《前度超渡師》: 第二十二集-忘不了的妳（二）
分享完我嘅故事之後，係時候要講點樣超渡我嘅前度，雖然你呢度嘅服務係超渡前度，不過我唔係要超渡前度，亦都唔係要忘記同前度一齊所產生嘅記憶，而係我想回復返我同前度嘅記憶，希望我可以永世都記得我同佢所做嘅嘢。
-
我真係好鍾意你，雖然隔咗十四年，但我鍾意你嘅心一直未變，即使呢十四年嚟，所有環境事物都隨著時間流逝而變遷，但我對你嘅愛卻天變、地變、情不變。
-
而呢個你，我唔想講佢叫咩名。最後，我想講，我唔係曹敏，我叫嘈喧巴閉啊！
-
（阿嘈視覺完）
------
「咩咩邊個佢？嗰個根本就係我嚟嘅。」一講嘈喧巴閉，我肯定佢所講嘅前度100%係我，因為嘈喧巴閉呢個名係我以前幫佢改嘅，因為佢以前喺學校真係好嘈，成日吱吱喳喳，雞啄唔斷。
-
「我唔鍾意講佢個名係咪唔得先？」童年時期嘅幼稚一下子由心底湧上，呢個肯定係曹敏無誤了。
-
「就係唔得，唔嗌人個名一啲禮貌都冇。」你有你傻，我有我癲，情侶性格究竟係要互補長短，定係要大致相同，我相信你哋都估到我鍾意邊種啦！
-
「咁我叫佢BB囉得未？」我知道曹敏仲係鍾意我嘅，只不過之前冇時間同大家講啫。
-
「係嘅BB。」我都唔隱藏我對佢嘅愛意。
-
「乜你鍾意我㗎咩？定係你求其敷衍我㗎咋？」我發現，之前曾經有曖昧嘅女仔都同我唔係好夾，但唯獨同阿嘈一齊永遠係最smooth嘅。
-
「當值嘅前度超渡師係唔可以對住客人講大話㗎！」呢個守則亦都係條文嘅其中之一嚟，身為前度超渡師一定要誠實咁回答客人嘅提問。
-
「我唔信，你都係吹水嘅。」阿嘈調皮咁講，成個「大細路」。
-
子華神話齋：「講係冇用嘅，做啦！」咁我梗係俾啲實則動作佢啦。
-
「喂！做咩偷雞嘴我？」大鑊，係咪我太進取呢？
-
「不過你都係補返十四年前喺機場差我嗰一吻，你仲有接住呢十四年要找數喎。」聽佢即刻補返一句，我就知道我冇做錯，亦都冇再錯失一段良緣。
-
「係呢，你今晚有冇嘢做？」既然機會喺我面前，梗係要珍惜一下先啦！
-
「我呢啲大小姐好難約㗎喎，見係你就俾個機會你先。」我唔相信阿嘈會拒絕我嘅，話晒佢都特登抽時間嚟「前度超渡株式會社」搵我啦！
-
「不如我哋去食芝士撈麵？」今次唔使喺校巴search食咩，喺我心入面已經有一個答案。
-
「真係㗎！好吖，而家就去啦！」十四年前嘅對話，十四年後講嘅嘢都係一模一樣。
------
做freelance嘅好處就係可以自己決定收工時間，唔使跟從人哋返工時間，自己做老闆，自己話事，所以今晚如果有Walk-in嘅客人真係唔好意思，要白行一趟喇！
-
同阿嘈有共識食咩之後就即刻熄燈收舖，出發去食嘢（當然呢個超渡冇收到佢錢啦，我唔係啲咁貪錢嘅人嚟）。落到地面，太陽都消失得無影無蹤，簡直係一個食晚餐加食糖水嘅好時機啊！
-
沿著小路行出去巴士站搭車，成段時間就好似第一次秋季旅行相識咁，互相講講下大家自己呢排所經歷嘅嘢，承接返機場離別之後嘅對話，去到呢一刻我都一樣咁覺得，同阿嘈傾偈真係好舒服。
-
「下一站係：金巴利道。」到站提示廣播聲帶喺頭頂嘅喇叭響起，話俾我哋聽係時候要落車。短途車程去到呢度就完，但我哋長途邂逅嘅下章，而家先正式開始。
-
「請問幾位？」撈麵店大排長龍，竟然連普通街坊小店都要攞飛排隊。無辦法啦，自從呢間嘢受到唔少網絡媒體嘅大肆宣傳之後，啲客人就綿延不絕，始終呢度啲出品真心高質，豬扒芝士撈麵真係大件夾抵食。
-
好多邊緣人都覺得，平時講嘢冇人理真係好慘，但如果去做嗌飛嗰個人，我相信全場人嘅焦點都會集中喺一開口嘅時候，不過當嗌中唔係所屬嘅食客時候，十成九喺心入面都用粗口咒爆佢全家。
-
「好賤囉你，我咁好人點會詛咒個waiter呢？」阿嘈聽完呢個爛gag之後已經笑到飛起，隔離啲人唔知我講咩，分分鐘以為我用藥迷暈佢先喺街爆笑。
-
自從同阿嘈分手之後，我自己都間唔中落嚟尖沙嘴食芝士撈麵，食完就行Donki、海傍，緬懷一下同曹敏相處嘅時光，亦都曾經幻想過如果有機會同阿嘈再次一齊嘅時候會講過啲咩。
-
換言之呢段gag已經鋪排咗十四年、呢個一齊食芝士撈麵都等咗十四年，當然中間都有斷斷續續啦，始終之前都有同其他女仔有一齊過，呢啲時間就冇諗過曹敏啦！
-
大家唔好鬧我係狗公，見女埋身就話鍾意，我接著幾集都會慢慢解釋嘅，不過等我講埋我要講嘅嘢先。
-
點解會放唔低曹敏？我諗咗呢個問題好耐，唔知邊個著名學家曾經講過：人永遠最有記憶就係第一次。呢句嘢嘅意思係，每個人發生嘅「第一次」都會係最印象深刻嘅。可能係第一次拍拖、第一次拖手、第一次錫等等，而上述嘅第一次，都係同阿嘈拍拖嘅時候發生嘅，當然都係同阿嘈一齊製造嘅回憶啦！唔通好似你諗嘅一腳踏兩船咩？
-
「係呢，你點解會做咗前度超渡師㗎？」阿嘈問返我一個好多人問嘅問題，呢個問題，每次超渡幾乎都有人問，因為呢個職業前無古人，後無來者。
-
「咁你邊食邊聽喇，呢個都係一個長到不能再長嘅故事嚟。」大家好似睇咗幾集關於「前度超渡株式會社」嘅故事，但現實已經過咗五年。
-
（待續 To be continued）
IG：chingchingstory