《前度超渡師》: 第二十一集-忘不了的妳（一）
人越大，所負嘅責任越多，膊頭嘅重擔亦都越重。相信每個人喺細個嘅時候都想盡快變咗大人，因為唔使返學，仲可以搵錢。但成為咗大人嘅呢？就偏偏想回復兒童嘅身份，因為喺小朋友嘅時期所面對嘅嘢先至係最純真同無邪。
-
［頑童大了沒那麼笨，可以聚腳於康莊旅途然後同沐浴溫泉，為何在雨傘外獨行。］
-
踏足成人嘅生活圈後，好多年少輕狂所做嘅行為都因為社會給予自己嘅標籤而藏起，只露出感覺「成熟」嘅外貌，究竟成年人可唔可以回復返年少嘅天真呢？
-
「咦！？乜係你啊？」熟悉嘅面孔進入「前度超渡株式會社」。
-
「乜我唔可以搵你嘅咩？」熟悉嘅語氣，令有面盲症嘅我可以再度確認真係佢。
-
呢個佢，唔係之前超渡嘅客人，亦都唔係需要我去搵幫事主超渡嘅幫手，而佢係我嘅前度，阿嘈-曹敏。
-
「你有前度要超渡？」雖然佢名義上係我前度，但去到呢度就係我客人，我就要秉承返自己嘅專業。
-
「有啊！而呢個前度正正就係你，文杰。」我？我冇聽錯係嗌我呀嘛？
-
「我仲以為咁多年之後，你已經放低咗我㖭。」冷靜啲，唔好咁衝動，男人唔可以衰衝動㗎。
-
「其實我一直都放唔低你，你有冇興趣聽下我嘅故事。」阿嘈竟然仲鍾意我？真係要聽下先。
-
「當然有，自從同你分開咗之後，我都唔係好知你嘅動態。」呢個係事實，因為我哋呢十四年嚟其實都冇講過任何一句嘢。
------
（阿嘈視覺）
-
十四年前同你喺機場離別之後，你仲記唔記得隨著時差再加上我哋太忙嘅關係就減少咗聯絡，最後喺大家都冇正式講分手之下就決定斬纜分開。
-
其實我將愛你嘅說話收埋，因為我唔想喺英國嘅我阻止你喺香港嘅發展，你值得喺呢啲時間搵到一個可以企喺你身邊嘅女朋友，當你有需要嘅時候，呢個女仔就會自動喺你身邊出現。
-
可惜嘅係呢個身邊嘅女仔一直都未出現，我喺英國期間，我不斷聯絡返我哋啲同學，八卦一下你嘅感情狀況，因為我真係好掛住你，好唔捨得你。
-
聽聞你曾經有追新嚟嘅插班生-顏楚翹，但你遞咗封情信而最後食檸檬收場，我都唔知你究竟係好彩定係唔好彩，好彩嘅係：楚翹原來係一個有錢女，如果你哋一齊咗之後會好麻煩，情況就好似而家佢同佢老公-歐陽浚彥咁樣，唔少嘅媒體都大肆報道，成為全城嘅焦點，你亦都要經過女方屋企人嘅難關；唔好彩嘅係你冇拍拖，繼續冇拖拍，獨自一個完成成個中學生涯。
-
唯獨你一個是不可給取締，我發現自己同你嘅行為性格真係好夾。唔知你仲記唔記得我哋第一次喺學校旅行相識嘅經過，雖然我哋喺學校旅行之前係唔識，但唔知點解第一次見面就咁熟，好似識咗好多年嘅好朋友咁，唔知你有冇呢個感受呢？
-
同時喺英國讀緊書嘅我，曾經都同兩位外國同學拍拖，奈何兩地嘅文化同習慣唔同，我發現自己都未完全放低你，每晚我都要重新睇你嘅Facebook同WhatsApp對話一次先肯瞓，我都將我哋嘅對話背得淋漓盡致，幾乎倒轉背都識。因為我真係好掛住你，每段錄音、每粒文字都俾我都咀嚼一番，成為喺外國嘅精神支柱。
-
［想約他，私訊他，別無視我好嗎？中斷聯繫了嗎？藍剔，誘惑我等他，一堆廢話願意覆嗎？］
-
嗰陣時我以為你仲因為我唔同你講要去英國讀書而嬲我，所以我一直都冇搵你傾偈，但我內心係好想好想搵你傾偈，我想同你分享我喺英國讀書嘅趣聞、我亦都好想知你喺香港嘅趣事，想知道你揀科時候嘅心態、想知你點樣追楚翹、想知你失戀後點樣走出困境、想知你中學畢業之後去咗邊度出路、想知你好多好多嘢。我好想喺你身邊，陪伴你度過唔同嘅挑戰，成為你最好嘅女朋友。
-
［關注他、追看他、在螢幕裡牽掛，通訊被限制嗎？怎招架。］
-
當我畢業之後，見香港嘅同學咁忙，費事麻煩佢哋，所以我都冇乜聯絡以前啲中學同學，之後都唔知你嘅感情狀況，淨係透過你發佈嘅動態先知。
-
［單剔，隔絕我跟他，封鎖了嗎？沒對話。］
-
每當你發佈關於溝唔到女或者慨嘆空虛、寂寞、凍嘅時候，我都好想回覆你嘅限時動態，但另一方面我驚我不斷搵你會令你討厭我，同時我都唔知你仲有冇嬲我。
-
［十四天大概足以證實，他已狠心離棄。何以將我消失，不再說起？］
-
我每次都放唔少暗示，又話歡迎做樹窿或者唔介意聽下啲唔開心嘅嘢，除咗我做主動嗰個之外，都可以俾你試下做主動嘅滋味，但每次都冇你嘅回覆。
-
［誰知我，上傳十個限時動態定時直播，醉過喊過期待有他深切慰問我。］
-
返到嚟香港嘅呢一個月，我周圍去搵你，雖然我有你嘅電話號碼，我有晒你一切嘅聯絡方式，我可以直接聯絡你，但我就冇咁做，話晒我都有矜持㗎嘛。好彩你每日返到嚟呢度都會影相打卡，我憑著相片嘅蛛絲馬跡搵到呢度係旺角，但點知當我嚟到之後卻發覺，呢度全部都係做一啲色情行業嘅場所，我曾經有諗過你係一個成日幫襯呢啲場所嘅客人之一，話晒「十個男人九個鹹濕，第十個最鹹濕。」，不過以我咁熟你，都大概知你唔係呢啲人，當然同你分開之後你嘅心態有冇變就唔知啦，唔知你有冇遇到啲咩挫折而轉變㗎嘛！
-
正當我失望搵唔到你之際，我嘅餘光望到有個好顯眼嘅招牌寫住「前度超渡株式會社」，於是我就Google一下，見到你個網站介紹呢度嘅服務，再加埋唔同討論區啲網民分享嘅評價，咁肯定呢間嘢嘅老闆就係你喇！我相信我嘅目光唔會睇錯人嘅，話晒我曾經都揀咗一個好男朋友啊！
-
（待續 To be continued）
IG：chingchingstory