《前度超渡師》: 第二十集-文杰失戀筆記（四）
睇開嘅老讀者都知，講完每個客人嘅故事之後就會轉去講我自己，今次我嘅故事都……都唔知點講好，我諗唔到有咩形容詞形容呢段戀情，話搞笑又唔係，話傷心又唔係。
-
中六畢業後，由於我嘅文憑試成績唔夠分，唔好話讀大學，連副學士（Asso）同高級文憑（High Dip）都唔夠分，所以就好快投入咗其中一間最多人讀嘅大學-社會大學，成為其中一個「新鮮人」。
-
初踏入社會，冇乜工作經驗，所以就去屋企附近嘅茶餐廳做兼職仔，貪佢可以唔使學歷，同埋最重要係即日現金出糧，每日都揸住啲錢走真係好爽，就好似見到啲錢係用自己嘅勞力加汗水換取返嚟嘅。而呢一段戀情就正正喺茶餐廳認識嘅，當然後生女又點會投身呢啲咁辛苦嘅工作，佢梗係餐廳嘅食客啦！
-
［茶餐廳碰著她，好比心中女神進入夢，茶餐廳再遇她，沉默對望卡位中。］收銀枱上舊式嘅收音機播住一首首嘅懷舊金曲，雖然呢啲歌已經係好多年前嘅產物，但係過咗咁多年之後嘅今日聽都咁正。
-
「寫嘢唔該！」一把柔和嘅聲線喺餐廳入面浮現。
-
「收到，食咩吖？」一把粗獷嘅聲線將舒服嘅氣氛打破，而呢吧死人聲就係我喇！
-
「要個番茄薯仔湯通粉，飲熱奶茶走甜。」熱飲走甜，真係第一次聽喎，仔細望下個食客，高級OL打扮，難怪唔知茶餐廳文化啦！
-
「小姐，熱奶茶冇得走甜，啲糖係自己落嘅。」我講完之後，佢流露咗一個恍然大悟嘅表情，好似開發咗一個新知識。
-
「啊！唔好意思，我以為好似凍飲咁落糖水㗎㖭。」使乜唔好意思，正所謂客人永遠是對的。
-
「唔緊要，8號枱要B餐、熱奶茶走甜。」呢個舊式茶餐廳唔寫紙，唔用電話落單，直接喺餐枱嗌入廚房同水吧就得。
-
「係咪玩嘢啊！」當個女仔見到全場人都望住我笑之後，就知自己嗌錯嘢。
-
「我都係跟客人嘅要求落單啫。」見個女仔唔係西客嗰種串，咁我梗係撩下先，分分鐘溝到呢！
-
「好！你嘅熱奶茶走甜」杯嘢飲話咁快就到，當然我都會講一次，確認冇送錯餐啦！
-
「呢度啲嘢幾好食喎，估唔到啲平民餐廳嘅質素都幾高。」當個女仔食咗第一啖通粉就講咗呢句既開心又hurt爆嘅句子，開心嘅係佢讚我哋啲出品好食，hurt爆嘅係，乜我哋係平民就得罪你呢啲食客咩？所以我哋全場人都冇理佢。
-
「喂！我講嘢冇人應返我嘅？」乜你真係當呢度高級餐廳，要個伙記企你附近解答你啲刁難問題嘛？
-
「妖，食你就食啦，咁Q多嘢講。」水吧入面好似林雪嘅大叔忍唔住佢啲大小姐脾氣，於是直接開金口炳佢一劑。
-
「你哋餐廳咩服務嚟㗎，咁樣對啲客人嘅，我有俾錢食飯，唔係嚟受你哋氣㗎！」啱啱先讚完佢冇西客脾氣，轉過頭之後就嚟料。
-
「唔滿意咪走囉，quit咗間餐廳佢囉。」周圍嘅食客睇唔過眼都幫口講嘢。
-
見個女仔都係因為唔識嘢先俾人插，我都係幫下口啦：
-
「人哋都係唔識嘢，大家算啦算啦，退後一步海闊天空啊！」
-
「你有壓力，我有壓力，點解我要受佢氣啊？」水吧林雪版大叔再次忍唔住，繼續開金口。
-
經過林雪粗口橫飛嘅指責之後，女仔終於頂唔順，流下一行眼淚，我即刻拎啲紙巾俾佢抹眼淚，雖然女仔啱先嘅態度真係唔啱，但我覺得都唔需要咁樣鬧爆佢。
-
「我都係嚟食嘢啫，唔係嚟受氣㗎！」女仔喊住咁講。
-
「轉頭我會同佢講㗎喇，你唔好喊啦！」我連忙咁安慰佢。
-
「係呢，我食完之後，你可唔可以同我一齊行返去我公司啊？」突然有女埋身，幾忙都話ok啦！
-
如是者，我就同嗰個女仔一齊行去佢嘅寫字樓，途中我哋傾咗好多嘢，然之後我哋仲約定每日放飯都見。每日嘅放飯時間就係我哋相處嘅時間，雖然餐廳午市時間永遠係最忙，但當我落完單或者遞餐之後嘅空檔時間都同佢傾偈，佢食完就送佢返工，獨處嘅時間亦都係我哋談心嘅時間。
-
你真係唔好睇少呢一個鐘嘅Lunch Hour，其實呢一個鐘嘅相處時間已經打贏晒好多唔係成日見面嘅情侶。
-
但除咗每日食飯嘅時間相處之外，其他時間大家都冇再見大家，因為佢話放工要OT，加上佢好多時候朝早都要開會，而我亦都返緊第二份Part time，都冇時間同佢行街增進感情。
-
佢鍾唔鍾意我？我唔知，我淨係知道我鍾意佢。
-
每次佢放晏晝嘅時候，總係嗌呢度嘅番茄薯仔湯通粉，然後飲熱奶茶走甜，而呢個走甜，已經成為咗我哋伙記之間嘅暗語，而佢食飯啲錢，就係用我每日餐廳津貼嘅免費午餐抵住，而個女仔當然唔知啦！
------
持續食咗一年嘅免費午餐之後，佢有日冇再嚟食嘢，而我用任何方法搵佢都唔到，我呢刻先知到，我俾人搵笨，搵咗個大笨，埋我淨係為咗食免費午餐，之後行返公司就當係有免費午餐食嘅應酬，我真係蠢到極點，明知俾人呃都繼續俾人呃。真係被愛情蒙蔽了雙眼，蒙著眼睛做水魚。
-
最後，我終於諗到有個好靚嘅四字詞語形容今集小弟同呢個呃飲呃食嘅女仔嘅關係，就係「光怪陸離」喇，係咪突然覺得我好文學呢？
-
呢個詞語係形容離奇怪異，色彩參差錯雜，即係騎呢，不過我梗係用啲深啲嘅詞語啦，唔係點令你覺得文杰真係一個文學寶寶嚟啫。
-
咩話，你話今集冇拍拖都叫「失戀筆記」？Err……咁溝唔到女都算係失戀嘅一種嚟嘅。
-
《破壞之皇》入面，周星馳一個外賣仔憑著勇氣溝到體育中心嘅女主角，但現實到底可唔可以「越級挑戰」？作為過來人，我話俾你聽，當然唔得，人哋都淨係當你工具人咋，除非你唔介意啦！
-
（待續 To be continued）
IG：chingchingstory