《前度超渡師》: 第三十集-忘不了的你（十）
一路食飯，大家都一路分享呢十幾年自己嘅所見所聞，就好似多年冇見嘅好朋友咁樣，一見面就雞啄唔斷。阿嘈爸爸一口氣講晒呢十幾年，任由阿女喺外國發展，自己留喺香港每逢佳節倍思親嘅感覺，透過呢餐飯，一下盡訴心中情。
-
不得不說，阿嘈爸爸真係好錫阿嘈，可以話係廿四考老竇，阿嘈之前去英國讀書，阿嘈爸爸為咗見佢，每年都請大假，然後成家人飄洋過海見阿嘈，費事阿嘈舟車勞頓返嚟香港探親，反而係請成家人去英國搵阿嘈，離開一下香港呢個憂悶之地，順便去一個旅行，叉個靚電再繼續返工。
-
同時都係要欣賞佢哋屋企氣氛去到而家都係好和諧，每餐食飯都有講有笑。一家人嘅關係就好似朋友咁，亦父亦友，好少一個家庭可以咁和諧。
-
要講嘅始終都要講，我開口同阿嘈爸爸請求與阿嘈同居。
-
阿嘈爸：「帶走我個女唔係問題，但係你要應承我兩個條件。第一就係好好照顧我個女，唔好令到佢唔開心，第二就係得閒帶佢返嚟食飯，我會唔捨得佢㗎！話晒見到佢兩日就要走，我會好掛住佢㗎！」
-
阿嘈爸爸就好似一個大細佬咁樣，完全唔捨得個女，而我隔離嘅阿嘈，同對面嘅阿嘈媽媽聽完阿嘈爸爸嘅心中話之後，已經捧腹大笑。而我……內心當然好想笑啦，成個氣氛咁趣緻！一個男人咁正經講鳩嘢真係好搞笑㗎！但我唔可以笑㗎嘛，萬一唔俾個女我拎走咁點算啊！
-
「你放心，我一定會好好照顧阿嘈，我應承你，佢去到我嗰邊一定係做公主，等我慢慢服侍佢，享受下幸福美滿嘅生活。uncle你唔使擔心啦！我每個禮拜都會返嚟食飯嘅，養隻肥豬咁貴，喺度食飯唔使錢啊！」論講笑，我都唔執輸，但我已經feel到隔離有鼓殺氣湧緊過嚟，阿嘈已經磨緊刀歡迎我。
-
「而家潮流興可愛嘅瘦豬，我相信我養嗰隻都係啫，又得意又瘦，簡直係世界第一好豬啊！」我嘗試補飛，點知已經太遲，把刀已經殺到埋嚟，但我係唔會驚你㗎！
-
瘦豬把刀已經去到我面前：「通常啲排骨要夾豆豉先好食，攞你邊粒黑頭做豆豉好呢？啊不如就要人中呢一粒啊？大大粒，夾我啲排骨肯定好好食啫。」今劑大鑊喇！最大罪名就係話女朋友肥，今次真係千古罪人啊！
-
「腳趾尾嗰粒墨屎又得唔得呢？」儘管我講幾多笑話，都係徒勞無功，阿嘈都係撲過嚟，一嘢攬住我，錫咗一啖。
-
「你屋企人望住㗎，冷靜啲啦！」一直都正經、唔敢亂嚟嘅我，俾阿嘈打破呢個宿命，阿嘈嘅爸爸媽媽全部坐喺到，冇啦啦咁樣錫咗一啖，成何體統呢？萬一影響阿嘈屋企人對我嘅觀感就無謂啦！
-
「有咩所謂呀！想當年，我同媽媽都係咁，係咪啊，老婆大人？」喺我面前嘅阿嘈爸爸，冇流露更住一般傳統男人嘅大男人性格，唔會淨係佢講嘢，其他人收爹，反而係大家喺屋企嘅關係都係平等，好有家庭溫暖。
-
至於我呢？雙親早就因為性格不合，而喺我細細個嘅時候已經離婚，一直以嚟我都同阿媽相依為命，阿媽將一生嘅精神都嚟養大我，或許佢好想用多一倍嘅力，即使自細冇父親嘅我，都可以感受到父愛。奈何有啲嘢真係唔可以取締，「父愛」一詞，我都從未正正式式咁體驗一次。
-
但我喺阿嘈屋企，我體會到咩叫「父愛」，體會到一家人食飯可以有講有笑，唔似我自己屋企，雖然食飯時間都會同阿媽分享工作甚至人生遇到嘅問題或者趣事，而阿媽都好似我嘅心靈樹窿，不斷開解我，可惜從來冇聽過阿媽講以前阿爸嘅嘢，可能佢唔想我知而收埋喺心底入面，又或者嬲到唔想提起，又或者唔敢喺我面前流露最真實嘅感受啦！咁多年見阿媽唔提起阿爸嘅事，我都從來冇問任何嘢，都係想等阿媽覺得適合嘅時間先主動講，不過咩時候先係適合呢？我唔知道。
-
平時返工嘅工作就係開解唔同嘅客人，而我最親嘅親人，竟然連問都唔問，連嘗試開解一下嘅行動都冇，我就覺得自己都唔係做得好，點會連最親近嘅人都唔關心呢？自己之後可能會同女朋友遠走高飛，留低阿媽孤伶伶一個人，如果我呢刻唔開解佢，咁幾時先可以再見面呢？
-
照顧女朋友唔通就唔要阿媽咩？連啱啱先見面嘅女朋友都有開解，反而最熟嘅就完全冇開解，由得阿媽啲感情收埋喺心入面。所以同阿媽進行一次「超渡」，係我而家要做嘅任務，至於今次嘅助手唔再係腎仔，而係我嘅鄰座-阿嘈，用女朋友呢個身份幾好啊，又可以令到兩位有一個初步嘅認識啊！
------
自己屋企啲嘢，都係之後先算，而家專心搞咗阿嘈……啲嘢先（我知到你班友仔又想同我玩「文字遊戲」㗎，話晒文杰哥-我咁正經，點會亂嚟。）
-
女生閨房，男士勿進，第一次入阿嘈房，有浸可愛嘅少女味湧現喺我面前，粉紅色牆身散發住淡淡嘅香水，枱頭擺住我哋第一次搭天星小輪嘅合照，而相架早就充滿歷史痕跡，染黃嘅相架配上甩色嘅合照。呢刻我可以更加肯定阿嘈真係咁多年都放唔低我。
-
仔細望一望個相架，上面竟然印住我同阿嘈嘅英文名，仲有一組數字，而呢串數字正正就係我哋第一日相識嘅日子，睇嚟相架係特別訂製。歲月嘅痕跡都沖洗唔到阿嘈鍾意我嘅感情，呢個就係愛情嘅威力。
-
自問自己與「靚仔」一詞無緣，論靚仔，大把人靚仔過我。論才華，大把人有才華過我，都唔知點解阿嘈會鍾意我。
-
至於阿嘈鍾意我啲咩，咁就要問阿嘈先知喇！
-
（待續 To be continued）
IG：chingchingstory