《前度超渡師》: 第二十三集-忘不了的妳（三）
「幾長都聽，只要係你嘅故事，我都想知。」睇嚟阿嘈對我真係好有興趣，咁我梗係好樂意分享啦，畢竟分享完我嘅故事之後就可以問返佢嘅故事呀嘛！
-
「不如我講完我嘅故事，到你分享一下你之前去英國嘅所見所聞啊？」俾個機會我梗係問埋，知多啲唔好咩？
-
「好啊！我哋一人一個故事，我最鍾意分享故事㗎喇！」阿嘈都認同我嘅提議交換故事分享。
------
（文杰回憶錄）
-
畢業之後，我自己都做過一啲兼職，做過茶餐廳啲樓面仔、食物熊貓同鹿速遞嗰啲步兵，但呢啲通通都唔係點搵到食，因為人工都唔算好高。雖然自己一個人勉強夠用，但真係照顧唔到屋企人，連儲錢買自己鍾意嘅嘢都真係要諗清楚係需要定想要先再決定買唔買，因為都唔想浪費任何一分一毫。
-
加上社會當時被一股傷心憂悶嘅風氣出現，各式各樣嘅樹窿、心事解壓台應運而生，好多都係由觀眾透過網上投稿，然後由直播嘅KOL讀出，甚或用書信回覆。
-
於是我就諗，既然有線上版嘅樹窿，點解冇現實版嘅樹窿，眼見好多出名嘅KOL都係透過讀觀眾投稿獲得商機，所以我就直接遞信裸辭，一鋪過用晒所有之前返工儲落嘅零用錢，再捱咗幾個月嘅麵包，租咗旺角偏僻地區嘅樓上鋪，發展我嘅「前度超渡」事業，我嘅初心係致力幫助好多初初面臨情場遊戲而迷茫嘅朋友。
-
由我第一個客人開始，到而家做咗幾年，成績都不斷越嚟越好，一個超渡完滿意嘅顧客又會推介俾佢哋啲朋友，如是者一傳十、十傳百，我嘅客人亦都越嚟越多，超渡嘅方法更加五花八門，盡量迎合客人嘅意願。
-
即使客人越嚟越多，我都一直保持自己嘅初心，堅持返自己當初搞「前度超渡株式會社」嘅態度，堅持要自己親身落手幫事主解決問題，至於你今日見到喺我隔離嘅男仔，佢係我嘅助手-腎仔。佢係我開呢度嘅第一個顧客，亦都係好想幫我手嘅一個朋友，既係客人，同時都係員工嘅身份。
-
隨著腎仔不斷幫我手，我可以接嘅個案都可以越嚟越多，亦都因為佢，我先可以做到咁出名。
-
每個客人曾經需要我超渡嘅故事，我都一字一句將佢筆錄，希望第時可以同大家分享。
-
（文杰回憶錄完）
------
「點解你講到好似就嚟執笠咁嘅？」阿嘈聽完我嘅自傳之後不解。
-
「啋過你，你就真係執笠啊！」𦧲啖口水再講過啊！
-
「鬼叫你講得咁沉重咩？」今次又玩咩gag啊，十足十以前我哋一齊拍拖嘅時光咁。
-
「係嘅係嘅，千錯萬錯都係我錯。」不過呢個gag永遠都係要我認衰仔。
-
「唔通我錯？」我話晒都係一個好男人，冇理由叫佢認錯嘅。
------
［搵幾個男人去KTV，又係嗰班一齊走過光輝歲月嘅最佳損友。］
-
阿嘈永遠都係我嘅最佳損友，呢餐飯就好似帶返我哋去十四年前中學輕輕鬆鬆嘅校園生活，唔使諗長大成人之後嘅未來，只要活出自我就得。
-
食完咁多年都冇變嘅芝士撈麵之後，我哋都係做返以前一樣嘅動作行去海濱傾心事，不過時代轉變，我哋加插咗一個中途站。
-
［Don Don Don Donki，Don Don Donki，驚安新殿堂，完全夢幻像我的家］
-
「做咩帶我嚟Donki嘅？」啱啱得知，阿嘈原來返嚟香港冇耐，但都知香港呢幾年都開咗一間好紅嘅日式超市。
-
「唔飲酒又點酒後吐真言呢？」當然除咗買酒飲去海濱談心時用，都順便睇下有咩佐酒嘅。
-
「喂！呢隻意粉醬正喎，隔離呢隻咖喱送飯一流。」阿嘈搖身一變成為超市推銷員工，不斷介紹啲餸菜。
-
介紹還介紹，阿嘈一路介紹嘅同時，唔知點解我會覺得佢好有賢良淑妻feel，講到自己好識煮嘢食咁，但我想講，以前阿嘈嘅家政科聽聞係唔得，幾乎係炸咗個廚房嗰啲人嚟。話說以前我間中學男女學生都要上家政同木工堂，而我嘅家政長期靠我嘅煮食技巧攞高分，相反我啲針織技術。唉都係唔好提喇，成日將衣車嗰個踏板當油門，一嘢地板油踩落去，搞到部機差啲打柴。
-
Donki永遠都係咁好行，琳瑯滿目嘅美食，各式各樣嘅生活用品應有盡有，有俾小朋友玩嘅玩具，當然亦都有我哋大人玩㗎啦！所以啲人咁鍾意行Donki就係咁解。
-
當然呢個故事冇Donki嘅sponsor，咁就唔好繼續讚入面啲嘢，不過我都歡迎而家有金主爸爸贊助下接著之後嘅故事嘅。
-
「花間一壺酒，把酒問青天。」阿嘈一路行去海濱，一路吟詩作對，而佢吟嘅係《月下獨酌》同《水調歌頭》嘅remix版。兩首毫無關係嘅詩詞（唯一可以屈到有關係嘅，就係所有中學生都要背呢兩篇囉。）都可以拼湊得完美無縫，真係現代詩人。
-
「下次不如去重慶大廈食咖喱啊？」沿著中間道行落去尖沙嘴海濱嘅同時，阿嘈感覺上好似對既熟悉又陌生嘅重慶大廈有興趣。
-
「使乜下次，而家食囉！」啲女仔對食甜品有第二個胃，而我食乜嘢都會有第二個胃，尤其係一啲好好食嘅嘢，即使自己飽到上心口，都仲可以食得落嘅。
-
「痴線咩，啱啱先食完飽到腬嘅芝士麵，點食得落咖喱啊？下次先啦！」趁著呢度人少少，教各位唔識溝女嘅男仔，唔好以為女仔講下次就即係會有下次嘅約會，好多時候都係求其敷衍你哋㗎咋。
-
嗱！不過我就唔使擔心，阿嘈話下次就一定有下次嘅，大家就唔好羨慕喇！嘻嘻。
-
（待續 To be continued）
IG：chingchingstory