《前度超渡師》: 第十六集-放不低的妳（一）
好多人都想知，成為一個前度超渡師會唔會好悶？做咗一段時間嘅我可以答你，係一啲都唔會悶，因為你每次聽嘅故事都唔同，每次超渡前度都好少倒模咁用同一個方法。之前都講過，用咩方法、用咩人或者臨時演員幫手、用咩道具都係要自己從長計議，因為做錯第一會影響自己嘅聲譽，做臭個名就唔好啦，第二係會令當事人反感，所以一定要做得百密不疏，咁啲客人先可以介紹我嘅服務俾更加多人，呢盤冷門嘅生意先可以繼續堅持落去。
-
到咗二十一世紀，網絡世界已經非常之發達，凡事有嘢想同大家分享都可以透過唔同嘅社交媒體發布自己嘅諗法。當然係投訴或者訴苦多過讚賞啦！話晒呢度美名係「東方之珠」，實則上係「投訴之都」。
-
明明只要Po一段文字去網上就有大把人聲援，但點解仲要真金白銀去搵「前度超渡株式會社」去幫手解決呢？我相信呢個就係我作為前度超渡師嘅嘅專業，一個可以幫到人放下前度嘅專業，網上嘅人只係可以透過冷冰冰嘅文字解決，而我係可以實牙實齒慢慢引導當事人去放低前度。
-
做一個前度超渡師唔難，做一個好嘅前度超渡師就難，就好似煮嘢食咁樣，大把人識煮嘢食，但煮得好唔好食係一個問題，唔係點解要分啲咩咩藍帶嘅證書，就係證明你有呢個資格嘅專業囉！
-
唉！一個人嘅時候都係想放負，面對社會同環境嘅壓力，真係好多嘢想釋放，但好多人都覺得男人老狗係唔應該透過喊嚟表達自己嘅壓力，顯得好似係一個好懦弱嘅男人，而我正正就係被大眾輿論覺得唔應該放負嘅一班人，呢個世界唔係淨係得女人可以用喊去解決自己嘅問題，其實男人都可以，不過我相信咁多位男人都係因為面子而唔敢，所以各位男人其實唔使驚，即管放低你嘅面皮、放低自己嘅壓力啦！
-
［曾聽說雨天總要放手，總要分手，曾跟你約定下個淡季，浪漫旅遊。］
-
故事去到今日都係繼續落雨，唉！真係好唔鍾意落雨，搞到個人好濕，啲牆身又開始發霉，但換轉角度諗，唔落雨又點會有「香港水」飲呢！
-
「叮噹！叮噹！」邊個喺我享受緊獨自一個嘅時候阻住晒，真係佛都有火啊！
-
「歡迎光臨，請問有咩幫到你呢？」當然我收咗個火啦！話晒係客嚟㗎嘛！古語有云：「顧客永遠是對的」，點可以冇禮貌對待啲顧客BB㗎！
-
「唔該，請問呢度係咪前度超渡株式會社啊？」一個著住Polo恤衫嘅四眼佬入咗嚟，呢個貌似二十幾歲嘅青年卻著住成個阿叔嘅模樣，明明我都係二十出頭嘅後生仔，但呢個衣著真係好搶眼，對比起平時行街路過嘅靚女，我覺得呢個唔貼合時代嘅衣著會更加惹人注目。
-
「係啊，請坐。」我對呢個男仔嘅第一印象就係斯文同端莊有禮，帶俾人一種成熟穩重嘅感覺，但唔似上集嘅Ryan嗰種。
-
「我有個前度想去超渡，因為我真係完全忘記唔到佢，我而家每晚都好掛住佢，你係咪真係可以幫我㗎？」
-
「我打開門做生意嘅，收得你錢一定會盡全力做到最好，但你要知道，我並唔係啲咩洗腦師，可以令你忘記你嘅前度，而係我透過唔同嘅方法令到你可以漸漸咁放低你嘅前度。」
-
「咦！乜唔係好似驅邪術咁超渡前度咩？」
-
「梗係唔係啦！你見呢度有啲咩關公像啊、黃色符紙嗰啲咩？」
-
「咁又冇喎，呢度裝修咁現代化，都唔太似中式傳統家居嗰啲嘢。」
-
「而家都二十一世紀啦！我作為後生仔都唔信呢啲嘢嘅。」
-
「呢的嘢，信則有，不信則冇，但寧可信其有啊！」
-
「係嘅！係嘅！我哋不如先聽下你嘅故事先。」寒暄一陣之後，我都係要總結呢個話頭，我驚講呢啲牛鬼蛇神傾到天荒地老，加上我作為無神論嘅人，講咩都唔會信。我始終都覺得呢啲係呃人嘅。
------
（正經男視覺）
-
我同我前女朋友由中一嗰陣時認識，佢係我同班同學、係我嘅初戀，同時亦都係我第一個鍾意嘅女仔，我哋喺中一嘅時候互相鍾意對方，並喺同一年係埋一齊，佢鍾意我讀書勁，我鍾意佢熱愛讀書嘅學習態度，所以我哋咁多年喺學業嘅路上都係互相扶持對方，每逢考試季節，我哋都會去圖書館一齊溫書，互補長短，我教我熟手嘅知識俾佢，佢補返我唔識嘅嘢，所以我哋每年嘅考試都攞晒全級第一同第二。
-
作為一個學生，每年攞全級第一當然開心，但我見到佢攞第一更加開心，自從同佢一齊之後，我就決定喺考試期間鬆手，決定讓佢攞全級第一，令佢攞到呢個受全世界讚賞嘅美譽；而攞第二嘅我，永遠被世人忘記，永遠俾人恥笑「高不成，低不就」嘅遺憾。
-
［情人如若很好奇，要有被我嚇怕的準備。］
-
由於我哋住嘅距離實在太遠，一個住東區，一個住離島區，加上我哋兩個嘅學業都非常繁複，難以用寶貴嘅放學時間拍拖，所以只可喺上堂時間發展地下情，雖然我好想將呢段戀情隱藏，以免影響我哋作為全級精英嘅聲譽，繼續營造一個好學生嘅榜樣。不過情竇初開，自然難免收埋我哋嘅關係，所以我哋咁多年都喺小息嘅時間一齊，彌補返我哋假期同放學之後去補習而冇得一齊拍拖嘅時間。
-
［試問誰可，潔白無比。如何承受這好奇，答案大概似剃刀鋒利。］
-
學生時期不應談戀愛，我明白，我真係完全明白，不過我哋兩個嘅做法就係「意見接受，態度照舊」，繼續喺小息時間放閃，唔理會其他同學嘅感受，要錫嘅錫、要攬嘅攬，總之就活喺屬於我哋兩個嘅二人世界入面。即使老師叫我哋啲行為唔好做得咁過份，但或許男仔總係同老師唱反調，繼續喺度曬我嘅女朋友。
-
［若你喜歡怪人，其實我很美。］
-
（待續 To be continued）
IG：chingchingstory