《前度超渡師》: 第二十九集-忘不了的她（九）
對於我要面對阿嘈嘅屋企人，我完全唔擔心，話晒十四年前，我都喺阿嘈屋企人面前同阿嘈攬住道別。我相信佢哋屋企人應該唔介意阿嘈同我同居嘅。至於我阿媽呢，更加唔需要擔心啦，反正佢成日想我帶個女朋友上嚟食飯，而家佢懇到啦，仲要又靚又聰明，最爽係識咗咁多年，連我阿媽都識阿嘈，完全唔需要對呢個「新•女朋友」問長問短。雙方嘅家長都應該唔會阻止，仲有邊個可以阻止啊？就係張床喇，話晒呢度冇正正式式嘅睡床真係好麻煩，瞓又瞓得唔舒服，最緊要係而家唔可以兩個同床瞓啊！
-
心血來潮諗住用電話搵下有冇二手床放售，一開Facebook，專門放置二手物品嘅群組突然有網友post咗一張唔要嘅梳化床，攤開係一張雙人床，而摺埋係一張得體嘅梳化。最緊要嘅係，交收地點正正就係對面馬路，雖然自己一個搬有啲難道，但可以有腎仔做第二個大隻佬。兩個麻甩佬，我諗應該搬到嘅。
-
當我聯絡post主之後，佢亦都秒回我，表示聽朝可以交收，我就即刻要咗個梳化先，之後聯絡埋腎仔聽朝去對面攞梳化，當然腎仔冇得反對啦！
-
［你話幸運係咪圍繞住我呢？我話就係喇！要女朋友又女朋友，要睡床有睡床。］
-
既然幸運女神都企我呢邊，我點可以親手斷送我啲運氣呢。而幸運女神送俾我最重要嘅禮物，莫過於喺我身邊瞓著咗嘅阿嘈，我哋嘅深情對話都未開始之時，佢已經挨住我膊頭瞓著咗。
-
我知道，幸福嚟得快，走得更加快，兩個月嘅限期好快就會倒數到盡頭，我都係時候做個抉擇，為愛情犧牲事業，定係為事業犧牲愛情。但小朋友先做選擇，我決定全部要。
-
再次沉思呢條問題嘅時候，又踏入瞓著嘅僵局，而個答案都係未有定案。
------
第二朝，我簡單梳洗之後就同腎仔會面，用最快嘅速度將笨重嘅梳化由對面大廈搬返嚟「前度超渡株式會社」，放低梳化就留低阿嘈喺度繼續瞓，費事擾人清夢，我哋兩個就麻甩佬決定落樓食過靚早餐。
-
落到去茶記，腎仔都隨即問喺梳化上面瞓緊嘅女仔何方神聖。
-
「係咪尋晚你落酒吧識嘅女仔嚟㗎？咁快就帶上嚟一夜情，咁急call我就係因為佢？」errr……其實腎仔識咗我都一段時間，都知道我為人正直，一定唔會亂咁識女仔，更加唔會亂咁帶三唔識七嘅女仔上嚟啦！
-
「呢個女仔係我曾經同你講嘅阿嘈，即係十四年之前未放低嗰個女仔，佢而家返咗嚟香港，亦都再次同我一齊，」睇嚟我都係要同腎仔再次分享同阿嘈嘅經歷，費事佢又覺得我亂咁帶女仔上嚟。
-
「哦！咁即係你咪要執咗呢度佢，專心同佢拍拖先？」雖然腎仔唔記得我同阿嘈啲事，但估唔到佢竟然記得「前度超渡株式會社」嘅去向。
-
「今日特登約你出嚟，就係想講呢件事。」我都不妨開門見山，直接同腎仔講籌備以久嘅計劃，而家終於都可以實行。
------
詳細同腎仔講完件事之後，之後就同阿嘈返佢屋企食飯，陪佢執好行李過嚟同我同居。當然作為一個男朋友點都會帶啲「誠意」上去啦，攞人哋個女走，冇理由兩梳蕉都唔帶，成何體統呢？
-
十四年冇踏入將軍澳，再次返到阿嘈屋企範圍，細細個嘅回憶再現：送別阿嘈之前，喺樓下公園送別，大家互相擁抱，心入面流露離別嘅痛楚，一一歷歷再目，但今次唔會再分開，我唔會要阿嘈再次經歷離別之痛。
-
高尚住宅真係高尚住宅，同我呢啲公屋仔環境真係唔同，雲石裝修配搭時尚嘅設計，襯托住阿嘈高貴嘅氣質，雖然阿嘈出生比較富有，但佢咁多年都唔會介意同我一齊食啲平民嘢食，芝士撈麵、旺角掃街之旅等等，就算衛生環境幾差，佢都完全唔介意，亦冇半點怨言。
-
［搵個肯挨老麥嘅女人，真係唔難，最難係你點樣錫住佢。］
------
出嚟迎接我哋嘅，就係阿嘈爸爸，望住佢充滿威嚴嘅樣再次嚇親我，雖然外表威嚴，但內心其實係好仁慈，對屋企人好，對我都好。嗰陣時中二時期都俾阿女拍拖，又唔介意我呢個男朋友喺度，任由我哋去拍拖，肯放手俾個女跟住我去唔同地方玩，海洋公園、迪士尼，幾乎全港嘅東南西北都去過。仲要最後一晚俾我同阿嘈獨處，等我好好咁陪伴阿嘈直到黎明。
-
我想講，阿嘈爸爸真係好好人，嗰陣時阿嘈獨自去外國讀書之後，都成日邀請我上嚟佢屋企食飯，又會成日同我分享阿嘈啲秘密，但自從我同阿嘈漸漸少傾偈之後，阿嘈爸爸唔知點解又會察覺到，自從之後再冇約我食飯。
-
「阿女話帶男朋友上嚟食飯，我都估到係你㗎喇！」阿嘈爸爸率先開口，打破肅靜嘅局面。
-
「打攪晒喇uncle。」我都上繳啱先買嘅香印提子，作為見面禮。
-
「使乜咁客氣，叫我Daddy得㗎喇！反正大家之後都一家人㗎啦，唔使咁見外嘅。」咁快叫Daddy，得唔得㗎！我同阿嘈都係啱啱先再次復合，冇理由Daddy會知㗎喎。
-
「係呢，借問聲點解你會知係我嚟嘅？」雖然我知道阿嘈尋晚通知咗，會帶男朋友上嚟食飯，但點會係諗到係十四年前嘅男朋友，而唔係英國識嘅呢？
-
「阿女尋晚打電話話返嚟食飯，跟住會執行李跟男朋友同居，咁阿嘈都係啱啱返嚟香港幾日，冇理由咁快識到一個新男朋友嘅，咁就應該係你㗎喇！」Daddy用最簡短嘅文字解釋咗，點解咁肯定係我。
-
Daddy咁信得過我，即係轉頭要求嘅同居肯定冇難道啦！我相信一定實得嘅。
-
（待續 To be continued）
IG：chingchingstory