《前度超渡師》: 第十七集-放不低的妳（二）
喺度同大家補充一下，雖然我係第一次拍拖，但我前女朋友唔係第一次拍拖，佢喺同我一齊之前，都曾經同一個同班嘅男仔拍拖，不過我憑住沉實寡言嘅性格喺條仔手上搶走我嘅前度，雖然我自己都唔知當時係點樣撬人牆腳，但總之我成功咗啦！
-
自從搶到佢之後，我就好似啱先講嘅情況咁，成日同佢一齊，好似成粒糖痴豆咁。唔知點解拍咗兩年拖之後，我發現佢突然同我有一段距離，就好似佢有啲嘢隱瞞住我咁，自從升中三嘅暑假開始，我哋傾偈嘅次數同時間大大縮短，甚至連話題亦都開始減少，我唔知係咪我自己做得唔好，我淨係知道佢永遠喺我最忙嘅時候煩住我，有時喺我打緊機嘅時候要我同佢傾電話，明知男人喺打機嘅時候嚴禁被人嘈住，所以佢次次打嚟我都好暴躁咁叫佢唔好煩住我，然後就cut佢線。有時就喺我做緊功課同溫緊習嘅時候要我同佢傾偈，溫書最棹忌有人騷擾，所以我都係搵藉口叫佢唔好嘈。
-
明明我都留好多時間同佢傾偈，但偏偏呢啲時候都唔搵我，呢啲時間其實我係非常樂意同佢慢慢傾到天荒地老，但喺我打機或者做緊嘢嘅時候真係唔得囉！
-
自從我不斷打斷佢嘅對話之後，佢就比以前少搵我傾偈，我哋之間嘅距離亦都疏遠，之後中三學年開始，以前熱戀時期嘅甜蜜動作通通冇晒，取而代之係陌生朋友關係，無論小息定放學之後，佢都好似有意迴避我咁。我仲發現自己原來對佢身邊嘅嘢全部都唔知，連佢換咗電話、換咗筆袋都冇同我講，以前佢每次買新嘢都會問我意見，例如買咩色同個樣得唔得。見大家個關係拘謹到咁，所以有日放學我WhatsApp佢：
-
「我哋係咪仲一齊㗎？」
-
不過得到嘅答覆，就摧毀我一切嘅幻想……
------
「好對唔住，我真係好辛苦、非常咁辛苦。
-
首先好多謝你呢三年嘅陪伴，我真係好開心可以同你喺埋一齊，呢三年一齊溫書、一齊度過唔同節日嘅回憶真係可以回味一世。我超級感恩可以識到你，令到我成個初中生涯過得美滿。
-
但同時我喺呢幾個月都過得好辛苦，我自己唔知做咗啲咩得罪咗你。當我最需要你嘅時候，你總會有藉口而唔理會我，乜打機真係重要過女朋友咩？我明白男仔真係需要打機去放鬆平時學業嘅壓力，但可唔可以理下我，我舒緩壓力就係搵你，你就係我唯一可以傾樹窿，對比起我啲姊妹，我最信任你，因為你係我男朋友，我唔搵你，我仲可以搵邊個呢？
-
我往往最需要你嘅陪伴時，你卻偏偏唔喺度，你知唔知呢幾個月，我到底有幾多個夜晚係喊住而瞓唔到，我相信你係唔知，因為你係同緊一班兄弟玩到忘我境界，你玩得歡暢嘅同時，另一邊嘅我卻喺度孤零零咁望住冷清嘅景色，慨嘆點解其他女仔有一個好男朋友可以同佢分擔壓力，而我卻冇。
-
好多時候，我都唔敢搵你，我驚騷擾你溫習，費事耽誤你嘅學業，但你有冇體諒我？你有事搵我嘅時候，我永遠都係即刻放低手頭上嘅工作即刻解答你、陪伴你。有次我忙得滯遲咗覆，你就發我脾氣，我真係好委屈，我都唔係有心唔覆你啲message啦，我真係抽身唔到去覆你而先要已讀不回你一陣間，你就唔理我幾日。
-
你搵我嘅時候就要隨傳隨到，我搵你嘅時候就要識時務者，睇你面色做人，我真係好辛苦啊！
-
所以我寧願做衰女都要同你講分手，我即使好愛你，但我都要為我嘅幸福著想，我好想男朋友可以陪伴我度過人生唔同難關，而唔係我要做男朋友嘅解悶機器。
-
最後祝你之後可以搵到一個比我更加好嘅女朋友，永遠懂得你心意嘅女朋友。
-
一個曾經愛你但已經再頂唔住嘅前女朋友上」
------
我睇完篇千字文之後，我終於醒覺，原來個問題唔係喺佢嗰度出現，而係喺冇知嘅我嗰度浮現。我好後悔，好後悔自己親手斷送一段甜蜜嘅關係。
-
我冇做好「男朋友」呢一個責任，我之前不斷搵藉口逃避佢對我嘅需求，永遠要佢迎合我，但我自己卻冇做任何嘢去報答佢，仲係覺得女朋友對男朋友好係天經地義。
-
我有好多嘢想同佢講，但我已經唔敢再開口同佢講，我放唔低佢，我後悔冇當初唔識珍惜佢對我嘅好，喺失去之後先識得珍惜。
-
（正經男視覺完）
------
-
「初中！？乜你而家仲讀緊書咩？」聽完正經男嘅故事之後，我一頭霧水，佢個樣同初中生完全唔相關。
-
「其實呢件事已經係十年前，當然我而家唔係中學生啦，我已經學士畢業，而家喺某大型科技公司做緊電子研究生喇！」正經男笑笑口同我講佢嘅現況。
-
「咁都過咗多年，你都仲放唔低佢？」雖然我知人對第一次嘅記憶印象係零舍深刻，但都唔係十幾年前發生嘅事都而家都要念念不忘囉！
-
「其實之前嗰幾年已經放低佢，但最近佢……最近佢同我哋同班中學同學結婚，佢仲有邀請埋我去。」聽到之後，我內心其實係有啲想笑，雖然我知道咁樣係好賤，但呢個問題喺我個腦彈出嚟：究竟正經男坐喺「中學同學枱」定係「新娘的前度‘s枱」呢？我知道我真係好地獄，但呢個問題真係好值得深究。
-
「咁結婚當日你坐喺咩枱呢？原諒我有些少八卦。」我真係好有興趣知道結婚當日嘅尷尬，但當然冇咁直接問正經男啦！
-
（待續 To be continued）
IG：chingchingstory