《前度超渡師》: 第三十一集-忘不了的妳（十一）
鍾意笑嘅女仔係咪會加分？唔係，係直情滿分㖭啦。我都唔知點解，啲女仔一望住我笑，我就會冧爆囉。
-
［相信各位男仔見到鍾意嘅女仔笑，自己個心都會甜蜜蜜。］
-
淨係執咗啲衫褲鞋襪，就隨即出發，阿嘈爸爸話想車我返去「前度超渡株式會社」，費事我哋舟車勞頓，拎住行李搭車咁麻煩，搭巴士又要轉嚟轉去，搭鐵又要慢慢兜個大圈，基本上坐晒成條綠色線先到。
-
既然阿嘈爸爸咁好人，我就恭敬不如從命，再次坐上阿嘈爸爸嘅座駕，雖然私家車已經唔係十四年之前嘅舊車，取而代之嘅係昂貴嘅高級房車，唯一不變嘅係，手車都係咁穩定，不管奔馳於公路之上，定係喺市區塞車蟻躝，架車都係保持教車師傅成日講嘅「開唔覺、頂唔chok」，係一個非常值得借鏡嘅駕駛態度。
------
［街邊太多人與車，繁華鬧市人醉夜］
-
雖然今日冇落雨，亦都唔使經過信和，但十點後嘅旺角都係人多車多，而架車早就變咗流動演唱會車，大家一路高唱我歌，由九十年代經典唱到千禧金榜，唱到完全進入忘我境界。
-
不得不讚賞高級房車嘅喇叭真係好正，坐喺後座嘅我同阿嘈早就沉淪咗喺音樂世界入面，而身為司機嘅阿嘈爸爸當然專心咁揸車……同埋專心咁唱歌先啱，揸車用手，唱歌用口㗎嘛，一啲衝突都冇。
-
難得一場嚟到，我就邀請阿嘈爸爸上嚟坐一坐飲杯茶先走。雖然鋪頭位於「紅燈區」，附近情色行業淋漓，名符其實「總有一間喺咗近」，要邊個為你服務都任揀唔嬲。當然我唔係叫阿嘈爸爸嘗試呢啲服務啦，我唔係搞婚姻破裂㗎。
-
返到鋪頭終於打破情色行業嘅環境，舒適嘅家居感覺再現，好彩今朝特登清潔成個環境一次，亦都有一張舒服嘅梳化床，唔再係核核突突嘅尼龍床。如果俾阿嘈爸爸見到，所謂嘅床只係一張殘破不堪嘅尼龍床，肯定即刻唔俾阿嘈同我同居。
-
［幸運是我，一切都係。］
-
帶阿嘈爸爸參觀咗「前度超渡株式會社」一個圈，簡簡單單介紹成個「超渡」嘅程序，等阿嘈同爸爸都可以初步認識我嘅工作，令到兩位可以放心，知道我其實係有一個穩定嘅工作，亦都可以加深認識我，知道呢份罕有工種嘅趣味，亦都可以知道我嘅專業。
-
時間都唔早，阿嘈爸爸就先行告辭，而阿嘈就梳洗，同時間我去開返張梳化床，整返啲軟墊上床。不久阿嘈都梳洗完畢，係時候到我沖涼。
-
一入到廁所，已經見到鍾意整齊嘅阿嘈將廁所嘅沖涼用品執到妥妥當當，重新分配沖涼液嘅位置，連洗手盆嘅牙膏牙擦位都執咗一次。最令我驚訝嘅係企缸去水渠位竟然一條頭髮都冇。雖然我自己作為男人，去水渠甚少有頭髮卡住，話晒啲頭髮咁短，點會卡。但女人就唔同喇，每次沖涼就好似要面臨脫髮危機，沖一次涼，就係咁甩頭髮。
-
我阿媽同樣都會面臨呢個問題，但佢都係一個禮拜先會清一次濕立立嘅頭髮碎，而我就要同胡亂堆積嘅頭髮共渡沖涼時間。估唔到阿嘈係會咁乾淨，又唔怕污糟，肯每日清潔嘔心嘅頭髮碎。
-
［又肯做家務，又無微言，仲唔係好女朋友咩？］
-
夜闌人靜，我哋打開Netflix，攤咗喺床上面休息。身為都市人，點會唔知「Netflix and chill」呢句，有Netflix又點可以冇chill呢？要chill就梗係要有套好戲切入先得㗎啦！而作為資深Netflix用家，梗係睇呢套馳名國際嘅處境劇啦！係邊套就唔講，各位巴打應該俾我更加熟嘅。
-
［飽暖思淫慾，齋思考係無用嘅，做啦！］
-
套劇，最後任由電視繼續播放直至天光，反正都冇人睇。同時我哋嘅關係反而更上一層樓，尋晚做咗啲咩，唔講得咁白，留返啲遐想位俾你哋想像啦，我就唔講得咁白。
------
尋晚玩得咁開心，而家梗係要繼續負責返……早餐啦！唔通要佢咁肚餓咩，我做唔出呢啲咁無良嘅行為㗎！身為一個負責任嘅男人，照顧好自己嘅女人係正常不過嘅事，當然唔排除尋晚做咗啲衰嘢，要補救啦！
-
嗱！嗱！嗱！我尋晚梗係冇咗啲咩衰嘢啦，大家好正經，而且都冇「杰哥不要」嘅不健康嘅情節。純粹係我肚餓啫，照舊落到樓下檔茶記買外賣。只不過，我唔記得阿嘈鍾意食咩，我淨係記得佢好鍾意食特淋通粉，完全唔記得佢要炒蛋定煎蛋。
-
今鋪大鑊喇！最重要嘅蛋竟然唔記得，如果通粉冇註明要特別淋，都可以呃阿嘈話餐廳冇得揀淋通粉，將就食住正常軟硬度嘅通粉；但蛋真係冇得呃。
-
當我繼續鑽牛角尖時，我真係好想鬧爆自己點解可以咁蠢，其實我份早餐都有蛋可以選擇，咁一份要煎蛋，另外一份要炒蛋咪得囉，最多返到上去俾阿嘈揀先，咁咪唔使死，我真係好低能啊！救命。
-
外賣嘅香氣將美夢中嘅阿嘈帶回現實，當我開門嘅時候，阿嘈已經坐定定等開餐，佢嘅等食飯個樣都係咁可愛，以前細細個拍拖會周圍去物色一啲價廉物美嘅嘢食，每次山長水遠去食好嘢，點完餐等嘢食嘅時候，阿嘈就會流露餓腸轆轆嘅表情。
-
新一天，就由一個好早餐作為好開始。食完嘢梗係要繼續工作，而今日都有客人嘅個案要跟進，換言之腎仔今日都會喺度跟我開工，咁阿嘈點算，啱啱回流到香港，又唔需要打工賺錢，所以我就叫佢留低同我一齊，做我嘅助手，睇下我點樣「超渡」客人。
-
話晒今單超渡都係一單大個案，客人正正就係一個正值年輕嘅少女……需要「超渡」嘅係佢肚入面嘅嬰兒……
-
（待續 To be continued）
IG：chingchingstory