紙言

《前度超渡師》: 第三十二集-學生媽媽（一）





我喺度預備接待緊客人嘅時候，腎仔都準備好佢嘅接應工作，佢都知將來要取代我呢個位，由佢負責做「前度超渡株式會社」嘅掌門人。腎仔就坐我隔離偷師，不斷摘錄筆記，記錄我嘅點樣帶俾客人一個專業服務要有嘅質素。
-
「叮噹！叮噹！」門鈴響起，進入眼簾嘅係一位妙齡少女，著住青春少女嘅潮流，純白色嘅短袖清新T-Shirt，下身就著住成為所謂「文青女神」look嘅米白色短裙。
-
「歡迎光臨『前度超渡株式會社』，我係你嘅前度超渡師，請問你係咪有前度問題困擾需要由我去幫你超渡呢？」都係呢個開場白㗎喇！你睇咗咁多單case，肯定對呢句唔陌生㗎啦！
-
就好似上集嘅預約內容咁樣，應約當然係一個正值花樣年華嘅後生女，由於偶一不慎，被男朋友搞大咗個肚，因而想我哋幫手超渡肚入面，尚未完全成型嘅胎兒。
-
電話預約嘅資料淨係得咁多，而我見事態嚴重，所以就排咗個快期俾單親媽媽，唔想佢因為諗歪咗而一屍兩命，斷送自己以及無辜嬰兒嘅生命。
------




（學生媽媽視覺）
-
我係一個應屆文憑試考生，上個月考完文憑試，就同男朋友staycation，去一間五星級酒店玩兩日一夜，抒發一下辛苦多個月準備嘅文憑試。
-
第一次孤男寡女共處一室，加上大家都一齊咗一段長時間，已經互相認定對方係適合嘅另一半，所以嗰次staycation，大家就初嘗禁果，打破彼此嘅框框。
-
點知原來淨係得我一個認定佢係我嘅另一半，佢根本冇當我係情侶，嗰次同我去staycation就係為咗氹我上床，點知自己當時覺得佢好愛我，我都覺得無謂拒絕佢嘅好意，作為女朋友都梗係要滿足男朋友嘅需要，咁就獻出咗我嘅第一次。
-
之後嗰個月，我發現自己冇嚟M，我已經好驚，好驚肚入面會陀住我哋嘅骨肉，好驚放榜嘅時候會大肚，當自己都未有經濟能力要照顧BB，而且要照顧BB又點繼續讀上去？邊個照顧BB？邊個返工搵錢照顧BB？最嚴重係倘若屋企人知道咁點算，會點諗呢個不孝女？
-




我真係好驚，我真係唔知點算，情急之下就通知咗我男朋友，佢幫我買咗支驗孕棒，然後等我入廁所驗。要嚟嘅始終都係要嚟，一拎起嚟睇，有兩條線顯示喺驗孕棒入面，有常識嘅人都知道中咗。
-
當我自己望清楚支驗孕棒，唔係我發夢夢見兩條線。我真係好愕然，瞬間呆咗，完全唔知道要點樣處理呢壇嘢。
-
我隊支驗孕棒俾「經手人」睇，我真係估唔到，佢竟然指責我，鬧我點解當初嗰晚唔戴安全套，如果嗰晚我要求戴套，就唔會有呢個場面發生，仲話唔會俾錢我去落咗個小朋友，要搞就自己負責，一係就生咗個小朋友出嚟。
-
我好後悔，後悔答應同佢搞嘢呢個要求，係我唔識拒絕佢，係我覺得佢好愛我，氹我搞嘢之前就講到天花龍鳳，話會想繼續同我發展落去，想同我過一生一世。當我聽到呢啲花言巧語，我就好想答應佢所有嘢，難得有一個男人可以錫住我，完全值得付託終身，呢啲少少要求又唔算得係啲咩啊！
-
點知呢個「終身」，係終結自己嘅身體，我覺得自己好污糟，人生嘅貞操一下就俾人奪去，我覺得自己同做雞冇分別，淪為做男方嘅洩慾工具，完事就唔再需要我，直接拋棄我，自從我驗咗，知道中咗BB之後，已經杳無音信，搵佢已經不讀不回，電話打唔通，WhatsApp完全冇迴響，就好似瞬間消失喺我面前咁樣。
-




我想超渡肚入面嘅嬰兒，媽咪真係冇能力去照顧你，媽咪好對比你唔住，唔小心整咗你出嚟，希望你超渡之後可以去另一個世界好好生活，忘記呢個曾經傷害你嘅媽咪同賤人嗲地，你要知道，仲有好多人錫你，你唔係孤單一個㗎！媽咪唔係唔要你，而係我真係無能為力去照顧比你，你要原諒我啊！
-
（學生媽媽視覺完）
------
平時聽完客人嘅故事之後，我同腎仔例牌都會討論點樣幫助客人「超渡」前度，不過今次嘅討論唔再淨係得我同腎仔，唔再淨係用男性嘅角度解決問題，因為今次討論終於都多咗個女仔，而阿嘈都會客串幫我哋手。好老實講，今次係第一次可以由女仔嘅觀點出發。
-
未聽到由女性觀點出發，阿嘈已經抽泣，細細聲咁匿埋後面喊。阿嘈同時作為女仔，感同身受呢位學生妹，實在係正常不過，唔知大家仲記唔記得阿嘈喺英國同前男朋友一齊嘅時候，都被要求做愛，但好彩嘅係阿嘈拒絕咗呢個要求，佢知道有啲嘢係唔適合做就係唔適合，唔可以格硬為做而做。
-
阿嘈即使未做過母親，但親耳聽到面前嘅學生妹，難免會諗起以前嘅自己，大家都係女仔，都會明白想滿足男方性慾嘅意思，自己作為女朋友，梗係想令到男朋友開心，而會答應需求。
-
自己親手鑄造嘅生命，而家卻要親手斷送，仲要冇咗身邊最愛嘅男人，一個弱小嘅女人仔要面對咁多嘢，之後仲要面對放榜，關於人生去向嘅難關。即使成績幾差都好，都可以呃到屋企人有書讀，不論五科成績達二級或以上，副學士（Asso）、高級文憑（HD）都可以選讀，就算成績連攞U（Unclassified），都可以讀基礎文憑、IVE等等，只要有心咩出路都可以，最後都可以讀大學。
-
但大肚點呃啊！呃到一時呃唔到一世，你話個肚兩三個月都可以話食肥咗嚟掩飾，但隨著時間越長，個肚一定會越大，到時真係呃都呃唔到㗎。
-
如果你係我，你係前度超渡師，你會點做？




-
（待續 To be continued）

IG：chingchingstory