《前度超渡師》: 第十八集-放不低的妳（三）
「睇嚟你都係想知我究竟係坐中學同學嘅枱定係新娘嘅前度枱啦！唉！如果真係有一枱叫新娘的前度枱就尷尬到極致，相信新郎哥都會嬲啦！」好彩正經男都唔係太正經，都可以開下玩笑嘅。
-
「你唔俾新郎哥都開返幾枱前度坐嘅枱嘅？見返人哋啲前度，睇下人哋有咩咁好呀嘛！」見個氣氛俾啱先融洽咗咁多，加上正經男原來咁吹得，梗係吹多陣水先啦。
-
其實我真係好鍾意同啲客人吹水㗎，不過大家放心，呢度嘅超渡唔係按時收費，所以傾得耐唔會收貴你，所以你哋可以放心！
-
「如果真係有嘅話，咁我好肯定呢個婚禮會好好奇怪囉！咁啲男女前度可以搞返個Speed Dating喎，反正大家都單身，分分鐘之後接住搞埋個婚禮，攞返啱先俾嘅人情！」成個腦都係地獄meme嘅我完全諗到呢個gag位，笑到我差啲要落地獄。
-
「我頂！你唔去做meme真係浪費咗你，呢個故事睇嚟有排都未講完，不過願聞其詳。」講多無謂，都係等主角開估，希望我唔會笑到而打斷咗正經男講嘅故事啦！
------
（繼續正經男視覺）
-
隨著同我分手之後，呢個女仔都好快搵到第二個男朋友，而呢個新男朋友同時亦都係我哋同班嘅一位男同學。當我哋分咗手一陣之後，呢個男仔已經展開一系列強烈攻勢，包括係咁虛寒問暖。
-
呢個男仔好成功同前度一齊，開頭我都唔知佢哋拍拖，但我見前度同佢嘅現任喺課室係咁放閃，我就知道佢哋已經喺埋一齊。望住佢哋啲親密行為，我腦海不斷諗返我以前同佢喺課室放閃嘅甜蜜時光，只可惜喺佢身邊嘅已經唔再係我。
-
［故事何樣美，終極是分離，不敢好奇沾污結尾。］
-
永遠置頂嘅對話唔再置頂；永遠第一個覆唔再第一個覆；永遠陪伴我嘅唔再陪伴我，永遠嘅約定已經唔再永遠，因為我哋已經分咗手。
-
［猶豫，無人敢碰，秘密現在被揭曉。］
-
但一開始分手嘅時候，我都以為自己可以好快可以忘記佢，但當我一拎起啲教科書溫習嘅時候，所有一齊溫習嘅回憶就就隨住本書打開。
-
［明日想起，我們其實承受不了。］
-
原本我最好嘅拍檔係佢，每次分組都可以自動搞掂。而呢刻只可以再搵其他同學。小至一啲分組group project，大至高中嘅旅行日、聖誕Party、甚至一生人得一次嘅中學畢業禮，我都冇咗一個最好嘅拍檔，我只可以喺遠方觀察佢嘅活動。
-
［歡樂今宵，虛無縹緲，再沒餘地繼續纏繞。］
-
望住佢嘅幸福笑容，我已經好心滿意足。即使件事去到十幾年後嘅而家，諗法都一模一樣，嗰日嘅婚禮之上，佢打扮得好燦爛，全場嘅焦點都投射落佢到。
-
［大家都吃著聊著笑著，今晚多開心。最角落裡的我，笑得多合群。］
-
坐喺中學同學席之上，同枱嘅都係曾經熟悉嘅面孔，唔少都係中學時期嘅死黨，但隨著大家放榜後，為自己嘅目標進發而要離開，有為自己嘅學業奮鬥；有啲為自己嘅工作事業拼搏，但係呢場婚禮，將四散嘅兄弟聚集返埋一齊。
-
［盤底的洋蔥像我，永遠是調味品，偷偷的看著你，偷偷的隱藏著自己。］
-
正所謂：「來年陌生的，是昨日最親的某某。」即使隔咗一段時間冇同佢哋聯絡，但大家都好似啱啱放完一個悠長嘅暑假咁，一見面就雞啄唔斷。
-
［如果你願意一層一層一層，的剝開我的心，你會發現，你會訝異，你是我最壓抑。最深處的秘密］
-
即使大家都分享自己呢幾年嘅生活趣事，不過大家都知道有個禁忌，就係唔提及我同佢以前拍拖嘅事，同時我自己亦都唔敢講，亦都費事令大家記得。
-
［如果你願意一層一層一層，的剝開我的心，你會鼻酸，你會流淚。只要你能聽到我，看到我的全心全意。］
-
當新郎哥拖住佢進場嘅時候，我不斷幻想，如果喺佢身邊嗰個係我就好，我都想拖住佢，可以喺呢個人生重大嘅里程碑之上，收到各位親朋好友嘅祝福，更加上可以喺咁多人面前俾一個誠懇嘅承諾佢，會應承佢，照顧佢一生一世。
-
眼淚亦都差啲飆出嚟，不過梗係「啜」返啲眼淚先，費事顯得不捨之情。望住隔離枱啲姊妹，已經喊到不似人形，但我作為人哋嘅前度，喊好核突㗎嘛！
------
我同佢嘅故事去到婚禮之上就結束，用婚禮完結嘅歡呼證明我真係要放低佢，重新上路。
-
呢個就係我同佢嘅故事，點解成個故事都唔講佢叫咩名，因為我都係冇呢個勇氣向其他人講我同佢之間嘅經歷。
-
我知道每個上嚟嘅客人都係因為放唔低前度而要超渡，當然我都係，但我上嚟嘅目的唔係要超渡前度，而係我想搵一個值得信賴嘅人聽我嘅故事。
-
我最近研發咗一個可以清除自己記憶嘅機器，我將佢命名為「記憶超渡機」，話晒你呢度係超渡人哋嘅前度，等人哋可以重新投入一段新戀情，而我呢部機係可以令人可以徹徹底底咁忘記以前發生嘅所有事，重新投入一段新生活。
-
而我正正就想成為機器嘅「一號實驗者」，測試一下機器嘅運作。我希望有人可以記得我嘅故事，等呢段純真嘅感情線可以流傳世界。
-
（正經男視覺完）
------
「聽你咁講，你部機係咪想搶我飯碗啊？」原本以為婚禮嗰度係一個搞笑嘅笑點，但聽完正經男嘅故事之後，先知呢個係一個悲慘故事。
-
（待續 To be continued）
IG：chingchingstory