢就會搵第二個繼續滿足佢嘅慾望。
-
雖然你唔識我，你可唔可以聽姐姐講一次，唔好唔要個BB，唔係個個人想生都可以生到，有BB有時都係一種福氣，我知你呢次係意外，但當你墮過一次胎，你第時想再有都好難，呢個決定，我相信你做咗會後悔一世㗎！
-
有邊個一出世就識做媽媽呢？我相信你之後陀住BB嘅路一定會比其他人辛苦，我夠膽肯定，你嘅BB一定幸福過其他BB，即使佢冇享受唔到父愛，但你加倍嘅母愛一定可以令到BB更加幸福。
-
真係！真係！真係！唔好唔要個BB，聽姐姐講。」
------
阿嘈講到冇父愛嗰度，我又諗起我阿媽同我嘅關係，我就係嗰個冇爸爸嘅BB，但我享受嘅係雙倍母愛。阿嘈話個BB一定會好幸福，而我都真係好幸福，即使得返阿媽一個人湊大我，咁又點？幸福、開心咪得。
-
今次嘅「超渡」，係開業咁耐最催淚嘅一次，悲傷嘅自白，配合阿嘈感性嘅安慰將氣氛提升到催淚嘅場面，連出名鐵漢嘅腎仔都忍唔住流下男兒淚。
-
感性嘅時刻唔可以太長，都係要秉承自己嘅專業，亦都要清楚知道客人係咪需要我哋嘅服務。「道不同，不相為謀」，假如客人強制要求墮胎，唔好意思，我哋唯有放棄呢單生意，我真係做唔出呢啲違背人性嘅考驗。
-
「唔好意思，麻煩到你哋，我決定咗，我想繼續要個BB。你哋可唔可以幫我，我唔知點樣面對屋企人，我好冇臉面對佢哋。」我都未開口嘅時候，學生妹冷靜過後已經講咗我嘅理想畫面。
-
「屋企人呢方面，我哋會同你一齊面對，你可以放心，最緊要係踏出自己嘅心理關卡。」醒覺嘅少女終於逃離自己嘅舒適圈，作為前度超渡師，真係好安慰。
-
腎仔：「竟然你都諗通咗，放心交俾我哋啦！我哋一定會幫你。」
-
「好多謝你哋嘅幫手，好感恩可以遇上你哋。」少女離開前都連忙答謝我哋嘅幫手。
-
「舉手之勞啫。」
------
「師傅，我今次有個要求，可唔可以唔收佢錢？」估唔到腎仔趁學生妹一走咗就要求我唔收錢，我真係有啲驚訝。
-
「腎仔，你記唔記得我成立『前度超渡株式會社』嘅初心係咩？」我反問腎仔。
-
（待續 To be continued）
IG：chingchingstory