紙言

《前度超渡師》: 第十九集-放不低的妳（四）





「搶你飯碗就肯定唔會喇！況且呢個係一個新科技，暫時仲需要一啲時間測試。不過放心，肯定安全。」正經男拍晒心口證明自己研發「記憶超渡機」嘅可靠性。
-
「祝你成功啦！如果你部機真係量產嘅話，記得送部俾我。」作為前度超渡師，梗係幫大家爭取一下福利㗎啦！
-
「乜你又要超渡前度㗎咩？自己幫自己超渡咪得囉！」正經男調戲咁講。
-
「你冇聽過：『幫人快樂嘅，自己永遠係最唔快樂嗰個』咩？」話晒自己又點可以超渡自己呢？正如醫生都唔可以幫自己做手術啦！
-
「呢啲傷心事就收埋喺心入面，如果我將來有記憶嘅話，一定俾部你玩，記得試完之後俾個評價我！」即使我哋今日係第一次見面，但識英雄重英雄嘅感覺真係好正。
-




「承你貴言！永遠等你好消息。恕我八卦多次，點解我哋傾咁耐，你都唔講前度叫咩名嘅？」你睇到第四集都唔覺咩？形容正經男個前度係用佢，從來未開名。
-
「過去咗嘅嘢就由佢啦，無謂再提起。不應該記起，何必偏偏記起。」估唔到正經男聽廣東歌，我仲以為呢啲官仔骨骨嘅男仔唔肯接受本土文化，淨係識崇洋外國嘅流行文化。正經男喺我心目中加咗唔少分，話晒識欣賞廣東歌嘅男人真係好正。
-
「不拖不欠又憑甚麼好妒忌。」唔知我哋講咩？我哋唱緊歌啊，睇緊嘅你又不如估下我哋Jam緊啲咩歌啊？估中冇獎喎！
-
「呢三句已經足夠講，咁多年嚟都冇拖冇欠，但有少少妒忌就真嘅，話晒我再冇機會同佢道歉，為以前唔識溝女嘅我負責。」
------
［只想去為你，完成時光機器，人人能超越時間生死，子彈鋪滿地，為求情敵撤離，部署戰爭奮勇地尋找轉機。］
-




小肥嘅《時光機》正正形容緊正經男所做嘅嘢，雖然正經男唔係「時光倒流一句話」，但佢係完全可以令到自己忘記佢嘅前度，雖然前度自身同正經男嘅記憶唔會消除，但正經男就透過後天嘅努力改寫自己嘅命運。
-
「係呢，我都唔知你叫咩名？」臨走前一刻，我先鼓起勇氣問佢，因為條文都寫得好清楚，如果當時人冇講，而又唔影響超渡結果嘅，前度超渡師係唔可以問。
-
「喂！牆上嘅條文咪寫咗與超渡冇關嘅唔問得咩？」雖然超渡師嘅條文由開業到而家都白紙黑字咁掛咗喺牆身上，但細心睇嘅客人真係十隻手指都數得晒。條文就好似電話嗰啲條款咁，個個望都唔望就剔咗佢，連入面到底係保障自己定傷害自己都唔知。當然呢度嘅條文係保障客人啦！
-
「唔講唔緊要啊！我都係八卦一下先問。」睇嚟正經男對佢個名有啲落閘，係咪驚我上網起佢底呢？
-
「玩你啫，其實講得嘅，不過聽完就算，千祈唔好笑。我叫劉備悌。」um……我真係冇小，真係真係冇笑……得咁細聲。我已經笑到拍晒枱咁大笑。
-




「你要唔要紙巾啊？」我搞笑咁同佢講，但呢個名認真正，咁流鼻涕真係需要紙巾去擤鼻涕嘅。
-
「你同我去食蕉連皮啦！個名改到咁都唔係我話事㗎！」鼻涕哥欲拒還迎咁講。
-
「我發誓，我真係冇笑你個名㗎！」男人發誓，十句有九句係假，第十句更假。
-
「得喇得喇！我實信你㗎，係咪？」鼻涕哥調皮咁講。
-
「梗係啦，你唔信我信邊個。」喺面對出面嘅男人，會俾人一種成熟信賴嘅感覺，但當得三五知己圍威喂嘅時候會好自然放低社會嘅包袱。
------
鼻涕哥面對前度唔再畏懼，決定自己踏出一步，用自己嘅方法解決佢自身嘅問題，我都祝福佢可以成功，祝福佢「今宵多珍重」。
-
回想返自己之前細個同唔少女仔卿卿我我嘅場景，再之後因為唔同原因而離去，小學嗰個、中學嘅阿嘈、楚翹，到畢業之後仲有一個女仔（呢個將會喺文杰失戀筆記（四）記載），四個曾經同我係擁有最親關係嘅女仔，但個個都係「來年陌生的，是昨日最親的某某」，其陌生程度係媲美行街路過嘅路人，路過唔會互相虛寒問暖，相反四目交投嘅眼神簡直係為大家增添一點尷尬，完全仲可以減低全球暖化嘅惡法問題，話晒大家個關係係凍到一個點。
-
但係人唔經歷呢啲事又點會成長？唔體驗又點會識點樣對待身邊嘅另一半呢？




-
每個人唔係一出世就識待人處事、唔係一出世就識拍拖，凡事都係要透過家長、師長、甚或朋友嘅教導先學識，但有啲嘢課本係教你唔到，就好似拍拖咁，要自己落手落腳去體驗先得。
-
當然有啲人對「拍拖」一試就上手，同時都有啲人係一竅不通，需要好多經驗去摸索，失敗放唔低嘅咪嚟「前度超渡株式會社」呢度搵我幫手囉！
-
有經驗嘅總係嫌棄冇經驗嘅拍拖伴侶，總係嫌棄佢哋唔識拍拖，但佢哋自己卻唔記得，自己曾幾何時都係一個唔識拍拖嘅小伙子。乜大家唔係好鍾意講「公平」兩隻字咩？小學都有教啦：「己所不欲，勿施於人」，但呢啲人做到咩？
-
由初出矛頭嘅𡃁仔𡃁妹俾啲感情玩家「撚化」，到佢哋經歷失敗而成長之後，佢哋當有機會遇返上一啲「感情新手」嘅時候，就會故技重施，對返佢哋嘅另一半。呢個壞循環永遠唔會完，永遠繼續害人、永遠無限輪迴、永遠都有新嘅人中招、永遠都有新嘅賤人繼續害人。
-
［也許相愛很難，就難在其實雙方各有寄望怎麼辦？］
-
倒轉諗，冇呢啲賤人又點養活到我呢？我都係靠呢啲好多嘅迷途嘅小朋友先可以搵食㗎嘛！冇佢哋，我又點會而家坐喺度同睇緊呢個故事嘅你喺度吹水呢？
-
雖然呢集寫到好似大結局咁，其實呢個故事都接近㗎喇，想知點解，繼續睇埋落去就知。
-




（待續 To be continued）

IG：chingchingstory