《前度超渡師》: 第二十八集-忘不了的妳（八）
呢個時候我諗起以前有套超級好睇嘅本土電影-《幻愛》，當中屯門碼頭有一條橋連接出面嘅航行燈塔，當時條橋因為電影取景而出名，成為唔少年輕情侶嘅打卡嘅熱點。
-
而十幾年後嘅我哋作為情侶，當然都要去探究一下呢條橋點解咁吸引啦！一去到，人流都係繼續咁多，雖然電影已經落畫都十幾年，啲燈飾早就拆卸，剩返一條石屎橋，但條橋嘅人氣卻一直冇減退，都有好多熱戀中嘅情侶嚟打卡。
-
夕陽無限好，卻是近黃昏。夕陽襯托住一對對情侶嘅熱吻，當然我哋都跟隨住身邊嘅情侶，一齊為「幻愛橋」，獻下一段浪漫。
-
情深嘅熱吻嘴完之後，我哋就搭巴士出旺角掃街，食盡香港人間美食，而呢啲美食，當然係由我推薦啦！至於食咩好西，Sorry係秘密，阿嘈都唔知，你哋班觀眾又點可以知呢！放心，有我土生土長嘅文杰加持，肯定唔會食啲垃圾嘢先囉！
-
巴士途徑每日都俾人問候老母嘅屯門公路，我哋一路塞車，一路望住川流不息嘅車龍，我哋都不禁慨嘆，點解條路咁多年都咁塞車，理解到點解屯公有咁多個老竇，畢竟個個問候屯公老母，成為屯公老竇一員。
-
汀九橋、長青隧道將我哋由大西北帶返嚟市區。當雙腳接觸到市區嘅質感，鼻呼吸到城市嘅廢氣味，隻手同隔離嘅途人有摩擦之後，第一時間梗係飛去搵廁所啦！
-
三粒鐘嘅車程又長又遙遠，仲要上車之前飲咗杯珍珠奶茶。正所謂：茶就利尿，甜茶就更加利尿。去到廁所泄洪嗰一刻，膀胱終於可以放鬆，我都不禁喺廁所呼叫一聲，抒發膀胱終於得到解脫嘅心情。
-
解決完之後，係時候要解決餓腸轆轆嘅肚腩，唔食又點有力氣進行夜晚嘅活動呢！先由旺角中心出發，食超級邪惡嘅芝士撈麵同一大堆平價炸物。然後沿著唔同樓層掃街。
-
雖然隔咗咁多年冇去旺角中心，但入面啲鋪頭依然冇變，最入都係賣價廉物美嘅小食，中間一如既往係賣MK潮流嘅衫褲鞋襪、而通道兩旁就多咗一大堆追星嘅產品，風魔萬千少女燒錢追星。
-
「um…um…」褲袋嘅震震機響起，呼喚我去領取邪惡嘅小食，而呢個時候，喺上層買嘢飲嘅阿嘈亦都同時到埗，我哋就企喺中間嘅吧枱食嘢。雖然枱面上買嘅嘢食數量真係好多，但價錢真係好抵，猶如糧尾恩物，用一個少少嘅價錢就可以食豐富嘅一餐。
-
食好西又點可以俾佢停，話明係掃街之旅，點止淨係喺商場巡迴食嘢，所以繼續沿著西洋菜南街南行。
-
「肥婆學跳舞，登登凳凳。」經典嘅《藍色多瑙河》喺耳邊不斷徘徊，證明經典雪糕車已經喺不遠處等緊我哋，掃街又點可缺少食軟雪糕呢？不過唔食唔知貴，原來一杯雪糕已經十幾蚊一杯，想當年我細細個食嘅時候，仲係單位數嘅價錢，真係貴咗好多，不過味道始終如一，香濃軟滑嘅軟雪糕都係咁好食，難怪咁受本地人、遊客歡迎，抵佢賣得咁貴都仲有人幫襯。
-
一人一杯軟雪糕之後，梗係去中學生必食嘅街邊小食-蒜蓉冷麵，我通常叫佢「撈撈撈」，因為阿姨會將你叫嘅冷麵同餸菜用一對長筷子連同秘制撈麵醬同蒜蓉一齊撈起，濃烈嘅蒜蓉配鹹鹹撈麵醬，將冇咩味道嘅冷麵提升到另一個層次。六蚊一包麵或者餸菜真係好抵食，食多幾包都唔會覺得貴。
-
以前記得最有型係同同學打賭，輸咗要成行小食買咗佢，而我就係輸咗嗰個，然後好有霸氣咁同阿姨講：「兩份米線，之後全部餸各一啊唔該，要多蒜多醬嘅。」埋單一百蚊有找，仲要飽到上心口，真係好抵食。
-
「我要米線、魷魚、粟米、牛柏葉，走蒜蓉走辣唔該。」咦！當我睇到佢唔食蒜頭之後，而我自己嘅冷麵都決定走蒜，費事佢嫌棄我個口有陣臭蒜頭味，之後要錫就唔好啦。雖然冷麵冇蒜頭真係唔得，蒜頭簡直係味道嘅精華，不過都係算，忍耐一下啦！
-
作為滷味嘅愛好者，相信之後都會去邊㗎喇，「肥姐小食店」冇誤，個人推薦墨魚，要甜醬同少芥辣，我覺得啲芥辣真係有啲嗆鼻，所以每次嗌都係要少芥辣。
-
哎呀，再詳細寫旺角掃街之旅就離題㗎喇，畢竟呢度唔係旺角美食指南，而係同阿嘈嘅相處之道。雖然食咩都好重要，不過你班鹹濕仔都係想睇夜晚做咩嘅啫。你哋稍等一陣，我唯有略略講下啦，食完滷味之後點可以冇飯後甜品，最後就去咗對面嘅商場，食我最推介嘅焦糖脆脆雪糕。
-
最後大家都係唔夠喉，決定買啲臭豆腐同啤酒返「前度超渡株式會社」繼續食，開頭我有諗過返我屋企食嘢，可惜我娘親討厭臭豆腐，同時突然帶個女仔返屋企，難免會嚇親年事已高嘅母親，所以都係返去株式會社到，屈就一下瞓尼龍床，原本張床係俾我好攰嘅時候，攤唞一下，點知而家就變咗兩人同床共枕嘅地方，真係好後悔，早知買張靚床先啦！
-
當然作為後生仔又點會咁早瞓呢，梗係有咁夜就玩到咁夜，第二朝再繼續……返工啦！
-
想聽朝再繼續玩嘅時候，望一望電話嘅日程表，先醒覺聽日約咗腎仔傾傾之後啲工作安排，都應該會討論一下我嘅去向，「前度超渡株式會社」嘅未來，都應該成為聽日討論嘅焦點㗎喇！
-
「Sorry，原來聽日約咗我助手傾偈，陪唔到你周圍去玩。」我喺展開深夜對話之前，趁著大家仲未飲醉之前，同阿嘈講咗先。
-
「唔緊要，我聽日諗住返屋企，我諗住開始搬過嚟瞓。不如聽晚你上嚟我屋企食飯，順便幫手拎行李過嚟。」咁快就同佢同居，但我呢度完全唔適合同居，連最基本嘅睡床都冇。雖然我唔著重儀式感，唔需要分開工作同休息嘅地方，但俾啲客人見到張睡床都唔專業啦！
-
（待續 To be continued）
IG：chingchingstory